[SIZE=5]بسم الله الرحمن الرحيم
السلام عليكم ورحمة الله وبركاته :
وبعد هذا تقرير لرحلتنا يوم الخميس الموافق 28 - 3 - 1432 هـ وكان اعضاء الرحله ثلاثه وهم ابو خالد وابو سعود ومحدثكم ، وقلنا نقوم برحله استكشافيه لمعرفة المنطقة وتحديد اجمل الاماكن فيها للمكشات فيها الايام القادمه بإذن الله وكانت الرحله من سعد ورضة المسعودية الى شعيب المسعودي ومن ثم الاتجاه عبر الطرق البرية الى روضة ام القطا شمال عن منطقة سعد ومن ثم الى بعض الفياض التي على الطريق وليس لها اسم اولها اسم بس لم يضهر عندي على القارمن وكانت مساحاتها صغيره بس هادئه وخاليه من كثرة الكشاته ثم الى وادي وثيلان وشعبان الخويش الاول والثاني ومن ثم الى منطقة خريم بالتجاه روضة خريم من جنوبها الى شمالها وكانت الرحله اغلبها مشي على السياره والوقوف فقط لتناول الوجبات وبشكل سريع .
وهنا يظهر مسار الخطه على الخريطه وهو بالون الاحمر وطبعاً المسافه لو بتكون على طريق الازفلت طريق الدمام السريع وخاصه للي جايين من المنطقة الشرقية رايح تكون من سعد الى مفرق رماح 60 كيلوا ثم من مفرق رماح الى خريم وروضة خريم 50 كيلوا يعني رايح تكون المسافه كامله 110 كيلوا بس من سعد الى خريم عن طريق البر تصبح المسافه تقريبا 20 الى 25 كيلوا حسب اتجاه الطريق البري بعضها في منحنيات ووعوره والبعض الاخر يسر وسهل وايضا فيه طريق ردميه بس يكون مع النفود تقريبا وحنا مارحنا معه مشينا مع الطرق المتفرقه وهذا بعد اخذ منا وقت زياده وحنا كنا متمشين كل محل نوقف فيه شوي بس طريق الردميه للي يبي يمشي على طوول ونحن قطعنا المسافه تقريبا في ساعه ونصف ولاكن كان اغلبها تمشيه وعلى مهل والمستعجل يستطيع قطعها في نصف ساعه ويفضل سياره مرتفعه وليس بالضروري تكون دفع رباعي المهم الارتفاع عن الارض وان شاء الله اني افدتكم بالوصف ونقل الطريق لكم على الوجه المطلوب .
اتركم مع الصور والصور عندي حوالي 350 صوره اخذت لكم منها تقريبا 100 صورة .
وهذي اول الصور صورة الخريطه ومسار الرحله يضهر بالون الاحمر .
تحميل العزبه من المساء والمتبقي حملته بعد صلاة الفجر مباشرة
بعد الخروج من مدينة الرياض على طريق الدمام السريع توقفنا للتزود بالوقود .
ويظهر خوياي الثلاثه لاعدمتهم ابو خالد وابو سعود ورفيق دروبي السفاري .
اثناء الطريق وابو سعود يقهوينا مرة فنجال ومره تمره على الطاير .
الوصول الى منطقة سعد وطبعا مع الكبري يسار لاهل الرياض ويمين لاهل الشرقية .
وبعد مافرقنا مشينا مسافه وبعدها جاتنا الردمية الموصله الى روضة المسعودية وهنا تظهر رمال ونفود الدهنا على يمينا وهي متصله معنا طول المسافه الى روضة خريم وخط الردميه على القارمن يمر عبرها .
اثناء الطريق الى الروضه
وهنا بداية دخولنا الروضه من جهتها الجنوبية وكانت الساعه حدود الثامنه والربع
بدينا نتجول وندور لنا محل على شان ننزل قهوتنا وفطورنا وبعدها نكمل رحلتنا .
مناظر من الروضه يمين ويسار ويظهر فيها الربيع ولاكن يظهر عليه الضماء الله يغيثه بالمطر .
وهنا قررنا التوقف للفطور .
فطورنا وقهوتنا الصبح جايبها معه ابو خالد كثر الله خيره وسلم الله يد سوتها واصلح لهم ذريتهم .
مافيه غير طاقه وسعرات حرارية تكفي يومين كامله ماشاء الله تبارك الله فطور متكامل بر وسمن وعسل وتمر الله يديمها علينا من نعمه ويرد كيد كل حاقد على وطنا الغالي في نحره .
الشباب باقي يفطرون اقول خلاص نبي نمشي ومافيه غير سوالف وضرب الخمس هههههههههه
جعله بالعافيه .
طبعا الصباح كان فيه شوي هواء وبرد خفيف .
[/SIZE]
يتبــــــــع
