في الفترة الأخيرة .. لقيت الي يباشر الحوادث ماهو مرور سيارة لونها أصفر سيدان

r3bob @user_118456 · 07-01-2009

كم حادث لقيت بالرياض والي يباشر الحادث سيارة لونها أصفر سيدان (اكسنت )

صاحب السيارة من الجنسية المصرية (( قلت يمكن شركة التأمين ))

بس لو انا مأمن بشركة والطرف الأخر بشركة آخرى ؟!!

أحد يفيدنا وش النظام الجديد لأجراءات الحوادث

تستغرب لما تشوف شيء .. وماسمعت عنة من قبل

والمرور ماله دخل بالموضوع ولا أيش السالفة

وش سالفة السيارة السيدان الصفراء ؟!!

meemoo.86 @user_223439 · 18-05-2010

سلاااام اخوااني
اعرررف الموضووع قديم .. بس حبيت اضييف شي
بحكم انه انا احد منسوبي شركه نجم ...

اولا للي يقوول موظف مصري .. او الي يقوول جايبيين عماله
جميع محققين نجم " المعاينين " سعوديين
وكذاللك العمليات وموظفات الكول سنتر " موظفات استقبال البلاغات " جميعهم سعوديات

وانا اذا افتخر بنجم افتخر انها محققه السعووده بالنسبه 95 % تقريباا اذا مو اكثر

طبعا نجم زي ماقالوا الي قببل شركه تخدم الاطراف المؤمنين وشركات التامين .. بشرط توفر تامين لاحد الاطراف

اذا سواال جاهزين اكيييد :)
بس هذي المداخله .. وعلى فكر دوريات نجم صني .. مو سيدان : S

زعيم نصف الارض @user_80996 · 24-01-2009

وين السعوده؟

احسن شي على كلامكم انهم يجون بسرعه ويخلصون الناس من الدوران على المرور والتامين والتقدير

د/غسيل @user_109704 · 17-01-2009

نعم شركة نجم.... (شركات لتوظيف الوافدين) ...تعم في مباشرة الحوادث شمال الرياض فقط بالوقت الحاضر..حتى يتم أنجاز تأشيرات العمالة الجديد وعند وصولها سوف تطبق على جميع أحياء الرياض والمناطق الاخرى..

GM_TAHOE @user_23867 · 10-01-2009

فعلا هذا النظام فعال ومميز

حيث تم تطبيقة في المنطقة الشرقيه كتجربه

وقريبا سيعمم على جميع مناطق المملكه

وبنسبه لمدينة الرياض

فــ شركة نجم تغطي بعض احياء الرياض وليس الرياض بأكملها حاليا

bilany2003 @user_19836 · 10-01-2009

حلو كذا بصراحة احلى

كتنتان @user_133959 · 09-01-2009

والله كويس
مايتاخر الواحد وينطق بالساعه والساعتين لين يجيي المررو

مشكووور يالغالي

الله يبعدنا وياكم عن الحوادث

تقبل تحياتي

كتنتان

r3bob @user_118456 صاحب الموضوع · 08-01-2009

تتصل عليهم مباشره او تتصل على المرور .. ماني متاكد الى الان

hhh777 @user_115160 · 08-01-2009

الحين ماصار المرور يبآشر الحادث ..

تدق على نجم : 920000560

ويجون يخططون الحادث وياخذون الاوراق وكل شي

وهم يتفاهمون مع التامين والمرور ..

النظام هذا طبق عندنا بالخبر بس مدري عن المناطق الثانيه ..

r3bob @user_118456 صاحب الموضوع · 08-01-2009

بحث عن موقع او معلومة مالقيت الا هذي من احد المنتديات ونقلتها بتعديل وتصريف

عشان يستفيد الجميع منها (( [COLOR=sienna]للأمانة منقول ))[/COLOR]

تم أقرار النظام الخاص بشركات التامين وتم منح 13 شركة تراخيص رسمية بالعمل في السعودية تبلورت فكرة بقيادة مدير شركة التعاونية للتامين سابقاً ومدير شركة نجم (الاستاذ موسي الربيعان) بإنشاء شركة تحت اسم (نجم) ، وتم دفع راس مالها من قبل كل شركات التامين اللي تم الترخيص لها.

الشركة هذي وبعد اخذ الموافقات الأزمة من الجهات الحكومية المختصة بيكون دورها الأساسي هو اخذ مكان المرور وشركات التأمين في ما يخص حوادث السيارات بكل جوانبها.

يعني مثلا:

- اذا لا قدر الله وحصل لك حادث مرور واتصلت على الرقم 993 و المخصص للحوادث المرورية فلي بيرد عليك هو رجال او سيدة بشكل لطيف ومهذب ويأخذ منك المعلومات المتعلقة بالحادث (الموظف او الموظفة هذي يتبعون لشركة نجم).

- بعد ما تنهى مكالمتك عبر الهاتف وتبلغ عن الحادث المفترض وفي الظروف العادية المفترض تجيك سيارة المرور بعد كم ساعة ، لكن اللي بيصير هو ان اللي بيجيك هو مندوب من شركة نجم في سيارة خاصة بالشركة و بملابس رسمية خاصة بالشركة وبدون ان يكون للمرور أي علاقة او تدخل في خلال 15 دقيقة كحد اقصى في الظروف العادية (بيكونون مندوين الشركة موزعين في شوارع المدينة اللي انت ساكن فيها وسياراتهم مجهزة بجهاز لاسلكي تجيهم بلاغات الحادث من غرفة عمليات الشركة فور اتصالك عليهم) ، الشخص هذا هو اللي بيقرر من يكون الخطاء عليه في الحادث و يسلم طرفي الحادث تقارير خاصة يراجع بموجبها كل طرف اقرب فرع لشركة نجم (في حال كان احد طرفي الحادث او اثنينهم غير مؤمنين فنا بشرح لكم النقطة هذي بعدين).

- عند مراجعتك لاقرب فرع لشركة نجم على مستوى السعودية بيكون في انتظاركم مندوبين من الشركة و بيعملون تقييم شامل لتلفيات سيارتك ويسلمونك تفويض تقوم بموجبة بإصلاح سيارتك عند أي ورشة تنتمى لفئة سيارتك (السيارات عند التأمين عليها بتكون مقسمة الى فئات حسب نوعها و موديلاها وما شابه ذلك و بتكون ورش الإصلاح ايضاً مقسمة الي فئات).

- عاد انت خذ التفويض اللي بيعطيه لك مندوب شركة نجم و ود سيارتك للورشة المناسبة وتابع أصلاحها بنفسك.

وهذي هي الخطة اللي بتقوم عليها الشركة ، طبعاً التفاصيل كثيرة و التخطيط طويل .

اعود للنقطة الخاصة بعدم وجود تامين مع احد طرفي الحادث او كلاهم ، في الحالة هذي و في المراحل الاولي بيتم استدعى المرور لمحاسبة المخطي في الحادث اذا كان غير مؤمن ، لكن القرار الخاص بمن يكون الخطى عليها بيكون بيد مندوب الشركة.

طبعاً المرور بيتولي الحوادث للغير مؤمنين في البدائية فقط لأنه بيتم وحسب الخطة المعمول بها عمل حمله مرورية مكثفة يتم فيها محاسبة الأشخاص الغير مؤمنين بالإضافة الي انه بيتم البدء في إصدار استمارات السيارات بمدة صلاحية سنة وحده بحيث ما يتم إصدار الاستمارة او تجديدها الا بوجود وثيقة تامين طرف ثالث كحد ادنا.

المشروع مثل ما انا قلت كبير جداً ولكنه ماهو جديد ، فعلى مستوى العالم يتم تطبيق نظام مشابه للشي هذا و اكثر لدرجة ان بعض الدول الغربية تسلم شركة مثل شركة نجم صلاحية اصدار استمارات السيارات و رخص القيادة ، و قد يكون هذا من ضمن خطط الشركة في المستقبل.

مميزات الشركة و الخدمات اللي يتقدمها للمواطنين اقدر اختصر بعضها كما يلي:

- اذا اتصل اللي صار عليها الحادث على الرقم 993 ما يحتاج يوصف موقعه لانه تم الاتفاق مع شركات الاتصالات المحلية بتحديد موقع الشخص المتصل بالضبط (يعني معاد يحتاج توصفون وين الحادث فيه).
- الشخص المؤمن يتعامل مع جهه وحده فقط في حال حصل عليها حادث لا قد الله (يعني معاد يحتاج تراجع المرور وبعدين تروح للصناعية وتقدر تلفيات سيارتك وبعدين تروح تقدر قطع الغيار وبعدين ترجع للمرور وتطالب بفلوسك او تروح تمرمط عند شركة التأمين)
- اذا فيه اصابات بشرية في حادث السيارة فموظفي شركة نجم هم اللي بينسقون بشكل مباشر مع الاسعاف و الاطفاء.
- مندوب شركة نجم وعند حضور السيارة المصدومة بيقوم بعمل كامل تكاليف الاصلاح من اجور يد وقطع غيار بشكل دقيق لانه بيشتغل على برنامج الّي مخزم فيه تكالف الاصلاح بالساعة بالاضافة الي ارتباط البرنامج باقسام قطع الغيار في وكالات السيارات.

- بيتم الغاء شي اسمه تقدير شيخ الدلالين وبيتم عمل كتيب موحد تكون فيه اسعار جميع السيارات بمختلف موديلاتها (انبسط يا راعي السيارة اللي قيمتها في السوق قليلة لانه اذا لاقدر الله وصار لك حادث معاد انت خايف شيخ الدلالين يخفس بقيمة موترك).

شركة نجم هي شركة مساهمة من قبل 13 شركة تامين حالية ، يعني ماهي حكومية

والشركة بيكون هدفها خدمة جميع الشركات المساهمة فيها بمقابل مادي محدد ، يعني مثلا كل حادث مرور تباشرة نجم تاخذ 100 ريال من شركة التامين الموامنة على السيارات اللي صاير عليها حادث.

اما اذا كان احد الاطراف في الحادث او كلهم غير مؤمنين فالمرور بيكون مسئول عن حجز الشخص المخطي ولا يطلعة من الحجز الا بكفالة او بدفع تكاليف اصلاح السيارة الاخرى ، وطبعاً الشي هذا بيكون فقط في البداية لان المرور وحسب الاتفاق لن يصدر او يجدد اي استمارة سيارة الا اذا قدم صاحب السيارة ورقة تثبت انه مؤمن عند احد الشركان المرخص لها ، ولان التامين سنوي فبيكون تجديد الاستمارة ايضاً سنوي ، وفيه فكرة انه يتم كتابة تاريخ انتهاء الاستمارة على لوحات السيارة بحيث يصيدون المرور اي واحد منتهية استمارته وبالطريقة هذي يضمنون انه ما يمشي من غير تامين.

سياره المستقبل @user_131247 · 07-01-2009

ايه نعم حسب اللي عرفته ان هي شركه اسمها نجم

وهي اللي تباشر الحادث بدل المرور لأنها شركه متعاقده مع المرور

يعني المرور يصير بس عليه الاجراءات الاخيره

لكن اللي يسوي تخطيط الحادث هو نجم ذولي

انا خويي صار له حادث وجوه يخططون الحادث نجم ذولي

لكن خويي ماعجبه تخطيط هالنجم لأنه دلخ شوي اللي جايه

خلا الغلط على خويي بنسبه 20% وعلى اللي غلطان عليه 80%

خويي قال انا معترض ولا ابي تخطيطك وراح للمرور والمرور خطط

له بنفسه وهو الغلط اصلا 100% على الثاني عاد قال المرور اي صادق

الغلط على الثاني هذي القصه باختصار وحسب معلوميتي

واسف على الاطاله

Viper_911 @user_24734 · 07-01-2009

ياشباب .. اللي اعرفه عن هذي السيارات ..
ان اسمها .. (( نجـــم )) , وهي تباشر بالحوادث بدال المرور ..,

بس وش طريقتها .. مدري؟!
انا صارلي حادث .. لكنـ جاني المرور مو هذي السيارهـ ..,

هذا اللي اعرفه عن السيارهـ سيدانـ الصفراء..!

M O A Y A D @user_15565 · 07-01-2009

.
.
.
اما سيارة سيدان ,,, وصفرا كمان !!!

ننتظر التفاصيل من اهل الخبرة !

فانتوم 1 @user_37290 · 07-01-2009

صحيح كلامك انا شفتها كذا مره واقفه عند حادث وبعد تدور في الحواري ياليت اللي يعرف عنهم يفيدنا

ابوراكان2006 @user_38024 · 07-01-2009

سمعت عنها

بس ما شفت للاسف

الله يكفينا شر الحوادث