السلام عليكم ورحمة الله وبركاته , نكمل القصة,
طبعاً وكان جميع دفعتي من خريجي الكليت التقنية اللي تم قبولهم هذيك الايام في لوبريف معارضين لفكرة استقالتي بحجة ( أيش ضمنك تلاقي وظيفة بعد البكالوريوس) , عالعموم ولله الحمد انا اتكلت على القوي العزيز واستقلت وذهبت الى الرياض لاكمال دراستي , وما اخفيكم انه كانت بعض الاحيان وانا في الرياض تمر علي هواجيس سلبية خصوصاً لما تتأخر المكافئة او لما اسمع ان الوالده او الوالد في ضائقه ماليه معيتة او يواجهون صعوبة في توفير شيء معين , هذي الهواجيس السلبية كانت مثل ( [COLOR=darkred]اللحين انت وش اللي حادك تورط نفسك هذي الورطة , موكنت معزز مكرم وفي جدة عند اهلك وراتبك حلو , شوف زملائك اللحين مبسوطين وكل واحد مطلع له سيارة واللي يفكر يتزوج و و و و .....الخ) [/COLOR]
هذي الهواجيس وغيرها كانت تمثل لي تحدي إني اثبت نفسي واثبت ان حسن الظن بالله ممكن يحقق لك اشياء فوق ما تتوقعها.
وافتكر في احد الاجازات اثناء دراستي في الرياض , طبعا في الاجازات كنت انزل جده , المهم في احد الاجازات حضرت مناسبة زواج احد الاصدقاء, وقابلت في الزواج احد زملائي من نفس الدفعة اللي انقبلت في لوبريف في قسم التشغيل , وطبعا زي ما انتو عارفين , هيئة الطالب وماركات ملابسه وجواله وساعته وسيارته , غالباً ماتكون بنفس وضع الموظف , طبعاً لعدم وجود راتب , المهم انا كان باين علي اني طالب !!! ههههههههه
الشاهد في الموضوع اني اتقابلت مع زميلي المشغل في لوبريف وسألني عن أحوالي وكيف الدراسة ومن ذا الكلام , وكنت أرى في عيونه نظرات تقول ( ايش اللي حادك يالمغفل ) , عالعموم في نهاية المقابلة كالعادة , أخذت رقم جواله وقاللي اعطيني رنه علشان اخزن رقمك عندي , وقتها ماكان عندي رصيد (طالب!!)هههههه.
فقلت له يا فلان معليش ماعندي رصيد , فمباشرة ماقدر يمسك الاستهزاء وقال لي كلمة جرحتني وقوتني في نفس الوقت قاللي ( مو كنت معانا احسن لك تاخذ راتب وماتحط نفسك في موقف محرج زي كذا)؟؟
بصراحة انا زعلت وفي نفس الوقت كان عندي ثقة كبييييرة بالله رب العالمين ثم بقدراتي , فرديت عليه وقلت ( انا مكاني في الشركة اللي انت فيها بين المهندسين مو مثلك افتح واقفل محابس وأخذ عينات زيت وارسلها للمختبر وأعبي زيت للكمبروسرات والمضخات!!!) فضحك وقاللي الله يعينك.
طبعاً انا ردي له كان غلط , كان المفروض ما اقلل من وظيفته وشغلته, لكن هو زعلني بصراحة.
المهم اكملت دراستي في الرياض وخلال السنة الاخيرة في الدراسة كنت يومياً أدعي الله سبحانه وتعالى بدعاء أطلب فيه انه يوظفني بمجرد ما اتخرج وقبل ما استلم وثيقة تخرجي واتخيلو فين كنت اطلب ان الله يوظفني ؟؟؟
في لوبريف وكنت اسأله سبحانه انه يعيني فيها على وظيفة مهندس آلات دقيقة.
كنت اتمنى واحدد طلباتي لأني عارف ان الله قادر عاى كل شي وانه عند ظني به لاني عبده.
ويمكن لوكان في احد يسمعني وانا ادعي , كان ممكن يقولي انت خبل ؟؟ تبي ترجع نفس الشركة اللي استقلت منها يوم انك مشغل , وكمان تبي تكون مهندس ؟؟؟؟؟؟
لكن ولله الحمد الله سبحانه وتعالى استجاب لي نفس اللي طلبته بالظبط , أول ما انتهينا من الاختبارات , نزلت الى جده وجهزت سيرة ذاتية محترمة وكتبت فيها المعدل المتوقع للتخرج وبدأت مباشرة ابحث عن عمل , مع انه كان باقي على استلام وثائق التخرج اسبوعين , ومن ضمن الشركات اللي ارسلت لها ايميل بالسيرة الذاتية ( لوبريف ) , والله الذي لا اله الا هو ياشباب بعد الايميل باسبوع اتصلوبي وقالولي انت عبدالله اللي كنت مشغل عندنا ؟ قلت ايه , قالولي وصلتنا سيرتك الذاتية والف مبروك حصولك على البكالوريوس وتعال يوم الاثنين القادم عندك مقابلة شخصية مع مدير قسم الصيانة على وظيفة مهندس آلات دقيقة.
والحمدلله حضرت المقابلة وتم قبولي وطلبو مني احضر وثيقة التخرج وجراء الفحص الطبي وفي تاريخ 2-5-2009 بدأت العمل كمهندس آلات دقيقة في الشركة.
تعال شوف ردود الفعل من زملائي السابقين , والله كان في ناس من قوة الفرحة والانبهار دموعهم نزلت زفي ناس من قوة القهر وجيههم حمرت.
وبمجرد ما اتعينت مباشرة اتصلت على جميع اللي لهم ديون على الوالده وقلت لهم ( معاكم المهندس عبدالله فواز من شركة ارامكو السعودية لتكرير زيت التشحيم ) ولاعاد اشوف احد يتصل على جوال الوالده واللي له شي يتفاهم معي وانا بإذن الله راح ارد لكم كل مستحقاتكم , ومن بعدها الحمدلله الوالده صارت تنام وهي مرتاحة ومتطمنة والوالد نفس الطريقة , حتى ان الوالد قاللي كلمه خلاني ابكي منها ( قاللي يا عبدالله انت علمتني انه مافي شي صعب على الله وانت خليتني الحمد لله امشي بين الناس وانا رافع راسي والحمدلله الان ما حد له شيء عندي , روح يا ولدي الله يوفقك ويطول عمرك ويرفع شأنك وراسك زي مارعت راسي وبيضت وجهي) بصراحة انا ماقدرت اتمالك نفسي وقتها.
والحمدلله اتزوجت من عائلة ذات مكانة إجتماعية مرمووووقة جداً وهم من أهل القصيم وانا افتخر بهم , والله سبحانه وتعالى بدعاء الوالدين رفع شأني أكثر واكثر والحمدلله زي ماذكرت لكم انا الآن معيد في كلية ينبع الصناعية في قسم الآلات الدقيقة وهي وظيفة احسن بكثير من الشركة السابقة ووضعي ممتاز والحمدلله وطموحاتي مستمرة وبإذن الله بإذن الله اني احققها.
طبعاً انا الآن راح اكلمكم عن الدروس المستفادة من الابتكار السابق بس كنت حاب اشارككم بقصتي من مبدأ فأما بنعمة ربك فحدث وأيضا لعلي اكون سبب في رفع الهمة والحماس لدى الشباب وايضاً لكي تعلمو اني شخص متفائل لأبعد حد واني لم ولن اتشائم واتحطم بخصوص الابتكار السابق ولكني اصبحت أكثر واقعية ومنهجية في أمور كثير وهذا ما سأذكره لكم في المشاركة التالية.
