ناوي على باترول .. واحتاج مشورتكم

قبل لا تستعجل وتشتري السيارة ويمكن تندم

اخسر اولا 700 ريال او 1000 ريال وجرب السيارة

او رح فرع العيسى واطلب تجربة السيارة عندهم تجارب على 320 حصان و 400 حصان


الشى الثاني

انواع الباترول 2016 محركه 8 سلندر 320

‏1- XE استاندر فاضي مايصلح
‏2- SE-T1 فوق الاستاندر بدرجة يجي شاشة معلومات
‏3- SE-T2
‏4- SE-OPT-T2
‏5- SE بلاتينيوم


من SE-T2 لين البلاتينيوم تجي شاشة خرايط وانوار الواطي LED

كلهم جنط 18 معدى البلاتينيوم 20

‏SE-OPT-T2 و بلاتينيوم جلد داخلي بس البلاتينيوم خامته افضل

شيك على جي ام سي بتحصله ارخص اذا انت تفكره عائلي مهب بر


ومثل ماقالوا لك الاخوان خذ قرض وطلعه او طلع يوكن

بتطلع الفائدة اقل يمكن تحتاج الى المادة وتطير السيارة وغيره كثير


واطلب تجربة الباترول من العيسى قبل لا تشتريه يمكن يعجبك ويمكن لا


الله يكتب لك اللي فيه الخير

بيض الله وجهك الف الف شكر ، جواب كافي و وافي يعطيك الف عافية ماقصرت

الكاش ملك

خذ هذه النقاط في بالك :

1- موديل 2016 يجي 8 سلندر وخذ الدفعات الجديدة أبو مروحتين تبريد وافتح الكبوت وبتشوف المروحة الاضافية.
2- خذ الوارد السعودي او الخليجي ثم تأكد من الوكيل أنه يدخل بالضمان لأن بعض المعارض يجيب أردني وعراقي ثم يدخله من منفذ الامارات ويقول هذا مستورد خليجي وهو تدليس ولا يشمله الضمان.
3- موديل 2017 أبو 6 سلندر برأيي الشخصي ما أشتريه بريال هو ومكينته الضعيفة.
4- الكاش ملك لأن الأسعار في نزول حقيقي ..الباترول موديل 2015 نص فل كان ينباع بـ 204 ألف ريال ثم نزل الين 186 ألف برمضان والحين يصرفونه على 180 ريال سعودي..
5- احسن وكيل للباترول هو السعودي لأن السماعات تجي زيادة ونظام بوس. ومنها تريح راسك من سالفة الضمان ..والخليجي بعد طيب ولا به عيب..بس انا عيني على السعودي ثم الخليجي.

نصيحتي لك واللي أنا بسويه ..الكاش ملك ..
أنت الملك لأن الفلوس بيدك ..وكلها شهرين الى ثلاث .. بيصير كالتالي :

- ينزل موديل لاندكروزر 2017
- ينزل باترول 2017
- ينزل برادو 2017
- ينزل يوكن 2017 واحتمال ينزل القير بـ 8 تعشيقات.
- ينزل اكسبدشن 2017 ويمكن ينزل بشكل جديد.
- ينزل برادو لكزس 2017 ويمكن يتغير الشكل او لا.
- مخزون 2016 + السيولة تضعف بيد المواطن والحكومة.

يعني باختصار ... بنتظر شهرين الى ثلاث ..ثم أطب وأتخير ..يا اشتري جديد ..او تصيد مستعمل نظيف أخو الجديد بسعر رائع..

ولا تغرك الكلمات الرنانة .. مثل قولة هذي اخر دفعة ..وهذي مقطوعة من السوق ..وهذا خصم ما يتكرر ..في الاخير هذا حديد يخدمني ..واذا ما اشتريت الجديد ..خذ أخوه النظيف وبسعر يطيب الخاطر ..ولا أسمح للشريطي والمعارض يصرفها علي ...

لذلك أقول لك ..الكاش ملك ..لأنك انت الطرف الأقوى..و شفني انا حاط رجل على رجل جالس أتفرج عليهم ..الين أطب وأتخير السيارة اللي تبرد خاطري..

بالنسبة لطريقة الشراء :

- خذ قرض ..و لو تتسلف عليه شوي ..واشترها كاش..
بحسب لك حساب سريع وتقريبي ..نقول مثلا فائدة القرض 1.5 (واحد ونص بالمية) على خمس سنين لسيارة قيمتها 180 ألف ريال ..بيكون التالي :

- القرض بـ 180 ألف ..بتدفع قسط شهري 3225 ريال وبيطلع عليك الاجمالي 193500 ريال ..يعني أخذ البنك عليك فايدة حول 14 ألف ريال فقط ..والسيارة باسمك ..

أما تأجير منتهي بالتمليك...يا ويلك تاحذه ..واحذرك ..لا تقرب له ..ولا يضحكون عليك تأمين شامل..تراك انت تدفع التأمين ..والفايدة حقتهم نقول 9% ..يعني :

- السيارة بـ 180 ألف ريال ..بتدفع قسط شهري 3800 ريال..وبيطلع الاجمالي 228000 ريال + دفعة اخيرة كاش لا تقل عن 20 ألف ريال..يعني الشركة بتاخذ عليك ربح لا يقل عن 40 ألف ريال..والسيارة مو باسمك بعد ..بس أنت مستأجر..

وبالتوفيق يارب.

والسلام مسك الختام.

ما اعتقد فيها حرارة لان الدفعة الثانية نزلت بمروحة اظافية
وبالنسبة للشراء اقصاط الافضل زي ماقال الحبيب خذلك قرض واشترها كاش
الفئات SE مكينة 320 يجي بلاتنيوم و 2 و 1 افضلهم البلاتنيوم كاميزات
الفئات LE مكينة 400 يجي بلاتنيوم

وعليكم السلام .. نقدر نقول لك مبروك ههههههههه

السياره جباره ومنافسه جدا جدا .. الباترول ينقسم 2017 الى محركين ..

محرك 6 سلندر ب سعة 4.0 لتر ويتكون من 4 فئات:
Xe الاستاندر
Se1
Se2
Se3
Se Platinum

وعندك محرك 400 حصان وفئاته هي:
Le1
Le2
Le3
Le Platinum

طبعا الترتيب من الاقل مواصفات الى كامل المواصفات

لو حاب تاخذ 2016 SE بالمحرك القديم 8 سلندر .. تاكد انه من دفعات 2016 لا تاخذ من دفعات 2015 الي تكون فيه مروحه اضافية

مشكلة الحراره كانت في بعض الموديلات كان فيها عيب مصنعي في مروحة الكلتش وتم استبدالها على الضمان لااغلب الملاك الي واجهتهم هالمشكله

طيب ممكن اخي الكريم تفيدني بفئاتها الحالية عجزت اعرفها xe t2 t1 مدري ايش والله خريطة

ولو اخذت قرض كم الفائدة الي بتاخذها البنك تقريباً ؟