صيانة 20000 للاوبيروس؟؟

أخي الكريم الأسبوع الماضي عملت لسيارتي الأوبيروس 2009 صيانة عشرين ألف كيلو في الصيانة السريعة على طريق صلاح الدين ، بصراحة أنا ما كان ودي أوديها لأني توقعت تاخذ لها يوم كامل أو يومين ، لكن لما سمعت أنه في صيانة سريعة وديتها لهم علشان مسالة الضمان سمعت إنها تروح ، المهم وديتها لهم وهو محل ثلاث فتحات مثل محلات تغيير الزيوت موجود في محطة التسهيلات مقابل عقارية الستين، وخذوا يا أخي الكريم مبلغ 635 ريال بعد الخصم وساعة ونصف من الشغل ، والذي عملوه إنهم غيروا الزيت مع الفلتر ، وفلتر الهواء ،و فلتر المكيف ، وشدوا الجلنط وفحصوا عدة نقاط ، وسألتهم عن الضمان وهل لابد من عمل الصاينة بشكل دوري فذكر لي موظف الاستقبال أن الصيانة كل عشرة آلاف ضرورية وإلا سيلغى الضمان .
لكن سبحان الله ما تهنيت فيها وقبل يومين صار علي حادث بسبب واحد تجاوز غلط من اليمين وصدم سيارة أمامه ومن الصدمة اختل توازن سيارته ورجعت علي في المسار الأوسط وحذفتني على الجزيرة الوسطية والخطأ عليه بالكامل ، وطلعت عندي الأيرباقين وراحت الرفارف والصدام الأمامي .
وأنا الآن بدون سيارة ولا زلت أفتقدت الأوبيروس لكن الحمد لله إني طلعت سالم خاصة الحادث كان قوي فالحمد لله الذي لا يحمد على مكروه سواه.