تذكرت قصة صارت لي مع سيارتي من حوالي 4 سنين. سيارتي تيويوتا لاندكروزر 94
تعرضت لحادث من الأمام، وعلى اثره احتجت ابدل الراديتر لانه تهشم. ركبت راديتر نحاس ( يعني تفصيل ) ومع اني عارف ان الرديتر هذا ماراح يكون بكفاءة الراديتر الاصلي الا اني قلت السيارة قديمة وحرام اصرفت عليها 2000 ريال على راديتر . المهم ان من بعد تركيب الراديتر بدت عندي مشاكل بالحرارة، الحرارة صارت توصل النص وتتعدى النص احيان ( في ايام الصيف الحارة ) والماي دايما ينقص عندي،، وكل يوم والثاني لازم ابطل الكبوت واصب راديتر في الماي (:a120(89): او اصب ماي في الراديتر ).
وطبعا غير مشكلة التسريب، في مشكله ثانية اتصير وهو ان الراديتر النحاس يصدي والصدى يشكل طبقة عازلة تتكون ما بين الماي الي يبرد ومابين المكينة،، وبالتالي يقلل من مفعول التبريد وهو الشي الي يرفع الحرارة.
وفي احد الايام ، وكالعادة الصبح افتح الكبوت واتفقد الماي في الراديتر واحصله ناقص،، صبيت ماي وسكرت الكبوت.... ( لاحظ اني صبيت ماي وسكرت الكبوت...... ماتلاحظ اني نسيت اسوي شي ؟)
اذا مالاحظت كمل وبتعرف ........
على ايامها كنت في الكلية، فاول ما دخلت حرم الكلية، حسيت السيارة صارت ثقيلة جداً، ومافيها عزم ابد... اطالع العداد، والا المح الحرارة مرتفعة جداً،، ضربت الرقم القياسي... اول تصرف لي كان اني احط القير بالفاضي واسفط السيارة على جنب.... بطلت الكبوت والا اشوف غطى الراديتر محد :a120(89):
الظاهر اني عقب ماصبيت ماي في الراديتر نسيت اسكر الغطى او اني ما سكرته عدل. طبعا كان في بقايا ماي فقط
المهم ان شافني واحد من الربع وقام يضحك علي لما عرف السالفة ، بس ما قصر وداني فرع التويوتا وشرينا غطى راديتر وماي راديتر ورجعنا لموقع الحدث ( حلوة موقع الحدث؟ )
ومره ثانيه صبيت راديتر في الماي ( او ماي في الراديتر ) وقفلت الغطى وتاكدت انه ثابت مكانه. دقيت سلف، اشتغلت السيارة... الحمدلله المكينة ما خبطت.... بس لاحظت ان اداء السيارة ماعاد نفس قبل،، صارت السيارة خاثرة.. والسبب بسيط ان الزيت الي في المكينة احترق وصار محتاج تبديل.. وبعد ما بدلت الزيت، والجازجيت لانه تضرر من الحرارة وقامت المكينة تسرب زيت من فوق شوي.. وبدلت الراديتر النحاس الي بصراحه كان سيء للغاية وشريت راديتر جديد. والحمدلله،، للحين السيارة شغالة معاي من اروع ما يكون، والحرارة ثابته تحت الربع وماترتفع ابد.
