السلام عليكم ورحمة الله وبركاته
الموضوع باين من عنوانه وخير الكلام ما قل ودل
انا راح اقولكم قصتي مع الحمراني من ال أ الى ال ي
نبدأ عن اول زياره لهم قبل لا اشتري السياره
كان خاطري في انفنتي g37 موديل 2010 سياره غنيه عن التعريف
زرت وكالة الحمراني فرع الراكه الخبر اوتو موتو
شفت السياره عجبتني سئلت عن سعرها قالو 161 الف ريال طبعا فل اوبشن
بالبدايه كانت خدمتهم لي من احسن ما يكون شي طبيعي لانك راح تشتري من عندهم
ولما قلت لهم فلوسي كاش دلعوني اكثر
نجي ليوم الدفع
رحت للوكاله ودفعت المبلغ واعطيتهم الاوراق المطلوبه وقالو لي السياره بالكثير اربعه ايام تكون جاهزه
على العلم انا بلغتهم اني ادرس بالبحرين واحتاج السياره باسرع وقت ممكن لاني كنت مستأجر سياره
دفعت يوم السبت وانتظرت الى يوم الاربعاء
طبعا كلمتهم هم ما كلموني والسبب بيجيكم بعد شوي ههههه
رحت الوكاله الاربعاء الساعه 10 الصباح
قعدت مع الموظف قالي سيارتك جاهزه وبعدين عطاني ابتسامه صغيره وقالي فيه مشكله بسيطه
لاحظو معي كلمة بسيطه !!!!
طلعو السياره باسم شركة الحمراني وانا مجرد سائق على بالهم ماخذها نظام تأجير وانا مشتري السياره كـآش
بالله يا اخوان هـل يعقل هذ !!!!!!!!!!!!
( وانا بقلبي اقول هذا اوله ينعاف تاليه )
قلت شي وصار وامري لله
قلت لهم تصرفو قالو خذ الاستماره وودها للمندوب فرع شارع بن خلدون
تخيلو معي يرسلون عميل يخلص شغلهم وهم غلطانين فيه
قالو ايش قالو عملاء انفنتي معامله خاصه ... معامله خاصه طل والله
وديتها للمندوب وقالي يوم الاحد
استنيت الاستماره الى يوم الاربعاء الثاني
يعني سبوعين عشان تطلع السياره هههههههه شي يقهر
رحت لهم يوم الاربعاء وقالو سيارتك بنركب لوحها وهي في اوتو شاين عشان نلمعها
ومن الساعه 10 حتى 1 الظهر عشان سيارتي تجهز
قالو لي رح وقع على استلام السياره .؟؟؟
قلت طيب بشوفها قبل اوقع ...؟
قالو ياخي انت شاريها من وكاله مو معارض والموظف يقول مستعجل انا بسرعه وقع ابي امشي
قلت وكاله وكاله ووقعت على كل شي <<< ليتني ما وقعت
اخذت السياره من الباب الخلفي كان انا سارقها طريقة تسليم زفت والله لو انا مشتري ددسن ما سلموها لي بهالطريقه
ركبت السياره مع اني جديد على انفنتي ولا اعرف شي فيها
انتظر الموظف يعلمني شي
قالي مرني يوم السبت وبعلمك كل شي ؟!!!!!!!!!
وين الاحترافيه في تسليم السياره وين ارضاء العميل وين وين وين ؟؟
هذا غير تعطيلي سبوعين !!!
المهم استلمت السياره وتوكلت على الله سبحانه
طلعت اصلي العصر رجعت لقيت السياره جهة الرف رف الايسر فيه طعجه خفيفه مررره تكاد تبان لكن اذا دققت مع الشمس راح تشوفها
طبعا بعضكم يقول اكيد احد بالشارع سوا فيها شي للأسف السياره بالجراج كانت يعني من طعجها
الطعجه خفيف بس يا خوان بذمتكم سياره بهالقيمه واول يوم تاخذها وماخذها بعد عناء طويل
واخرتها مطعوجه ( غبـــــــــــــــــــــــــــنـــــــــــه )
وتخيلو السياره مو معمول لها ابديت بالكمبيوتر حقها والنوافذ بعد ما تشتغل اوتماتيك
رجعتها الوكاله وطبعا ما قمت اصارخ واتصرف بهمجيه
دخلت على المدير حق الفرع <<< ما يبي يذكر اسماء
وكلمته وبينت له استيائي قالي كل شي بنسويه لك وبنرضيك ولا يهمك عاد انتم تعرفون اسلوب اللي نحط القمر لك بيد والشمس بيد
اخذو السياره وسوو لها فحص جديد
وعطلوني اسبوع ثالث
وطبعا مثلكم عارفين انا وقعت استلامها << القانون لا يحمي .....!!!!!
قالو الطعجه هذي اكيد احد متكي على السياره ووووووو << طيب وش الفايده تبرر لي
المهم قلت لهم خلوها بالسياره دفعت بلا وهي مو باينه بس شي يقهر
المهم
كلمني مدير المنطقه الشرقيه حق الحمراني
قالي انا اعتذر وانت عميل انفنتي ودافع كاش و و و و و و
قلت له لو سمحت ممكن سؤال واحد ؟؟ << ابي ابرد قلبي
قال تفضل !!
قلت انتم لما تبيعو سياره من وكالتكم للعميل هل تهتمون فيه بعد البيع او بعد الفلوس ما تدخل بحسابكم خلاص العميل ما يهمكم ؟؟؟
قال لا لا لا
احنا تهمنا استمرارية العميل و و و و
قلت له يا اخي انا كان بامكاني اشتري هالسياره عدادها اصفار من اي معرض لكن اخترت الوكاله
عشان الضمان والخدمات .. << خدمات مع نفسك ههههه
المهم اتصلو علي بعد فتره وقالو تعال الوكاله وعطوني هديه صيانه 10000 كيلو مجانيه للعميل فلان هههه << اللي هو انا
وديتها صيانة الف <<< ودفعت ههههه ... العذر ان الصيانه المجانيه لم يتم اعتمادها
صيانة 5000 <<< دفعت للسبب ذاته
صيانة 10000 <<< دفعت للسبب ذاته ههههه
المشكله قايل لهم انا مو محتاج هالصيانه انا بس بشوف تاليتها معكم ...؟
انا شاري سياره اكيد بكون قادر على صيانتها
قالو لا راح نرد لك فلوسك قلت رديتها ما رديتها
انتم ناس ماعندكم مصداقيه بالتعامل
وهين اوريكم اذا ما افضحكم بفيس بوك وتويتر ومنتديات
واكتب اسم كل شخص متعامل معه
والله لاحقني مدير الصيانه الى سيارتي يترجاني
قلت له مابيني وبينك مشكله شخصيه بس ما عندكم مصداقيه
ومشيت وخليته
من بكره كلموني وقالو تعال خذ فلوسك وارسلت اخوي ياخذها له مابي لهم شي الله ياخذهم
طبعا انا هذي المعامله التي تمت معي مع العلم اني كنت راقي بالتعامل ولا فقدت اعصابي
يمكن تمت معاملة غيري افضل مني وهي حظوظ لكن هذا اللي صار معي
ولو تقوم الدنيا وتقعد خلاص ما راح اتعامل معهم ولا اشتري سياراتهم
حرام ان هذا وكيل انفنتي بالسعوديه
اسف يا اخوان على الاطاله وتقبلو شكري
وهالموضوع كتبته من القهر لا اكثر ولا اقل
