السلام عليكم و رحمة الله
حياك الله صباح الخير ماشاء الله تبارك الله, عسى الله يزيدك و يبارك لك في حلالك و عائلتك.
انا ما فهمت وش تقصد ( مالياً )
هل تقصد أفضل سيارة مقابل الي تدفعه؟
او تقصد الاقل قيمة بين الفاخرة؟
أو تقصد الافضل قيمة عند البيع لاحقاً؟
بالنسبة للأفضل مالياً لك ( كل هذه السيارات تدور في بحر 350 - 500 الف ريال سعودي ) و اتحدث عن سعر الجديدة و ليس المستعمل..
ادري ان الفرق واجد 150 الف و لكن هذا يعتمد على نوع و مواصفات السيارة الي تختارهاطالما انك في الرياض , فهذا شي ممتاز.
لان كل الوكلاء موجودين عندك, بالتالي كل الخيارات مفتوحة امامك.
راح اتكلم اول شي عن السيارتين الي انت اقترحتها من ثم اطرح لك خيارات في السوق ممكن ما انتبهت لها
رنج روفر فوج
سيارة مميزة, لي تجربة و لا تزال للآن مستمرة مع رنج روفر سبورت لكن الشكل السابق مو الجديد, السيارة جداً مميزة, و لو قررت اشتري سيارة فخمة الرنج راح يكون من ضمن الخيارات لا شك, لان التجربة شجعتني عليه من جديد ما خوفتني.. بعكس الاودي مثلاً الي بعد ان جربتها عرفت انها سيارات غير عملية بالتالي فيه خيارات افضل منها.
فوج او سبورت؟
بالمناسبة .. عمرك ماشاء الله 40 سنة لسى شباب, يعني لا تبعد سيارات مثل الرنج سبورت من خياراتك..
هذا يعتمد على الي تريده انت, سبورت راح يتغير عندك شكل القير و طريقة القيادة, طريقة القيادة على اي حال ما راح تتغير كثير و لكن راح تشعر انه اسرع و اخف , في كل شي, في اللفات و في الزحمة مثلاً .. الفوج ( الكبير ) راح يكون اكثر نعومة و اكثر راحة, و عند الالتفاف مثلاً راح تشعر كأنه قارب او مشابه لهذا الشعور, لانه قد ما يقدرون يبون يخلونه مريح..
السؤال العام.. هل الرنج هو خيار ممتاز؟ 2018 راح يحصل على تحديث بسيط.. حط هذا الشي في بالك.
BMW 740-730
ما راح اتكلم عن فرق المواصفات, لان كلها فخمة. في 2016 طلع لها جيل جديد و هو افضل من الي سبقه, اخف وزن و اكثر مميزات, سيارة جميلة و من الداخل هو سر تميزها.. خليها ضمن خياراتك ..
السيارات الي اقترح انك تروح و تشوفها .. ممكن تعجبك.كل سيارة راح اذكرها , تقدم مواصفات جداً عالية من الامان و الفخامة, و ممكن بعض الروح الرياضية.. لكن صدقني انها سيارات فاخرة و تقدم لك 5 - 6 سنوات قدام في افضل مستويات الفخامة.
1 - مرسيدس S500 , او S400 فل كامل. ( 2014 وفوق )
مثل ما وصفتها مرسيدس, هي افضل سيارة في العالم.. و لا ابالغ, الحق يقال انها سيارة جداً مميزة و فيها كثير تقنيات و سبل راحة تغنيك ( عن كل السيارات ) الباقية, و يشهد الله يا اخوي اني ما ابالغ, هي افضل سيارة متوفرة تقدر تشتريها, او من الـ TOP 3 على الاقل.
2- بورشة بانيميرا 2017 الجديدة ,
الحقيقة ما اعرف انواعها و لا اسعارها, لكن سعر البداية اقل من سعر البداية في مرسيدس S , بالتالي نحن ننظر في نفس المستوى. البانيميرا الجديدة صارت اكثر فخامة, و راح تستمر الى 2023 بنفس الشكل, هذه ميزة.
3- مازيراتي كواتروبورتي ,
سعرها جديد قريب من المرسيدس S , اعلى من سعر الـ S و لكنها سيارة متميزة, كمواصفات ليست افضل من BMW او مرسيدس, و لكن فقط اسم و شكل متميز.. هذا الي يميزها عنهم و لكنها مو افضل منهم.
4- بينتلي فلاينغ سبور 2012 - 2014 ..
قيمة الصيانة اعلى من كل المذكور هنا, و لكنها تقريباً بنفس السعر, و فكرة مجنونة.. لذلك قلت اذكرها لك
.5- لكزس LX570 ,
قوة تحمله عالية جداً و راح يريحك من ناحية التكييف او الخرابات .. بمراحل عن البقية
6- اودي A8 الجديدة 2018 ,
جداً فاخرة.. الكشف الرسمي يوم الثلاثاء. تصل عندنا 2018.لو تنتظر شوي ..
( الربع الثاني من 2018 ) راح تتوفر خيارات اكثر , مثل بورش كايين الجديد 2018, والي راح يكون بانيميرا لكن على شكل جيب, جيب جينسيس الجديد يقال انه راح فاخر, مرسيدس GLE 2019 وهو ML لكن اسمه تغير, BMW X5 الجديد .
نرجع للاسئلة الاولى هل تقصد أفضل سيارة مقابل الي تدفعه؟
هنا ارشح لك المرسيدس S
او تقصد الاقل قيمة بين الفاخرة؟
سيارات لكزس, و جينسيس G90 هي الاقل سعر بين الفاخرة, الي ذكرتها, السيارات الجديدة للآن ما اعلنوا عن اسعارها و الاغلب ما راح تتغير ..
أو تقصد الافضل قيمة عند البيع لاحقاً؟
اتوقع ( مرسيدس S و لكزس LX570 )
في النهاية , ارشح لك اما مرسيدس S أو رنج روفر , لكن انت فكر ,, و لنا نقاش آخر لو تحب ..
