معلومات عن الأبيكا

شكراً جزيلاً لكم على إفاداتكم القيمة
أخي أحمد دوت كوم ذكرت مراكز خدمة سريعة هل هذه متعاونة مع التوكيلات لأني ماخذ السيارة منهم وهل هناك مثلها في الأحساء .. لأن الآن عدت ألف كيلو ورحت للصيانة في التوكيلات وعطوني موعد 7:30 الصبح أخليها عندهم وآخذها العصر لكني رفضت لظروف العمل قلت لو تعطوني سيارة بديلة في هالفترة مافيه مانع لكنهم رفضوا.. وش الحل؟

هلا اخوي
اولا الف مبروك السيارة وعساك تفينها ولا تفنيك
الشي الثاني بالنسبة للزيت هم يستخدمون زيت شل سوبر الابيض قبل ما توصل ل 60000 كيلو وبعد ال60000 بيغرون لك الزيد الاحمر لانه اثقل
الشي الثالث بالنسبة للحرارة فهي طبيعية وبتلاحظ بعد تقريبا عشرة الاف كيلو انك اذا شغلت السيارة وانت توك مطفيها بتلاحظ ان الحرارة بترتفع للاخر بس ما بتطول يعني تقريبا ثانيتين وبتنزل وهذا شي طبيعي بس لو تروح للوكالة بيضبطونه لك
الشي الثالث بالنسبة للون انا ما اعتقد فيه تاثير على المكينه بس زي ماقال اخوي الهامور
الشي الرابع انا انصحك بعد ما تخلص الالف كيلو واذا جيت بتغير زيت انك ما تتعب وتروح للوكالة (الجميح) لان في مراكز الخدمة السريعة الى متكاثرة بالرياض وهم بيغرون لك الزيت والسيفون وبيشيكون لك على خمسة عشر نقطة بالسيارة ويختمون لك على كرت الضمان اللى معطينك الوكالة وانت واقف على روسهم يعني بلا موعد ولا حجز ولاهم وارخص من محلات التغيير الثانية واضمن لك يعني اذا صار شي بالسيارة لاقدر الله تقد تحاجهم بالدفتر
والحاجة الاخيرة انتبه للدرج اللي بين كرسي السائق وكرسي الراكب الامامي لانه حساس جدا وهو الحين منكسر عندي وعند واحد من اخوياي وما لقينا له غيار في الوكالة وبالتشليح لقينا بس مبهذل تذكرني اذا انكسر عليك الدرج.
واتمنى لك قيادة سليمه

أول شي مبروك عليك السيارة



خذها للوكالة عند الـ 1000كم.

أما بالنسبة للزيت أنا استخدم حق سيارتي الأبيكا زيت (فوكس سوبر جي تي )

ولاحظت انه افضل من زيت الوكالة



أما اللون ما اتوقع له تأثير على المكينة



و مؤشر الحرارة طبيعي 100%
لأن السيارة فيها (كوع حرارة) منظم حرارة المحرك


واذا عندك اسئلة ثاني


احنا حاضرين

ألف مبروك السيارة الجديدة :)
بالنسبة للزيت
اذا كنت انت شاريها من الوكالة في الرياض سواء الجميح أو العيسى
تروح لهم لمركز الخدمة السريعة بعد الألف كيلو الأولى يجيك العامل وتعطيه دفتر الضمان
تدخل للغرفة ويعطونك ورقة تبع النقاط اللي راح يشيكون عليها
تقرأ الورفة وتتطلع النقاط
بعدها راح يدخلون السيارة ويغيرون الزيت ويسوون تشييك كامل للسيارة
وتسدد الرسوم وخلاص ..
بعد الألف كيلو الأولى لازم تراجع الصيانة كل 5 آلاف كيلو
ونفس الشيء تعطيهم دفتر الضمان
طبعا الرسوم تختلف عن الألف كيلو والنقاط اللي راح يشيكون عليها تختلف
بالنسبة للحرارة شيء طبيعي جدا تكون تحت النصف
بالنسبة للون ما يأثر أي شيء
الا انه راح يتعبك في التنظيف ويمكن يأثر على الحرارة الداخلية للسيارة اذا وقفت في الشمس
ان شاء الله اني أفدتك :)