هذي الصورة توضح شكل الداشبورت بشكل عام مثل ما تلاحظون.
تنسيق محترم للداشبورت بسيط وبدون تعقيدات، والمكيف 8 درجات يدفع بشكل رهيب اقوى مرتين من دفع مكيفات السيارات اليابانبة.
صورة جانبية تبين لكم لون التخشيب بالاضافة الى شكل ناقل السرعة، ولاحظو بعد صناديق التخزين.
نشوف في هذي الصورة مفاتيح تشغيل المصابيح، مفتاح تشغيل كشافات الضباب، ومفتاح رفع وخفض ميلان الانوار الامامية الرئيسية، ومفتاح فتح وغلق الباب الخلفي ونظام الاي اس بي.
هذي مفاتيح الاضاءة الموجودة بالسقف، ويوجد مصباح للكونسول لونه بنفسجي يعطي اضاءة جدا جميلة للسيارة من الداخل خصوصا اثناء السفر في الطرق المعتمة. وكما تشاهدون صندوقين علويين واحد منهم للنظارة الشمسية والثاني بداخله منظرة لمراقبة الاطفال اثناء تواجدهم في الكراسي الخلفية.
تم تزويد المرآة الرئيسية بنظام التعتيم حيث يصبح لونها اخضر عندما يكون وراك شخص ماعنده احساس ضارب الفول بعينك.
وبالطبع هذي عجلة القيادة ومغطاه بالجلد بس ينقصها التخشيب مثل اختها الفل. وموجود على العجلة مفاتيح التحكم بالنظام الصوتي، وباين لكم بعد شكل الريموت الخاص بالسيارة. اما الهرن (المزمار) عليه صوت مميز يليق بسيارة مثل الفيراكوزا.
تحكم بالكهرباء لكرسي السائق فقط.
