السلام عليكم ورحمة الله وبركاته
يقولون خير الكلام ما قل ودل وانا بختصر التجربه بنقاط مميزات وعيوب << ما يبي يقول انه زول
جمس سييرا 2008 ماشي الحين 73 الف استخدامنا متوسط
طبعاً هو للوالد شاريه لأغراض البيت والاستخدامات الشاقه يعني سياره ثانوية الاستخدام. وانا واخوي نطقطق عليه احياناً من باب التغيير
كنا نمتلك قبله سييرا موديل 2004 لذلك يمكن يكون الكلام اغلبه مقارنه مع الجيل الجديد
المميزات
- قوه مرضيه واداءه افضل من القديم وتعليلي اتوقع لأن برمحة القير حق الجديد صار يحشر بالنمر مو مثل القديم يبدل اسرع وعشان كذا اداءه صار افضل اما المكينه نفسها لكني كسرت راسه بالازيرا حقتي 3.3 :)
- الراحه معقوله
- الثبات ممتاز لسياره بك اب كبيره وافضل من القديم
- وضعية الركوب والجلوس فيه ممتازه وسواقته ممتعه بشكل كبير وافضل من السابق بكثير
- صرفية الوقود ممتازه بحكم انه امريكي
- الجوده ممتازه واللي يعيبون في الامريكي مؤخرا انا اقولهم عيبو على السيارات الدخيله على الامريكي التي لا تملك الا الشعار الامريكي اما الامريكي الاصيل سياره اعتماديه وتكرف, طبعاً الجمس الجديد لاحظت في متانه عجيبه مع الشوارع المكسر والمطبات افضل من القديم
- صوت الاقزوزت رياضي وليس مزعج يعني طرب
- المسجل افضل من القديم وصوته اوضح واقوى
- الهدوء زي اي سياره بحجمها لكن افضل من القديم بشكل ملحوظ
- تكايه بالوسط عكس القديم
العيوب
- الكراسي صارت قاسيه شوي ورياضيه
- يفصل على 170
- عند الاستخدام القاسي يشرب بنزين
بس ما اشوف فيه عيوب بصراحه وابدعو في الامريكان وصار القديم ماله ذكرى بصراحه
المشاكل توها طلعت كم مشكله بسيطه في الشهر هذا
- القير صار يطلع صوت طقه مع كل تبديله مع انه ماشي تمام ولا فيه نتعات والتبديلات نفس ماهي بس المشكله الطقه الواضحه بصراحه وحتى اذا كان واقف وحطيته على الدي اسمع صوت طقه مرتفع مو عادي. مدري وش رأيي الخبراء
- اخوي غير السبير بعد ما بنشر الكفر ومن بعدها يطلع بالشاشه check tire monitring system يقصد نظام مراقبة الكفرات اذا في كفر منسم او زي كذا يحتاج تشييك والعلامه في الطبلون الصفرا صارت تومض.
انتهى الموضوع
