عدنا والعود أحمد
هههه حلوة أبي الفكة لا أقصد مفصل
المهم أخوي بقولك تجربتي مع سوبارو فورستر سياحية موديل 2006 قير أوتوماتيك جلست السيارة معي تقريبا اسبوعين ما أروح ولا أجي إلا عليها يعني محللها وطابخها صح <<< صارت كبسة مو سيارة
وهذي صورتها
وطبعا الي كانو معي كالعادة هم abosgr ونيسان للآبد
جربتها خط تسارع ورساوة وراحة وحتى في الطرق الوعرة في منطقتين الخرارة وحفيرة نساح
بخصوص البنزين الي كنت أعبيه فيها كان 91 أوكتان طبعا تقدر تاخذه لكن حسب ما يكتب في الكتلوج الافضل تاخذ 95 أوكتان وهو الي ينصح به
بنسبة للصرفية بصراحة أعبيها فل تمشيني ما يقارب 470 كيلو على رجل حارة جدا يعني أغلب وقتي مصيج عليها <<< أيه جلد مهو جلدك جر على شوك
تسارعها بصراحة جميل جدا صوت المحرك مهو مرتفع وتقدر تقول عادي في الدورات المنخفة للـ RPM لكنه شوي مرتفع عند الدورات العالية RPM لكن مو مرتفع بشكل مزعج أنا أشوفه مرتفع بشكل مطرب بصراحة صوتها تحس معك سيارة رياضية وصدقني روح جربت تدعس للسيارة في مكانها من مكاين سوبارو البوكسر وشوف أصواتها تطرب القلب
بنسبة لي التسارع أعطيه 4 من 5
كسيارة 4 سلندر وميزتها أنها كانت 2.5 لتر بعض سيارات سوبارو مكاينها ضعيفة ومزعجة مقارنة بحجمها مثل محرك 2 لتر لكن زين أنها مكينتها 2.5 لتر مناسبة جدا لحجمها وأمكاناتها
بخصوص الرساوة
مشيت عليها في سرعات عالية وبصراحة ما تصورت مقدار الثبات فيها وهذا علشانها دفع رباعي مستمر AWD الذكي نظام متطور جدا ليناسب جميع ضروف الطرق والي يسمى بـ (Symmetrical All-Wheel Drive) حتى أني مشيت عليها لسرعة 208 كيلومتر/ساعة أن بغيتني دقيق (طبلونها 220) وماشاء الله فيها حيل تنزل زيادة لكن ما حبيت أغامر أكثر لأني منب راعي سرعة فوق 200 وهديت لكن مع ذلك حتى على هذي السرعة ماشاء الله فعلا راسية
أعطيها بخصوص الرساوة 5 من 5
مستوى الراحة
بصراحة خامت مراتب الفورستر هذا الموديل كاتبينها في الكتلوج أنها من النوعية الجيدة ونوعية القماش جودتها ممتازة بحيث لو تسكب عليه الماء ما يتسرب في المراتب بسرعة! بصراحة ميزة حلوة حتى هي ناعمة وتصميم المقاعد تقدر تقول رياضي تحضن السائق فيها ومقاعدها لا هي القاسية ولا هي اللينة يعني وسط وأتساع الداخلي حلو على السيارة وبصراحة ديكورها الداخلي رغم تصميمها الكلاسيكي لهذا الموديل إلا أن الخامات المستخدمة من جد ممتازة ومتعوب عليها قليل تحصلها في سيارات وبالأخص أقصد السيارات الي تكون يابانية لكن تجميع! بعكس الفورستر يابانية بالكامل يعني كل شيء فيها من اليابان بالأخير أعطيها بمستوى الراحة 4.5 من 5
النظام السمعي
بصراحة جربته حلو لكن ساعات أشوف فيه تشويش بس مو دايم
أعطيه تقريبا 3.5 من 5 بسبب التشويش الي أسمعه بعض الاحيان
تجربتي للطرق الوعرة
هنا عاد بكون صريح معك أكثر من اللازم
بصراحة ما أخفيك أني تمتعت بتجربة الفورستر في الطرق الرملية وفي التطعيس عموما لكن الي خلاني أتضايق منها أن الوكالة قالت أن هذه السيارة خاصة للطرق الوعرة وأنا على الريحة صدقت! وأخذتها وجربتها وبصراحة أدائها ما توقعته أبدا قوتها ممتازة وتمشي في الطلعات والنزل لكن أرتفاع السيارة عن الأرض لم يكن بالمستوى المطلوب مع ان خلوصها الأرضي جيد وهو 20.5 سم طول السيارة من الامام إلى الخلف ما كان أيضا مبتعد كثير عن الأرض يعني الزوايا الي أسفل الصدام الامامي والخلفي الي فيها مو جيدة كتاخذ مرتفعات أو أنخفاضات شبه حادة أو قوية (وعلى فكرة أنا ما أختص الفورستر بذلك بل جميع السيارات الي بفئتها) يعني تصلح للطلعات البر الخفيفة وبصراحة أنا جربتها في أماكن صعبة في روضة الخرارة أنا بنفسي ما توقعت ترقاها أو توصلها لأن نظام الدفع فيها تقريبا زي ماتقول على HIGH لأنها تماتيك بينما القير العادي يجي منها HIGH & LOW وماشاء الله أعجبت فيها لكن مثل ما قلت لك كأستخدام تطعيس عنيف ما تصلح أما طلعات خفيفة مثل ما قلت فهي مناسبة جدا أنا جربتها في طلعة شوي صعبة في روضة الخرارة أوقات المطر في البداية أنا وربعي ما توقعت أني نرقاها لكم التجربة الأولى رقيتها ولا توقعت جربت المرة الثانية وقفت في ثلاث أرباع الطلعة وجربت مرة ثالثة وطلعتها وبصراحة ما توقعتها تكون بهذي القوة ودي أحط لك رابط الفيديو لكن حاولت أحمله من كم مركز تحميل ملفات ولا عرفت كل شوي مسوي لي مشكلة وهي لتجربتي الصعود الثالثة وراح تعرف كيف قوة السيارة
وهذا رابط الفيديو
وهذي صور أخرى وأنا في المحلية أجربها
وهنا في الخرارة
الله على ذيك الأيام كان فيها مطر وجيت الخرارة ولا كنت متوقع أن البحيرة حقت الخرارة ممتلية
عموما تقيمي لتجاوز الطرق الوعرة 3 من 5 <<< بالأحرى أستخدامها لطرق وعرة بيسطة وخفيفة ممتازة لكن طرق وعرة صعبة أو شديدة الصعوبة فمهي أهل لذلك لا هي ولا مثيلاتها.
الخلاصة
هذي الملاحظات كلها في الشكل السابق الي هو 2006
والشكل الجديد شفتها
وبصراحة فعلا جبارة جمال وشكل وحتى حجم كبرت بكثير شفتها في وكالة سوبارو الي بخريص ومقفينها جنب جيب تروبيكا صايره نفس الحجم تقريبا! مع أنها 4 سلندر قد بتكون أبطئ قليلا لأن أكيد أنها ثقلت وحطها في علمك لكن الشهادة لله أنها ماشاء الله صارت أصرف بكثير من جيلها السابق لا من ناحية التصميم الداخلي والخارجي ولا من ناحية زيادة التجهيزات صار فيها جلد وقيرها التماتيك الجديد صار بتنقيلات يدوية نظام سبورت وهذا شيء حلو فيها وصارت أكثر وسع وأكثر أرتفاع عن الأرض حسب ما رأيته أمامي.
وفي الأخير أنا أشور عليك أن الفورستر أرى أنها أفضل ولا تنسى تستخير
(معلومية بسيطة فقط للتنبيه كل السيارتين الي محتار فيها ترى قيمتها أثناء البيع بتطيح وما تمسك) يعني لا احد يغيرك بيقولك فيه وحدة بتمسك أكثر من الثانية كلها مهب مرغوبة كثير بالسوق لأنها فئة واجن ومو مرغوبة كثير هذي الفئة بالسوق أيضا انصحك بسؤال كلتا السيارتين أن أسعار قطع الغيار علشان تعرف أيهم أرخص
أخوك أبـــــــــوأســـــــد
