المكينه تهتز اذا كنت واقف او ماشي + الحل

السلام عليكم

عندي لكزس IS300 موديل 2008 خليجي

غيرت البلاكات بسبب انها تطفي كثير واول ما شغلتها بعد ساعه وقفت باركن واعطيتها شوي ريس لحد ما وصل الاربي ام الى 4 فجاه صارت السياره ترج يعني تحس بهزة بالسياره وهي واقفه قلت اجرب وامشي ومشيت ونفس الشي

من حكم خبرتي في مشاكل السياره الرجه انواع

1- رجه اذا مشيت على سرعة 80 او 100 هذه ميزانيه للتواير
2- رجه اذا دعست بريك ( فرامل ) وانت ماشي بسرعه هذه الدرامات او الدسكات الصحن اللي يمسك فيه البريك
3- رجه اذا جيت دعست وانت ماشي واذا شلت رجلك عن دواسة البترول تروح اعرف ان هذا غالبا اكسلات ( او العكس بمسمى ثاني )

لكن انها ترج انا واقف وانا ماشي اول مره اشوفها

المهم رحة للكهربائي الهامور سوري فنان في مدينة العين فحص بالكمبيوتر وطلع عنده ثلاث مشاكل
كويلات ( عدد اثنين ) خربانين ( اللي تكون فوق البلاكات )
و حساس الدعسه او اير ماس

بدلتهم عنده و اختفت الرجه على طول

حبيت اشاركم المشكله لو واحد يوم من الايام واجهته المشكله يعرف حلها

تحياتي