كيف تشتري سيارة

موضوع مفيد خاصة للي يريد يشتري سيارة ،، الأسعار غالية عندنا في سلطنة عمان والوكالات نصب عيني عينك والمستعمل نادر تحصل نظيف ،،،الله كريم

مشكور وماقصرت

فعلا ، وعلى عكس مايتوقعه الكثير من الناس ، قرار شراء وإختيار السياراة من أصعب القرارت

مشكور على الموضوع

نقطة الميزانية نقطة مهمة , لان البعض مع اغراء الوكلات وكلام مندوبي المبيعات يضغط على نفسه ويرفع الميزانية للحصول على ميزات اضافية قد لا يكون بحاجتها فاعتقد ان من المهم اذا حددت ميزانية معينة مثلا بين 95 الى 100 الف ريال , من المهم ان تعتبرها خط احمر ولا تتجاوزها الا في اضيق الظروف

والله يوفق المقبلين على الشراء

أبو ميوري لاهنت
الله لا يهنيك نواف

الله يسلمك

بصراحة انا رأيي من رأي اخوي A.J.H يوم يقول لا تركز على اللي عاجب الناس وشف وش بيعجبك انت وحط لنفسك اسباب ترغبك في السيارة.شي صحي برضه انك تملك اكثر من خيار و تاخذ راحتك في اللي تبيه منها
المشكلة انني اقول لك كذا وانا نفسي مو عارف وش اختار لنفسي سيارة :a1120(86):. خلها على ربك بس

تسلم على المرور :bigggrin:

موضوع مميز و متعوب عليه
بارك الله بيك اخوي

معلومة مهمة مكررة : إياك تشتري السيارة من اول زيارة مهما كنت مضغوط او متحمس لشراء السيارة
معلومة مهمة مكررة 2#: تأكد من انك حصلت على متوسط سعر السيارة. او حتى افضل من كذا عرفت اقل سعر تقدر تجيب السيارة فيه.
معلومة مهمة مكررة 3#: لا تتحمس بزيادة وانت عند موظف المبيعات
- أي شي تتفقون عليه بخصوص السيارة لازم ينكتب مثل رقم الموديل و اي اضافات انت ممكن تطلبها
- اسأل لو كان على السيارة اي خصومات
- حاول ما تزيد مدة اللقاء عن نصف ساعة
- لو قالوا لك انهم الارخص في السوق توكد الاول بعدين ارجع لهم، محد بيقول لك لأ
- تذكر انك مو مجبور تشتري من عند شخص بذاته ، دور مصلحتك وين بالسوق ولا تشتري من باعة لحوحين الا لو بالفعل قدرت تتوصل معاهم الى سعر مرضي وبرضه مو من اول مرة ، استشير و ما خاب من استششار

وبكذا يكون الموضوع قد خلص مع امنياتي انكم تكونون استفدتم ومانبي من احد الا الدعاء "مع انه لو قال انه بيعطيني سيارة مانيب قايل لأ:bigggrin:"

الموضوع قابل لكل شي وما انحط الا للفائدة العامة
روابط مفيدة
مشرق-كيف تشتري سيارة
نصائح شراء سيارة"انجليزي"


الموضوع للكل عزيزي وبالعكس الموضوع للكل يطرح و يستفيد وهو ما راح يحقق غاياته الا بتعاون الاعضاء والا انا اصلا جاي هنا ضيف و بكمل ضيف :bigggrin:

اشكرك من اعماق قلبي على المشاركة و اتمنى نستفيد اكثر من خبرة الباقين

ما قبل استلام المفاتيح

مالي شوية وانا اتصفح الموقع و قريت من كذا عضوية عن اكتشاف مشاكل في السيارة مباشرة بعد استلام المفاتيح. انا رايح اتكلم عن الوكالات و اقول انهم يستلمون من الشركة المصنعة مبلغ لاجل تجهيز السيارة قبل تسليمها للزبون وهو من حقوقك كمشتري تخليهم يجربون لك السيارة ويجهزون لك كل شي في السيارة من زيوت و تنظيف و بنزين. بالعربي كل شي بحيث لمن تستلمها تستلمها وانت واثق ان السيارة 100% شغالة و تلمع جديدة.

المشكلة بعض الزباين الله يهديه طاير بالعجة و يبي الا يعني الا يسوق اليوم قبل بكره و بصراحة ما ينلام لو كان يحوش روحه كل هالفترة انه يشتري و خلاص خلص كل الاوراق اللازمة فيروح و السيارة ما اجري عليها الفحص الشامل ويتورط بكمين مشكلة و الجماعة فجأة غيروا رأيهم و صار هو الغلطان و اللي خرب السيارة و اللي يدفع حق التصليح. سلامات ؟!:a1120(121):
لو حصل هذا فعلا مدري بس اقترح فعلا انه يرفع قضية و يتربح من الوكلا الفاسدين عندنا. الله يوفقه بس برضه كان مفروض يصبر الين يتأكدون له من جودة السيارة

التفاوض مع موظف المبيعات

هذي لها استفراد خاص فيها لأنني تعبان حاليا و لأن اغلب الضحايا موجودين في هذي المنطقة . لها جية بعدين:bigggrin:

تأكد انك جهزت مبلغ السيارة او تسلفت قبل ما تدخل المعرض

اهم شي: اياك تشتري من اول زيارة مهما الح عليك البائع. هذي سيارة لك و للزمن و تحتاج تراجع قراراتك قبل ما تشتري

الحين انت خلاص تعرف كل شي عن السيارة اللي تبيها و هذا انجاز يدل على انك مستعد الآن للشراء. هل تملك الفلوس المطلوبة لشراء السيارة؟ ولا ناوي تطلب قرض من المعرض؟

اذا كنت ناوي تطلب الفلوس من المعرض فابشر، انت الآن امام اكبر نصبة حتتنصب عليك:bigggrin: . خذها و ذقها يا فالح لأنك رايح تكون قدام احد شيئين وكلهم اخس من بعض. يا اما البيع بالتقسيط، او التأجير المنتهي بالتمليك و كلهم اخس من بعض

خياراتك
الشراء كاش: هذا على الاغلب هو افضل احتمالاتك انك تحصل السيارة بافضل سعر متاح. كاشك بجيبك ولا بتشحذ احد من المعرض يكتب لك قرض ولا يتنغصب على اشياء اضافية تدفعها عشان تقدر تاخذ القرض اللي بتقعد تكد فيه مالا يقل عن سنتين غير الفوايد الي تكسر الظهر.

طيب ، ولنفترض انك ما معك فلوس تكفي و ترغب بالاقتراض لسبب او لآخر.
اولا و الاكثر اهمية ، اياك و القرض الموجود في المعرض لأنه اغلى بكثير من الموجود برا و بهوامش ربح تخليك تلعن ابو اليوم اللي قررت تشتري فيه سيارة. حاول تدور على بنوك بهوامش ربح اقل ، حاول تستلف من الاهل لو انت مازلت صغير والافضل بالمرة لو انك تجمع الفلوس خصيصا عشان تشتري كاش وتفك نفسك من هم الدين

التقسيط: تتذكر الدعايات الي تقول لك ان سيارتك اللي تبيها ب999 ريال في الشهر؟ 0% هامش ربح؟ انساها لسببين. أولا لابد انك تركز على الصورة الكبيرة واللي هي ان سعر السيارة بيزيد لحوالي الثلث وهذا شيء كارثي.ثانيا ال0% هامش ربح جنبه نجمه "*" تخلي ما يحصل عليه من سكان المملكة الا اقل من 7% والباقين بيشوفون نجوم الظهر مع هوامش الربح المولعة
الحل مع التقسيط: اقترض من اي بنك خارج المعرض يقدم قروض قليلة الفوائد ، اشترها كاش ، وقسط على القرض بدل السيارة

التأجير المنتهي بالتمليك:
يكفيك انه تظل السيارة باسم الشركة المؤجرة الين تدفع آخر ايجار بالضبط ، انحش من هذي النوعية من العروض اسلم لك واذا تبي تجربها تحتاج فعلا انك تعرف كل حرف و فاصلة في العقد. اخطر من ان اي شخص يجربه:smile:

هل تفضل تشتريها جديدة او مستعملة

ما ادري. انا اترك الفقرة هذي كاملة لاعضاء الموقع وفيهم البركة كلها

حاول تسعر السيارة من اكثر من مصدر

فايدة هالخطوة انك كلما سعرت اكثر كلما ظهرت لك الفوارق في الاسعار ، و الفايدة الثانية انك لو ما قدرت تشتريها من معرض لاي سبب كان تكون عارف انك تقدر تجيبها من مكان ثاني. وبالمرة يعني الهدف الثالث انك لو قدرت تحصل عرض حلو تقدر تخليه ورقة ضغط على التجار المنافسين انهم يعطونك السيارة اللي تبيها بنفس مبلغ العرض او اقل

بصراحة حاولت اسعر السيارات من النت لكن فشلت فشل عظيم:bigggrin:. مالك الا المبوبة و اخواتها لو تبي تدور اسعار حلوة لسيارتك واتمنى لو كان فيه شخص يقدر يقول لي كيف اقدر اعرف سعر سيارة و محد راضي يحط حتى التسعيرة على قزاز سيارتهم