حرارة المكينة

يعني مافي طريقة اعرف بيها انه رووس المكينة رايحة؟؟؟|4|


طيب.. هل اذا كان الديلكو مفكوك الكهربه فيه الى الاخر تطلع الحرارة؟؟
وكمان هل اذا كلتش المروحة سار خفيف يضعف دفع طرمبة الموية؟؟؟!!!

على فكرة حتى وانا داعس في الخط الحرارة تطلع.. تسوي بطل وتعطيها .. تعطيك كمان حرارة ،،، انعل ابو العزم ياشيخ .. الواحد بكورولا يقعد احسن له،،

وعلى فكرة سيارتي في مكة صوتها مافي زية|4| .. تفريغة تقول حق طيارة (ماشاء الله)|1|.. لو دعست من جنب واحد افجعة،،لو شفتها او سمعتها يوم في مكة تعرف انها سيارتي المنحوسة.
طبعاً هذه الميزة الوحيدة وانت تسوقها لو شفت واحد من الشباب مسوي تفريغة تجي تفجعة وتمشي |6|

طيب تبغ تعرف اوكي...
جي تي اكس 87 مولف عليها محرك زد اكس 300 تيربو واحد بدون انتركولر من بلاده،مشكلة الحرارة في فتره انحلت ورجع مافي حرارة وبعدين طلعت فجأه ثاني مرة،،
مركب مرواح شفط كهرباء سوبارو كبيره عدد 2 من الداخل، ومن برا مركب مروحة مرسيدس جديدة مررة قوية (دفع هواء) ومركب كمان كلتش مروحة، وكان لديتر نحاس من زمان بدلته بألومنيوم ((جديد))...
طبعاً تسأل عن طرمبه الموية اذا كانت كويسة ولا لأ.. في لديتر قبل هذا ركبته بس دعستين بنزين فجرت طبة اللديتر.. يعني مالك هرجة على الطرمبة،، كلتش المروحة ثقيل واصله ما يحتاج كلتش مروحة لأني مركب 3 مراوح كهرباء زي ما قلت بكتاوت يعني قوة المرواح مالك كلام عليها..
الموية كاملة وما تنقص ومركب قربة موية وغطا اللديتر جديدة والبلف حق الغطا كويس جربته، طبعاً بلف الحرارة حق المكينة فاصل ابوه يعني الموية ما شية بإستمرار،
خراطيش موية جديدة مافيها تهريب.. والله انا مشتغل السيارة بيدي الحاجات الجديدة هذي.. يعني عارف ايش فيها من بلا...
وكمان تسألني عن الحرارة كيف تطلع
شوف حبيبي :
اخلي السيارة شغاله تطلع الحرارة نص يعني فوق 50 درجة مؤسة في يعني 3 دقائق يعني حولها.. تمشي بالسيارة تطلع زيادة، دوبك ماش تطلع فل ، تنعل ابو السيارة بدعسة قوية كذا تنزل شوية وترجع تطلع كمان ،، شوية كذا الحرارة فل.. يعني حق 4 أو 5 كيلو الحرارة فل..فل يعني فل.. والله امس وصلت البيت بالعتيبية بعد ما وقفتها مانت درجة الحرارة 150 درجة مئوية او اكثر والسيارة مولعة.. فكيت الكبوت وقلت شكله اللديتر حينفجر.. والله وانا اطالع القربة انكسرت فكيت غطا القربة تقول نافورة من بلف القربة...بس شوية اسمع صوت انفجار كذا وطلع الخرطوش الي تحت انفك وكان موجه على رجولي واكلت شوية تسليخ في الرجلين وسرت انقز والناس يطالعو فيا... على العموم الحمدلله بخير انا الان.. بس يوم واحد كنت مرمي في البيت ما اقدر امشي،كان امس،، ههههاي

طبعاً تسأل اذا كان امبير الحرارة صادق ولا لأ، طبعاً صادق لاني جبت عداد حرارة خارجي وقارنت اذا كان العداد يجيب قراية صحيحة ولا لأ..

والله انا الحمدلله عارفانها السيارة مصقوعة عين لكن ربي يعوضني، لأنه المصايب ورا بعض،وانصدمت وسويتها وخليها على ربك،
بس اخر شي دحين طلعت الحرارة كل يوم (ترا كل يوم في حرارة فوق ال 75 الى 90) بس الايام الاخيرة فل الفل...

انا ماني شايف نفسي باقي شي ماجربته، كله سويتة.. وامس حلفت اني معد اركب السيارة خلاص حأبيعها تشليح بعد خسارة اكثر من 30 الف..

على العموم .. في مثل يقول يحسدوا الاعمى على كبر عيونه....

ها شباب تعتقدوا المكينه رايحة...خلاص انا مافيا افكر زيادة .. وذا الرؤوس رايحة.. كيف اعرف انها رايحة..
السيارة ما تخلط موية وزيت..

وترا الحرارة تطلع سريييييييع..
تحياتي
عبادي