كثير تطلع من بيتكم للشوارع .. تتمشى
وعلى الأغلب .. أكثر السيارات اللي بتقابلها بتكون من هويات مختلفة عنك تماما
ومن جنسيات فارقت بريق الحياة .. من أول لحظة شريت فيها سيارتك
وصار كل اللي حولك .. ما يعني لك شي !
وتتسائل !
هل عندهم اسم مكينة اسطورية يتغنى فيها العالم وينطرب كل ما سمعها ؟!
هل عندهم توحش امريكي مع فخامة ألمانية تنافس كل الشركات ؟!
وكم سباقات أصلا قدروا يفوزون فيها عالتوالي في ماضيهم .. والكودا هيمي موجودة لهم بالمرصاد ؟!
تتنفس الصعداء انك اخترت سيارة فخمة ورحبة جدا من الداخل
تخليك مسترخي ورايق لدرجة انك تفكر بمثل هـ الأفكار أصلا
وانت عارف لو انك راكب شي ثاني كان كل تفكيرك بيكون منصب على آلام أسفل الظهر !
.،
HEMI
عشان الحياة تحتاج للكثير من تخفيف المعاناة
عشان الحياة تحتاج انك تمشي وحبوب تخفيف الآلام معاك وين ما تروح
عشان الحياة صعبة ! ترهق تفكيرك وتتعب جسدك وتستنزف طاقاتك كل يوم
تحتاج لعلاج سريع المفعول \ قوي على الأحزان \ ومريح جدا للأعصاب
قوي بقوة تقدر بـ 500 حصان أو 395 حصان
سريع
ومريح براحة وتوازن الـ 5.7 لتر وهي تتمشى بين المدن
.،
HEMI
كثير يجهل الكلمة .. والأكثر يجهل معناها
الهيمي .. مو مجرد مكينة او مسمى ينحط على بودي السيارة عشان تهايط فيه !
الهيمي كلمة لها معاني أكثر عمق .. وأقل تعقيد
HEMI
الهيمي .. النصف دائرة
هذاك الجزء اللي يحرق فيه المحرك كل طاقاتك السلبية
الجزء اللي يسمح لك انك تدخل هوا بارد نظيف جديد ! ينعش حياتك
الجزء اللي يسمح لك تطرد كل العوادم المتبقية والعالقة .. براسك ! وبالنغمة اللي انت تحبها !!
HEMI
الهيمي .. النصف دائرة
اللي تقدر تميز أصحابها بمجرد ما تشوفهم وهم يسوقونها
ووجوهم كلها هيمي .. ابتسامة بنصف دائرة لفوق
HEMI
الهيمي .. النصف دائرة
اللي علمتك بأن هناك دائما طاقة خفية تقدر تولدها
علمتك تبحث ورى أدق التفاصيل .. عاشن تطلع من وراها حصان حصان
علمتك تحاول وتتجرأ وتجتهد .. تجرب مع غيرك قومات وقياس مستويات
علمتك كيف غيرك يفكر !
علمتك طعم الفوز ..
HEMI
الهيمي .. النصف دائرة
اللي كانت تاريخ في يوم من الأيام
وحاضر .. في وقتنا هذا
ومستقبل .. للأجيال القادمة .. تكبر وتتربي عليها
.،
HEMI
أورثتنا جميعا .. ومن العصور الأولى
حب .. وعشق رياضة السيارات
والبعض تعدا عشق الرياضة .. وأصبح يعشق السيارات بذاتها
ويقدر يحلف لك بأغلظ الأيمان ! بأنها مو مجرد جماد
لكن هي كائن يعج بالحياة !!
كائن .. ينفعل مع انفعالك \ تسمع زئير المكينة من آخر الدنيا
تيمنا فيك !
يحزن مع حزنك \ يظل يمشي بسرعة بطيئة بدون اي ازعاج
مراعاة لمشاعرك
ينطرب مع طربك !! \ يتراقص يمين ويسار ويغني
حبا لك !
واسأل .. أصحاب الهوى
لو يوم أعطوا السيارة لغيرهم يسوقونها لـ غرض او لـ ضرورة
بيقولون لك ان هـ الكائن .. راح مجبور وانك بتحس بانجباره وانكساره
الين يرجع لك .. وترجع ابتسامته العريضة
.،
كلنا نختلف في كثير أمور
لكن كلنا نتفق
بأن الهيمي هو الرمز الوحيد .. اللي يربطنا جميعا
.،
ويمكن انك ماتدري .. او غير مدرك الى الآن !
ان حياتك تدور .. نص دورة كاملة ! .. حول سيارتك
مهما كابرت ورفضت الفكرة حاليا
الا انك راح توصل لـ هالقرار .. في قرارة نفسك .. عاجلا أم آجلا
وتذكر !
بأن الحياة .. تحسب بمقدار الوناسة اللي تعيشها
وسيارتك .. هي بالضبط .. هذه الوناسة
وماني محتاج اثبت أي شي
ويكفي اني اقول .. ان يومك مستحيل يمر بدون .. السيارة
متى ما اقتنعت بهالمعلومة .. الحقيقة !
لازم ترجع معاي بالذاكرة للحظة الولادة .. ولادة عشقك !
ذيك اللحظات اللي كونت كمية مشاعر بداخلنا
للأسف نتجاهلها وننساها .. بمجرد ما نكمل مشوار حياتنا
ذيك اللحظة .. اللي كانت أول مرة تشوف فيها سيارتك
ذاك الاحساس .. اللي تملكك وقتها
ذيك اللحظة .. اللي قررت تشتري فيها السيارة .. مهما كان الثمن !!
ويوم سلمت كامل المبلغ .. واصبحت اقرب مما تتصور
ذيك اللحظة .. وانت رايح تستلم السيارة أخيرا
وانت تمشي وتشوفها من بعيد واقفة تنتظرك
وانت عارف انها لك انت وحدك !
ذيك اللحظة .. اللي فاجئت فيها اخوياك \ اهلك
وانت تشوف تعابير وجوههم متفاجئين \ مبسوطين لك !
وبعضهم مبسوط لنفسه اكثر انه اخيرا بيشخص بسيارة كشخة ههههه
ذيك اللحظة .. يوم كسرت الالف كيلو
وقررت تعطيها دعسة كاملة
والشعور اللي يتدفق وانت طاير
FREEDOM
HEMI .. IS JUST ANOTHER NAME FOR .. FREEDOM
.,
لا تخلي أبدا
عشقك للسيارات .. يقل !
لأ ن عشق السيارات مايتغير بتغير الزمان
بتتغير دراستك
بتتغير وظيفتك
بتتغير حياتك
بتتغير حتى زوجتك ههههه
لكن بيظل حب وعشق السيارات ثابت
بتعرف ان بعد عشرين سنة من الآن .. ان الله عطاك العمر
انها مو بس لفترة وتنتهي .. لكنها بتستمر معاك طول الحياة
ويكفيك فخر لما تصير جد بيوم من الأيام
وتجلس البزارين حولك
وتعطيهم من الرخيص بأنك كنت الذي والذي وأقوى واحد
وهم يسلكون لك خخخخ
بس وقتها بتكون عارف انك عشت حياة الهيمي To the MAXIMUM
عشتها للآآآآخر .. واستمتعت فيها للآآآآخر
منقول من عاشق الهيمي
يوجد تعديلات بسيطه
صدقوني الهيمي عشق
