السلام عليكم ورحمة الله
حياك الله يالغالي .. اول شئ , الله يبارك لك مقدماً و يبارك فيه و يبعد عنه العين :)
اول ماتستلم السيارة .. قبل ماتطلعها من الوكالة
افحصها من الخارج وشوف اذا كانت فيها حكات لا سمح الله حتى لو بسيطة و تأكد ان اللون واحد مافيه اختلاف بدرجته
يعني مافيه مكان فاتح و الثاني غامق + أفحص كفراتها و تأكد من سنة صنعها و انها حديثة
من الداخل تأكد من وجود الحاجات الأساسية مثل الطفاية و كتب السيارة و غيرها ..
و تأكد من نظافتها الداخلية و أن كان على مراتبها شئ مثل الوسخ لا سمح الله
و أنصحك قبل ان تفعل كل ماذكرت , اول شئ تسمي بالله و تشغلها و بعدين تفحصها و هي شغالة :)
اما بخصوص موعد تغيير الزيت و الفرامل و البنزين المناسب .. كلها تفيدك فيه الوكالة و راح يعطونك مواعيد للصيانة
اما بخصوص تركيب حماية للواجهة , البرقع حلو و يفيد
لكن فيه حماية للواجهة تجي مثل العازل و تقدر تركبه في الوكالة
اما مساكات الابواب و المرايا
انصحك في الكروم لـ المرايا و الشبك ايضاً , تقدر تطلبها اكسسوارات اضافية من الوكالة ..
تطلب منهم مساكات كروم + مرايا كروم + شبك LTZ
و هم يركبونها لك قبل ماتستلم سيارتك :)
اما أنك تسويها بنفس اللون , هذه تحتاج رش و لا أنصحك تصبغ سيارة موديل 2013
أنصحك تركب مساكات كروم افضل و أجمل
و طريقة التمرين , يقولون بعض الناس ان السيارات تجي اصلاً ممرنة ,
لكن أنت خلك على الشئ المضمون .. يعني مرن السيارة على يدك و ارتاح :)
و التمرين يكون من 1000 الى 2000 كم .. شرط أن لا تتعدى سرعة الـ 100 و أن تكون قيادتك هادئة على السيارة
اما نصائحي لك وش تركب على السيارة ..
أول ماتستلمها تركب لها تضليل خفيف جداً عازل حراري , يعني تقدر تشوف وش داخل السيارة
و من الداخل كانها ماتكون مضللة .. المهم أن يعزل حرارة الشمس ,
لا أنصحك بالتضليل لأني ما أحبه أبداً :bigggrin: .. لكن يكون أقل درجة يعني خفيف مرة و لا يكاد يوضح انه مضلل
و بعدين تركب لها حماية للأرضية بلاستيك فقط لـ الدعاسات الأرضية [ و أنتم بكرامة ] ..
و أي سؤال انا حاضر , و الشباب ماراح يقصرون معك أيضاً :)
اخوك سهيل
