تكلفة محل زينة سيارات

وعليكم السلام

حقيقة ماعندي خلفية عن التكلفة الاجمالية لهذي الاشياء

ممكن لو تسعر كل هذي الاشياء بمحلات الجملة

واعتقد الاغلبية التعاقد معك بالبيع المباشر لك بالجملة وانت تتصرف في بيعها كما يحلو لك

عندنا مثلا بالرياض اغلب حقين الجملة بشارع الغرابي ومحلات الزينة الي خارج منطقة الغرابي تشتري منهم

لكن مبدئيا قد أعتقد ان الفكرة ليست مربحة بمايكفي بالنسبة لي

أقصد ممكن فيه ربح لكن قد يكون ضئيل جدا

ليت تنوع شغلك وتصير متميز لأني متأكد ماراح يكون محلك هو الوحيد بنفس الشغلة

مثلا اهتم بتزويد اشياء قد لا تتواجد بمحلات الاخرى وماتحصلها إلا عندك

مثلا فحمات رياضية وهوبات رياضية, بواجي من شركات معروفة اطول عمر لسيارات المنتشرة في مدينتك

اصلاح الخدوش السيارات بالمواد اللازمة

بعض اللوازم البرية

لو تطلب مثلا اشياء من محلات كبيرة خاصة بالاكسسوارات واللوازم البرية غير متواجدة في مدينتك وتكون حصرية لك ويكون عليها طلب مثل لمبات السنارة حقت التكيات وماشابه, فرشات

شوف مثلا خذ لفة على مواقع أو تغطيات لمحلات هذي: العليان, الرماية, السنيدي, برق الحيا, القاضي للخيام, البرية للرحلات, محل 4500, عروق الشمال (هذا في بريدة), السليماني.

شوف الي ذكرته فوق أغلبها بالرياض

يبيلها دراسة علشان تشوف وش اكثر شيء الزبائن تبيه مو تجيبه وتبتلش به ما أحد شرى منه وتضيع فلوسك على الفاضي

هذا كمجرد أقتراح وشوف الي يعجبك وأدرس الموضوع اذا عجبك

عموما حاول تدور الاصلي اذا تدور شيء خاص للاكسسوارات أقصد بمايخص الأنوار والاشياء الكهربائية علشان ماتضر بسمعة المحل ولو ان التجاري هو الي يمشي دايم لكن بيضر بسمعة المحل