توني شاري فكتوريا امريكي وابي؟؟؟

mogram @user_16726 · 09-01-2005

السلام عليكم ورحمة الله وبركاتة
احيكم على هذا المندى الرائع بمعنى الكلمة
وهذي اول مشاركة لي وارجوا انكم تفيدوني
انا شريت كروان فكتوريا موديل 2004 واربعة امريكي اخوى الجديد ماشى 16 الف ميل
وابي كم شغلة يا ليت تساعدوني فيها
اول شئ الرادو ما يجيب ام بي سي اف ام تردد 102 وش السوات هل اغير المسجل والا في حركة ثانية ..؟؟
ثاني شئ ودي اركب شكمان ثاني لأن الأمريكي ما يجي الا شكمان واحد ... هل لها جدوى ؟؟ والا بخرب على نفسي ؟؟
ثالث شئ الريموت حقها مفقود وشلون اركب ريموت واغير الأرقام السرية حقت السيارة ؟؟ وفين ؟؟
رابع شئ الإستبنة ابي جنط حق 2004 وكفر جديد وين القى مكان القى فية الجنط غير الوكالة ؟؟
اسف على الإطالة
فية سوال اخير
وش احسن كفرات للفكتوريا والا اخلي حق بلدها حق امريكا
انا اسف جدا جدا جدا لأني ثقلت عليكم

وشكرا لكم

mogram @user_16726 صاحب الموضوع · 10-01-2005

السلام عليكم ورحمة الله وبركاتة
اول شئ احب اشكركم كثير الشكر على ردودكم الرائعة والجادة واشكركم على سعة صدركم وقرائة موضوعي
وانا افتخر اني انظميت لهذا المنتدى الرائع
وانا بالقصيم ورايح للرياض انشاء الله وابسوي بنصايحكم والله لا يحرمني منكم ولكم كل الدعاء
بس ابي وصف حق ورشة البيان لو كلفت عليكم
وفية شئ واحد مضيق صدري بالسيارة اللي هو في المكان اللي بين السواق والرديف انا ودي احط فية قاعدة حقت مكان الأشرطة والكاسات والسيدي وغيرة .. بس ابي شئ صح لو يكفنلي 1000 ريال بس شئ صح وماشي مع ديكور السيارة
وين القاة ..... في الرياض او القصيم
ودعواتي الصادقة لكم

922 @user_10667 · 09-01-2005

السلام عليكم

بالنسبة للمسجل تقدر تاخذ سعودي مستعمل ورخيص وياكثرها

الريموت مثل ماقالو الاخوان من البيان

الشكمان الثاني

هذا يجي في الفل كامل وتاثيره حلو وانصحك تاخذ من التشليح الوصلة وتركبها |1|

ملاحظة :

ينقل لمنتدى ورشة السيارات

تحياتي
محمد

R A D A R @user_10304 · 09-01-2005

اولا مرحبا فيك اخوي في منتدا السارات و بعدين الف مبروك السياره والله يعطيك من خيرها و يكفيك شرها

بنسبه لاستفساراتك ياريتك قلتلنا انت من اي مدينه عشان نفيدك لكن اذا انت من الرياض انا بقولك وين تروح وتختصر علي نفسك تعب و مشاوير كثير بدون فايده انا من اشد المتابعين لموضوع تطوير الفورد و الورش الي تهتم بالمواضيع هذي ومالقيت افضل و احسن من ورشه البيان الجديد الي بالرياض لان كلللل شي تتوقعه ولا ماتتوقعه عندهم وباسعاااااار حلوه مره مثل يبرمجون لك المسجل ب 300 ريال يصير مثل السعودي يجيب الاف ام تمام و يبرمجون الرقم السري و الرموت و اشياء كثير و شغلهم بضماااااااااااان مو اي كلام

بالنسبه للشكمان الثاني انا والله ما اعرف احد ركب شكمان ثاني بس انا اذكر اني سئلت عنه وصار غلي شوي يمكن يكلف 800 ريال بس شغلته طويله عريضه مالك فيها واعتقد انها مالها ذاك التئثير علي السياره بس كشكل جمالي

بالنسبه لكفرات الفورد انا جربت ثلاث انواع من الكفرات ولا انصح فيها ابد الي هي اولا البرجستون مطبها قوي مره مره و الفالكون بعد مطبها قوي و القوديير شكلها غبي اذا ركبت علي السياره جاي صغير من القاعده ولما يركب يصير شكله قبيح

علي كلام الشباب الي جربو يقولن انا احسن شي كثمن و شكل هي نوعين اولا دانلوب و ثانياااااا فاير ستون

علي فكره انصحك بتغيير كفرات السياره الامريكيه لانها غير مناسبه لبيئتنا ولا تناسب الا الاجواء البارده

بالنسبه للجنوط روح للغرابي بالرياض الجنط يكلفك 270 ريال وهم ارخص شي حسب اعتقادي

ارجو اني افدتك و اسف علي الاطاله

باااااااااااااااااااي

احلى نك @user_14721 · 09-01-2005

وعليكم السلام والرحمة

هلا وغلا اخوي mogram

وحياك الله معانا في المنتدى

وان شاء الله ينال على اعجابك

وتفيد وتستفيد

اول شي : مبروك ع الموتر والله يعطيك خيره ويكفيك شررره ..

بالنسبه للمسجل الامريكي ماتجي الموجات الا ارقام فرديه

سمعت ان تتركب له قطعه او شي من كذا مااقدر افتيك بس انت اسال مصلح مسجلات

والا الشباب يفيدونك اكثرر

وبالنسبه للشكمان الثاني انا انصحك انك ماتلعب بالسيارة وتخليها شد بلدها

وعلى فكرة الامريكي يجي منه شكمانين في اغلب الفل كامل يجي شكمانين

بس خلها على شد بلدها احسن هذي نصيحتي وانت براحتك ..

اما بالنسبه للريموت تقدر تروح الوكاله يبرمجونه لك ويعطونك رموت والا قول للمعرض الي شريته منه

عطني ريموت اي سيارة وخذه وبرمجته بـ 50 ريال في بعض السيارات بالمعرض يجي معهم ريموتين

اذا صاحب المعرض يبي يخدمك يقدر يعطيك واحد ويخلي الموتر الثاني بريموت واحد وانت برمجه بـ 50 ريال فقط .

بالنسبله للأستبنه مايجي الفورد واغلب السيارات الا جنط اسود واذا تبي جنط روح التشليح يمكن تحصل ..

اما للكفرات اول شي تسويه تغيرها لان اكثرها تجي كفرات لمناطق بارده

واحنا ما شاء الله الارض تشكي من الحرارة فاول شي تسويه قبل المسجل والبرمجه تغير الكفرات

لان اعرف شباب تسلخت الكفرات عليكم لانهم امريكيه ..

فأنت لاتغلط مثلهم

ان شاء الله قدرت افيدك في بعض الاشياء

وباقي الشباب ماهم مقصرين معااك ويفيدونك اكثر..

تقبل تحياتي .. |3|