شريت ماركيز 2002 و عندي شوية اسئله

السلام عليكم

انا شريت السياره من شهر و نصف تقريبا . اخذتها من البيان

اول شيء مبروك عليك السياره العالميه الرائعه العالية الرفاهيه ذات الاعتماديه الممتازه الله يعطيك خيرها ويكفيك شرها

المهم عندي شوية اسئله

اسئلتك على عيني وراسي وكل ماتملك يديني

السياره أحسها ناشفه على الطرق الغير مستويه و المطبات الصغيره الحاده أو الحفر الموجوده بكثره في شوارعنا كماتعلمون

يعني لو الشارع غير مستوي أحسها تنطنط و تشدني يمين و يسار

فهل هذا طبيعي و ما سببه

لا هذا غير طبيعي نهائيا

يعني عارفين اللي حطمني و رفع ضغطي إني اليوم جربت سيارتي القديمه ( كابرس 85 ) أكل عليها الدهر و شرب .. الا إنها ناعمه جدا على المطبات و الحفر و تمتص كل ظروف الشارع

طيب كيييييف

أقولك كيف لاتشيل هم

سياره قديمه مثلها تكون أنعم من سياره جديده ؟؟؟

ضغط الكفرات في الفورد حوالي 33
و نوع الكفرات ميشلان جايه عليها من أمريكا

انصحك بضغط الهوا يكون 35 انت عارف حفرنا وجونا مايحتاج اقول حتى شتانا حار

هل المشكله من المساعدات ؟
يا ريت تشوفولي الحل لأن الموضوع رافع ضغطي و خلاني أفكر أبيعها بعد مده

الحل طال عمرك سيارتي اول فيها نفس مشاكلك اذا اكلت حفره وانا امشي عشره او عشرين اشوف راسي وروس الركاب تهتز وتتنطنط يمين ويسار مو بس السياره وحقدت عليها قلت الهبلا هذي وندمت اني شريتها لدرجه اني فكرت ابيعها والله العظيم حقدت من جدددد وكنت مثلك كان معي كابرس صابونه واحسب ان وكاله الميركوري كذا معفنه وتنطنط انا شاريها من صاله مثلك لاكن عرفت بعدين اني غلطان وميتين غلطاااااااااااااااااان وكنت اركب مساعدات وتتفقع كل شهرين او اربعه شهور وحل اللغز....

السياره كانت نازله يعني ماتقدر تدخل يدك بين الكفر والرفرف السبب ان اليايات خرباااااااااااانه وابشرك غيرنا اليايات ورفعناها بكعكات عشان ارخص ورفعنا السياره فوق رفعه الوكاله باصبعين تقريبا اللي يرفع لك السياره بيعلمك وهو لازم يكون دقيق وبعدين سميت بالله وغيرنا الاماميه بمساعدات جبريال اقوى نوع رياضي (طبعا ركبت الجبريال للقدام فقط عشان ماتأثر على الراحه وعشان ميزانيتي والفني قال اذا سيطرت على وجه السياره سيطرت على كل شيء فقال ماله داعي اللي ورى تكون جبريال اتركها موتور كرافت) وصارت ماشاء الله ثباتها مثل الالفين وثلاثه واعلى بعد يمكن الفين واربعه واقولك اول كنت لما اخذ المنحنى على سرعه 70 أحس السياره مجنونه ترقص سامبا والطاره كانها جسم غريب والفرامل جسم غريب والهيكل جسم غريب يرقص لحاله ولما افرمل السياره تروح قدام وتجلس تشكشك وترقص!!!!!:D بس لما غيرت التغييرات الجديده وخصوصا مع مساعدات الجبريال الحين ماشاء الله لاقوه الا بالله اخذ المنحنى نفسه على سرعه 140 :rolleyes: وانا اقدر اسيطر وتحس السياره صارت كتله وحده والطاره مليانه والفرامل مليانه لان المساعدات الرياضيه اعطت الكفرات التصاق ميه بالميه في الارض والحمدلله يارب على التغييرات اللي سوت منها سياره جديده بشكل ماكنت اتخيله وحبيتها اكثر واكثر.....|1|

وسؤال ثاني :
عند تشغيل السياره و خصوصا قبل أن تسخن أحس برجه بسيطه جدا إذا زودت دعست البنزين شوي
اذا دعست بقوه تروح و إذا خفيف جدا ما تطلع ... يعني عند مرحله معينه بالنص

هذا كان مجنن فيني نفس المشكله اذا ارتفعت الحراره 2 يعني بلكّتين تبدى السياره تنتفض كأنها عجوز صافقها البرد وتحس انها ترتعش بتطفى بعدين لما ترتفع الحراره او تمشي تروح الرعشه تدريجيها هذااااااا طال عمرك حسّاس الأبنص فيه مشكله من الزمن يعلّق اذا جا ينزل وبصعوبه يرجع لوضعه لانه عباره عن سبرنق ينزل بالتدريج مع التسخين وهذا امره بسيط غيره وتختفي المشكله العويصه للأبد وامره سهل إن شاء بس والله انه يحيّر

سؤال ثالث:

اذا كنت مسرع و بدأت أدعس فرامل أحس بصوت كأنه إحتكاك زي ما تقول الفحمات معدومه
بس إذا دعست بقوه ما يطلع و حتى لما ما أكون مسرع ما يطلع
والفحمات يقول البيان إنها جديده غيروها هم
هل هذا مثلا صوت ال abs

الصوت في الفحمات الفورد الاصليه طبيعي جدا تسمع صرصره وانت مهدي او في زحمه هذا طبيعي جدا واذا تبي تعرف انها معدومه فك الكفر وشوف اذا منتهى او باقي في الفحمه شي وعلى فكره الفورد كله فحمات مافيه قماشات لاكن صوت الاي بي اس طقطقه طقطقطقطقطق بشكل سريع وسلس وتحس بنبضات نعال الفرامل على رجلك بشكل متقطع وبعد ماتركب المساعدات القويه وتضبط اللي قلت لك ماراح تسمع السياره تصرّخ اذا ضربت فرامل خلااااااص تودعها لان هذا هو العمل الامثل للفرامل الاي بي اس التصريخ هذا يعتبر عيب جسيم لان الكفرات ماتلتصق بالارض ميه بالميه لاكن مع المساعدات القويه والوزن الممتاز للكفرات ماراح تسمع الا طقطقه او صرخات بسيييييطه متقطعها وبعدين طقطقه..وكذا تكون الفرامل 100% اما التصريخ المستمر لسياره مزوده بنظام اي بي اس هذا عيب ولاهو كويس ابببببببد
سؤال ثالث:
زر منع الإنزلاق إذا ضغطته تنور لمبته و تبقى منوره
فهل كذا يعتبر شغال أو لاء
لأن الكتالوج قال إنه لازم يعمل فلاش و اذا بقى منور معناها انه مو شغال

لاتضغطه يالغالي ابدا ابدا هو يشتغل اوتوماتيك اتركه في حاله اذا ضغطه وبقت اللمبه مولعه معناته انه متعطل وانت عطلته لما ضغطت الزر فلا تفكر تضغطه وتخلي اللمبه والعه ابد هو اوتوماتيكي اذا صار فيه مطر او زيت بالطريق او عطيتها دعسه قويه ماتهج فيه او تزحف فيك هذا النظام يعطل الطاقه اللي فوق الحاجه عن السياره عشان ماتنحرف فكيف تشغله تخليه زي ماهو لمبته طافيه لانه اوتوماتيكي وانا ماانصحك وبشده مانصحك انك تضغط الزر وتترك اللمبه والعه لانك بكذا تطفي النظام وماتستفيد منه والخير فيه كثير مره مره ... باختصار لما تضغط معناته متعطل تعطل تام ومااراح يشتغل الا لما ترجع تضغط ..اللمبه طافيه يعني يشتغل وراح يعمل من نفسه بكفائته المصنعيه المحدده مالك دخل فيه

خلاص كذا كفايه كثرت عليكم الأسئله

لاوالله تحت امرك ياسيدي باللي نقدر عليه ونعرفه وجرّبناه


أرجو أن تعطوني رأيكم و شكرا