السلام عليكم ورحمة الله وبركاته
اتمنى من الخبراء الكرام المهندسين والفنيين الإفادة عن هذه الأصوات والإهتزاز الذي بداخل سيارتي crv جيب الهوندا الصغير موديل 98، يوجد اهتزاز وهي واقفة وهذا قال لي الفني انه من كراسي المكينة لأن الموجود فيها تجاري !
لكن بعد ماأمشي ثمانين ومافوق يوجد اهتزاز وعدم اريحية وليونة بالسياره فيه اصوات او حنة ماأدري اختلطت علي الأوضاع المهم الفني كان راكب معي ولاحظ هذا وقال يمكن عامود كردان فيه ميلان ولا خلينا نشيله وتجرب ربما يروح الإزعاج ، وجربت وللاسف لم يتغير الحال ورجعناه مرة اخرى لمكانه ، السياره الحقيقه البدي حقها نظيف جداً ومكينتها والله اعلم انها جيدة ، والقير الأتوماتيك لاحظت احياناً عند التعشيق لــ D انه ينتع قصدي يكون بد دفعة مندفع بقوة قليلاً وعند المشي بعد الغيار الاول او الثاني او الثالث (يتوقف ) لحظة او ثانية وكأنه على N ثم يعشق او يمسك ويستمر بالتغييرات الطبيعية !
اتمنى منكم ان تفيدونني هل هذه مشكلة كبيرة بالقير وماهو المتعطل به ؟
وكذلك لاحظت انها باردة جداً حتى في الظهر لاترتفع حرارتها إلا قليلاً جداً فوق الخط تكون باردة ربما يكون من قبلي شايل بلف الحراره هل تنصحونني بفكه وتركيب بلف حراره لأهميته ام اترك الأمور على حالها لاتنفتح علي ابواب بالحراره ومشاكلها وانا في غنى عنها بترك الحال على ماهو عليه ؟
وهل له علاقة براحة المكينة او الإهتزاز !!
وماهي الأجزاء بالسيارة ( غير كرسي الماكينة والقير ) التي لها علاقة بالإهتزاز وعدم الراحة والليونة بالقيادة ؟؟؟
علموني عنها بالتفصيل الممل لأكون على بينة امام فنيين الورش فلا يضحكون علي بتوقعاتهم وتخميناتهم وباسعارهم !!!
وهل بالإمكان التشحيم للركب والاذرعه والمقصات ام لايوجد مكان للتشحيم بها ؟ معليش اخوكم قديم واثري يسمع بالتشحيم ولايدري وين فيه ههههه
وماذا عن الجلَد او الربل الذي في المقصات والأذرعه والعكوس هل لها دور بالإهتزاز وبالراحة والليونة
وماذا عن اليايات هل لها دور ؟ لأن السياره كأني لاحظت انها مرتفعة قليلاً مقارنة بمثيلاتها التي مركب بها نفس مقاس الكفرات ؟
وعلى طاري الكفرات قال لي احد باعة الكفرات ان الكفرات مصعرره ربما لها دور بالإهتزاز وعدم الراحة رغم ان شكلها عادي مو متآكله او ممسوحة او بها بروز !
هل الكفرات لها دور إذا هي يابسه او مصعرره على قولته او الرجل يبيني اشتري منه ؟
وهل لو غيرت مقاس كفراتها ( 205 - 70 -15 ) بمقاس آخر يكون اعرض هل ترتاح السيارة وترسى وتكون اكثر اماناً في المنعطفات ام تتأثر ولايصلح لها إلا مقاسها لأنه بصراحه مقاسها لم اجده في الكفرات الشهيرة الجيدة مثل قود اير ، وبرجستون ، وبيرلي لم اجد مقاسها إلا نفس التي هي راكبة عليها يابانية اعتقد اسمها ننتون او شيء من هذا القبيل اتمنى منكم ياكرام ياخبراء ويا فاهمين ومن استاذنا الكريم فني سيارت الإجابة على اسئلتي واعذروني على كثرتها لأنني محتار ومتردد في امر هذه السياره التي منذ ان اشتريتها قبل شهر وانا لم اضع بها إلا بنزين متردد هل اصلحها ام ابيعها رغم ان البودي حقها ممتاز نظيف من الداخل والخارج ومكينتها ماشاء الله صوتها هادي ولا يطلع منها دخان او اصوات او صرصرة وعائلتي الصغيرة مبسوطة منها لنظافتها ولفساحتها وارتفاعها ماخذين راحتهم وخاصة اطفالي الذين وجدوا فسحة في الخلف !!
وقبل لا انسى إذا احد يعرف فني (مختص بالهوندا ) لديه ورشة بالرياض غير الوكاله ( الجشعين ) ان يعلمني بالغسم والعنوان
طولت عليكم سامحوني وارجو كل من لديه علم او اجابة على اسئلتي واستفسارتي ان يفيدني وله مني الدعاء ومن عائلتي بظهر الغيب
وفقني الله وإياكم لكل خير
ودمتم بخير
