صباح / مساء الخير
قبل فترة بسيطة وضعت موضوع في المنتدى
عن المازدا 6 الجديدة .. وبصراحة بعد ما شفتها بالوكالة بالتغييرات الرائعة اللي حصلت لها
وعملية شد الوجه واضافة ميزات ممتازة .. ما هدا لي بال لين ما حصلت لي تجربة قيادة مساء يوم أمس الاثنين
السيارة يملكها أحد الزملاء الأعزاء ,,
موديل 2006 .. هاتشباك .. فل أوبشن + بودي كت + زينون
السيارة كشكل من برا غييييييير بصراحة عن موديل 2005 ,,
شكلها خارجيا سبورت وساخن .. تحسها سيارة غير عادية |1|
خصوصا مع الزينون ,,
والجنوط ال 17 الشكل الجديد .. اللي تذكرني بشكل جنوط الأستون مارتن ,,
راح أذكر مواصفات السيارة باختصار ,,
- مقاعد جلد
- مقعد السائق كهربائي بالكامل مع ذاكرة حفظ لثلاث وضعيات
- عدادات LED بلون أحمر
- كمبيوتر معلومات عن السيارة
- نظام صوتي متميز كاسيت وسي دي 6 أسطوانات
- مثبت سرعة مع تحكم بالنظام الصوتي من المقود
- قير اوتوماتيكي ب 5 سرعات تيبترونيك ( مع توفر ناقل يدوي ب 6 سرعات )
- ديكور خشبي
- فتحة سقف
- السيارة تتوفر بوسادتين هوائيتين للسائق والراكب الأمامي
- نظام ABS مع EBD ووجود نظام التحكم بالجر TCS
- مكيف الكتروني بالكامل
- مقود ملبس بالجلد
- ريموت كنترول ( شكله خطير بصراحة )
- أول ما ركبت السيارة .. لفت نظري المقاعد الرياضية الجديدة ذات التصميم المختلف عن موديل 2005
وان كانت قاسية نوعا ما .. لكنها ككل توفر اسناد ممتاز للجسم ..
- عدادات ال LED توفر اضاءة راااائعة بصراحة وجهورية وقوية بلون أحمر رياضي ,,
- من ناحية الطبلون تغير قليلا .. وصارت فيه ديكورات خشبية بلون غامق لكنه لايق عالسيارة ,,
- السيارة كانت بقير اوتوماتيكي ب 5 سرعات مزود بتقنية التيبترونيك .. وشكل القير جميل وانسيابي ..
بالنسبة للتجربة .. فأنا عن نفسي سويت فيها تيست درايف ماهو صاحي :D
هذا غير تجربة زميلي .. وكان ما شاء الله عليه يتمتع بحرفية في القيادة رائعة ..
راح أذكر ملاحظاتي عالسيارة (الرئيسية )
أولا .. دعسة السيارة وقومتها واستجابتها مدهشة بصراحة !!
ما توقعتها أبد كذا !! خصوصا انها بقير اوتوماتيكي .. وانا متأكد بنسبة 100%
لا أكورد .. لا كامري .. لا سوناتا .. مزودة بقير اوتو .. راح تمسك معها خصوصا في القومة ..
أنا حتى الحين ماني متخيل كيف راح يكون آداء القير ال 6 نمر العادي !!
ثانيا .. معلومات عن المحرك ,,
تمتاز بمحرك حيوي بصراحة .. سعة 2.3 لتر وبقوة 175 حصان
وسمعت ان قوته ازدادت وتحسنت لموديلات 2006 .. لكني ما تأكدت من هذي المعلومة ..
وبالنسبة للعزم .. فهو متوفر عالسرعات المنخفضة بشكل مطلوب وجيد جدا ,,
ثالثا .. القير ,,
بالنسبة للقير فهو أهم أوراق السيارة الرابحة
ساهم بنسبة كبيرة في متعة القيادة !!
خصوصا اني اذا حولته للتيبترونيك .. ما يعشق من نفسه اذا وصل الظغط الى 6 .. وتبقى السيارة تفتف
واذا عطيتها زيادة نمرة تفز معاك بقوة .. متعة التيبترونيك انا أشوفها مثل متعة العادي بالظبط !!
على عكس سيارات ثانية مثل السوناتا أو الكرايسلر 300 سي ..
اذا حولته للتيبترونيك ووصل الظغط الى 6 عشق القير ولا شاورك :(
رابعا .. الثبات
بالنسبة لثبات المازدا .. انا كنت متوقع من قبل انها راح تكون من أثبت السيارات بفئتها ,,
خصوصا انها لا تعاني من ارتفاع .. والسيارة نازلة ..
ومتوفرة أيضا بنظام التراكشن TSC وأقدر ألغيه عند الطلب ,,
بديت أجرب ثبات السيارة بعد دوار المطار القديم بشارع الملك عبدالعزيز ,,
الشارع الطويل اللي بعد الدوار فيه منحنيات خطيرة شوي :D
أكيد انكم كلكم تعرفون الشارع ,,
دخلت فيه بسرعة قوية 150 كيلو ,,
وبصراحة السيارة أبهرتني !!
ثبات والتصاق بالأرض عجيب على سيارة بفئتها ,,
بالنسبة لهذا الشارع فاني أدخل فيه بالسوناتا على سرعة 120 وأخاف ورجلي تكون عند الفرامل !!
أحد أصحاب الأكورد على ذمته .. انه يدخل الشارع على سرعة 130 بحد أقصى ولا يتجاوزها ..
لكن ان تدخل بسرعة 150 بكل ثقة .. فاعتقد ان هذي النقطة يجب الوقوف عندها طويلا !!
السيارة أحذف فيها حذفات قوية على سرعات متوسطة ما تتزحزح من مكانها ما شاء الله !!
لكن ان ألغيت نظام ال TCS .. فانك راح تتمتع بمستوى انحراف ممتع :D
خصوصا مع اللفات ..
عموما رأيي باختصار ان السيارة تتمتع بمستوى ثبات متفوق هو الأفضل في فئته ( السوبارو والأكورد المزودة بنظام ال TCS خارج النقاش لأني ما جربتها )
خامسا .. الراحة والعازولية
بالنسبة لراحة المقاعد فهي قاسية نوعا ما .. لكن أتوقع السبب لأنها رياضية !
نظام تعليق السيارة قاسي أيضا خصوصا مع المطبات .. لكن يهون هالشي اذا عرفت مقدار ثبات السيارة ,,
والسلبية هذي ما أشوف انها ما تأثر بشكل كبير وغير مهمة بوجهة نظري !
وبالنسبة لعازولية الصوت فانا أشوفها ممتازة ,, ولا يوجد أي شي يعيبها ,,
ما حسيت بتنسيم أو أي ازعاج
_ _ _ _ _ _ _ _ _ _ _ _ _ _ _ _ _ _
وأخيرا راح أذكر ايجابيات السيارة وعيوبها باختصار ,,
أولا .. الايجابيات
- آداء المحرك مرضي جدا
- القير كان رائع بتعشيقاته وسلاسته وممتع اذا تم تحويله للوضعية الرياضية
- ثبات متفوق وملفت للنظر
- تصميم المقصورة جميل جدا ومنسق وما تحس أبدا ان فيه شي غلط .. والمواد المستخدة ذات جودة عالية
- توفر مواصفات عالية بالسيارة مع سعر منافس .. السياراة بكامل المواصفات بسعر 75 ألف ريال ( بدون زينون أو بودي كت )
ثانيا .. السلبيات
- اللون الأسود لداخلية السيارة كئيب .. والجلد البيج لا يتوفر الا مع الطراز الهاتشباك وبسعر مبالغ فيه !
- السيارة تنقصها الرحابة نوعا ما
- قساوة المقاعد
_ _ _ _ _ _ _ _ _ _ _ _
بالنهاية ,, انطباعي الشخصي عن السيارة كان رائع ,,
وفيها متعة قيادة غريبة ما تحسها الا بالبلايستيشن :D
ومن أروع السيارات المتوسطة بوجهة نظري ,,
مازدا 6 .. اسم يستحق الاحترام كثيرا .. ويستحق التصفيق أكثر
... اذا فيه أي أسئلة أو ملاحظات تفضلو فيها ...
مع تحياتي لكم ,, أخوكم حارش
