السلام عليكم ورحمة الله وبركاته
بما أني حطيت تصويت وأخذت بعض آراء الشباب من خلال الموضوع http://www.assayyarat.com/forums/showthread.php?t=91574
قلت خلني أروح للجميح (الكلام هذا أمس) وفعلاً رحت للجميع قبل آذان الظهر تقريباً (الفرع اللي بالرياض على طريق خريص).
طبعاً هدفي من الروحة أني أبي استفسر واشوف فئات اللومينا 2006 بما أني أحد معجبيها واللي يمكن أني أكون أحد ملاكها مستقبلاً..
ما أطول عليكم..
لقيت عندهم لومينا LTZ 2006 صراحة روعة مرة وكاملة المواصفات (مثبت سرعة، جنوط، فتحة، جلد، اوتوماتيك، سي دي، 6 سلندر، قفل مركزي، قزاز كهربائي، مقاعد السائف والراكب كهربائية، ايرباق للسائف والراكب.....إلخ) كل هالمواصفات مسوين علية عرض بالضبط بـ 86,666 ريال سعودي مثل ماهم كاتبين على السيارة...طبعاً هم يقولون عروض رومضان وأنا أعتقد أنها تصفية على موديلات 2006 قبل تنزل 2007 !
صراحة أنا أنصدمت لأني أحس السعر مبالغ فيه مرة مرة...بما أني أول مرة تقريباً اسأل عن أسعار الـ LTZ سألت الموظف عن بعض الأشياء وعرفت منه أن الـ LTZ يبدأ من 82 ألف ريال وأن الفتحة فقط تكلف 5000 ريال سعودي!
قلت له سلامات....موب كانت الـ LTZ ماتزيد عن 78 ألف وخصوصاً انكم تقولون عروض الحين؟
قال لا الـ LTZ بنفس المواصفات اللي قدامك أول كانت توصل إلى 95 ألف ريال بالراحة .... فما أدري صراحة كلامة هو صحيح ولا لا ؟
وهل تستاهل سعرها (86،666 ريال سعودي) ؟
خصوصاً أن شكلها راح يتغير، مع أني ماهمني الشكل لو يتغير مليون مرة...بس يعني ولو اشوف سعرها كبير شوي ولا وش رايكم ؟
وقبل عروضهم بكم كانت اسعارهم ؟
وعبداللطيف العيسى أسعاره كيف بالضبط لأني ماسألت، هل هي مثلهم أو أقل أو أكثر ؟
صراحة السيارة روعة، وجلست اتفرج عليها ساعة كاملة ومامليت وبغيت أتهور واشتري وحدة وأنا هناك بس اشوى ثقلت شوي خخخ :)
بس مهما كان ما اشوف انها تستاهل 87 ألف مهما كان ولا وش رايكم ؟
وللمعلومية....
لقيت LS مسوين عليها عرض وهي أعلى فئة من الـ LS وسعرها ما اتذكرة بالضبط بس هم ملزقينها على قزاز السيارة وأظن أنه بـ 68 ألف وكسور، ومافيه إلا لون أبيض بس، بس ولو طالعة رسمية بقوه باللون الأبيض وهو من الألوان المناسبة للومينا
ولقيت SS بس موديل 2005 لونه أحمر يقولون أنهم مسوين علية تصفية وسعره 88 ألف وكسور..بس اللون بايخ :)
ومدري عندهم غيره يعني ألوان ثانية ولا بس سيارة وحدة وهي اللي بالعرض!!
آرائكم ومعلوماتكم الله لايهينكم ...
أطيب التحيات،
