هل تعطلت سيارتك وصلحتها بنفسك أو بأقل الخساير (شاركنا بتجربتك )

السلام عليكم

تفاعل رائع ياشباب الله يعطيكم العافية

اشكركم على حرصكم على طرح تجاربكم وافادة اخوانكم منها

وفي انتظار المزيد

انا سيارتى تيوتا برادو وفى البرادو حاجه جدا مهمه وهو عداد الكيلومترات المتبقية حتى يفرغ خزان البنزين , حيث اذا قمت بتعبأة السيارة بالبنزين بشكل كامل يعطينى العداد رقم 990 ويبدأ بالتناقص عند السير بالسيارة بمعدل قيمة واحده لكل 20 ثانية " عند سرعة 120 كم.

وقد انقذنى هذا العداد من تلف المكينه ربما تسؤلون كيف؟؟؟
بالامس قمت بتبديل زيت المكينه فقام البنقالى الغبى بتعباة الزيت اربع لترات بدلا من خمس لترات, وقد نسيت انا ان سيارتى تستهلك 5 لترات زيت ,
وفى اليوم التالى خرجت بسيارتى للسفر وفى الطريق لاحظت ان العداد المذكور يتناقص بمعدل اسرع من العادة اى ينقص رقم واحد كل 5 ثوان وليس كل عشرين ثانية عند سرعه 120 , فتذكرت انى البارحة غيرت الزيت 4 لترات فقمت بالتوجه الى اقرب محطه واظفت لترا اظافيا من الزيت والحمدلله رجع معدل استهلاك الوقود الى الطبيعى . سبحان الله لولا الله ثم هذا العداد لما كنت اشعر بهذا التناقص الشديد ولتلفت المكينه او على الاقل ينقص عمرها الافتراضى

السلام عليكم

قريبي عنده كامري موديل 2004

فجأه وهو ماشي في الطريق المكيف صار يطلع هوا حار , ورحنا لميكانيكي هندي قال المشكله في الدينمو حق المكيف المهم يقول غير ( الصوفه ) , وقال مره هذي مشكلة من الصوفه ... رحنا بعده لواحد يمني الله لايوفقه قال لازم نفك الدينمو ونطلع الصوفه ونغيرها وقام يتفلسف يبغى يورينا ان المشكله صعبه والحساب كله وصله 600 تقريبا .. تركناه ورحنا لواحد ثاني وقال برضه المشكله من الصوفه... المهم قلنا نشوف اكثر من واحد

في الاخير وقفنا عند ميكانيكي بنقالي قلنا له ان الهوا حار حق المكيف واذا وقفت السياره وهي شغاله ترتفع حرارتها
ونتوقع انه الصوفه .. قال ابو بنقل افتح الكبوت وجلس يطالع في المكينه ويقول شغل المكيف وقفله .. وقال المشكله من المروحه ماتشتغل ... طبعا الكامري فيها مروحتين المروحيه اللي عاليمين طلعت ماتشتغل .. وبدلنا الدينمو حق المروحه بواحد اصلي وعبينا الفريون وطلعت التكلفه 400 تقريبا


ياشباب من جد انتهبو

فى يوم شديد الحرارة وانا اسير بسيارتى فى العاصمة وفجأة ارتفعت الحراره والحمدلله انى لاحظتها بسرعه توقفت وفتحت غطاء السيارة , فوجدت هوز الماء العلوى الخارج من المكينه الى الراديتر مشقوق تقريبا بطول عشرة سنتمترات واتثر الماء , فأخذت افكر بهالمشكله والتفت يمينا ويسارا فوجدت مبنى عمارة غير مكتمله فذهبت وحصلت على سيم "سلك طويل" فقمت بتخييط الشق بهذا السلك ومن ثم احضرت بعض الاسمنت من المبنى وخلطه بالماء ومن ثم سكرت الفتحه واشتريت من البقاله تيب بلاستك ولففتها على الهوز ثم ملات السيارة بالماء والحمدلله لم ترتفع الحراره وانتهت المشكله.

فعلا موضوع مميز اشكرك على الفكره
امس عملت فحص كمبيوتر للماركيز لاعرف سبب الاهتزاز عند الوقوف والقير معشق اما على النيوترن ممتاز فقال لي كرسي الماكينه لازم يتغير بعد دفع 250 ريال طبعا ومشان يحلل مصرياتو زاد عليهم كم عطل الله يجزيه خير اليوم رحت لورشة الشام بالصناعيه القديمه بعد المعاينه قال اذا فلوسك زياده بغيرو زي ما بدك اما مش هذه مشكلتك المشكله في الكويلات رحت جبت طقم ب 480 ريال صناعه سويديه نفس تبع الشركه بس الكرتونه مش مزوقه يعني الحبه ب 60 ريال والحمد لله راحت الرجه وهديت السياره وعزمها تحسن والحمد لله والله عالظالم

السلام عليكم ورحمة الله وبركاته

في مرة جاني صديق اشترى سيارة نوع دودج انتربد موديل 1996 وشراها بسعر رخيص جدا عشان فيها عطل في القير مايبدل نهائيا يعني يبدل اول تبدياة وخلاص وماتمشي الا خمسين كيلو بالساعة بس
لف فيها على كثير من المصلحين واخر شي نصحوه يغير القير كله
اجاني وهو محتار وقلتله اقعد وعلى ماتشرب الشاهي حقك تكون السيارة بتطير باذن الله
على طول رحت للتوصيلات حقة القير وشلت منها المطاطة حقة التراب ووصلتها مرة ثانية والسيارة للحين تسمع صوتكم ماشالله عليها
والطريف ان اخوي الي شراها منه

وشكرا للموضوع اخوي صالح

السياره كراون فكتوريا 99

المهم ان البنزين كان معلق عندي وبعد كذاء غيرت

الحساس (بلف الهواء ) اللي فوق الثلاجه جهة الديكور الداخلي والحمد لله انحلت المشكله

وأغلب أعطال السياره افحصها

مثل
الكويلات والبواجي

أغلب أعطال الفورد اعرفها
من كثر مامرت على ههههههههههههه:bigggrin:

حبيت اشاركم باللي عندي.

السياره :هوندا سيفك 1997 كوبيه.
المكينه h22a
اغلب الاعطال اللي واجهتها كانت في الكهربه.بسبب بدايه التأسيس في الظفيره كان شغل اي كلام..
""
الديلكو عندي كان فيه مشكله والسياره ما اشتغلت ..
الحل.
وصلت سلك كهربه صغير من مقوي الديلكو الى الفيش اللي مشبوك فيه اسلاك الديلكو.
والحمد لله السياره من يومها شغاله زي الحلاوه.
..
****
معلومه لاصحاب السيفكات القديمه..
****
اللي يبغى يركب هوبات خلفيه..
كل اللي عليه..
يروح للتشليح.
ويشتري اذرعه وهوبات والبار اللي في النص يشتري تبع هوندا انتيقرا 94 وفوق.
الاذرعه الخلفيه كامله بكل شي بهوباتها بفراملها..اعتقد تطلع عليه ب 800 او 1000 ريال اذا صكتها الحمى.

انا حصلت لى مشكلة صغيرة ولم يعرفها احد حتنى اكتشفتها بنفسى وهى سيارة وبها صوت بالخلف داخل الشنطة ولفيت كتير على الصنيعية وفى الاخر اكتشفت ان مسمار المساعد الخلفى مكسور من الداخل

السلام عليكم ورحمة الله وبركاته موضوع جميل جدا ويستحق التقييم
انا معي تيرسل 97 رحت لمجمع الورش اللي بالقبلتين فمريت اكثر من ميكانيكي لأن السيارة كان مبوشة وانا وقتها ماكنت اعرف كيف يكون التبويش المهم قالي الاول هذا يبغالها غسيل واصلاح كربوريتر ويسير ميه ميه قلت طيب واروح للثاني يقول لي مايحتاج غسيل كربوريتر هذا يحتاج شمبر بس ميتين ريال اللي يقهر كل ماجبتها لواحد يسوي انه خبرة وبالفطرة يعرف اخر شي وديتها للتركي اللي عند محطة القبلتين وقالي ان السيارة مبوشها واي واحد يعرف انها مبوشة واللي قاهرني الميكانكيين اللي جيتهم على ويش يتفلسفون معقولة مانتبهوا انها مبوشة ولا بس يبون يخسروني فلوس حسبي الله عليهم سويتها نص توضيب وجات زي الفل معي الى الان

سلام عليكم

انا حصلت لي مشكله في اللومينا 2002
كانت كل ما اشغل المكيف تطفي ,, اطفي المكيف تشتغل بس مو صافيه لما امشي فيها تنخنق السياره و تحس انها رح تطفي و لما ادعس بترول تزيد بالانخناق و ما تمشي
المهم وديتها الكراجات و افحصها بالكمبيوتر الكل يقول ما فيها شي رحت اكثر من 5 كراجات و كلهم يقولوا نفس الشي
بالاخير قلت مالي غير الوكاله وديتها الوكاله و نفس الشي ما عرفوا شو المشكله بالتحديد قالولي الكمبيوتر خربان لازم تبدل الكمبيوتر واللومينا لازم لما تبدل الكمبيوتر تبدل معه بعد قطعه ثانيه تجيك فوق المكينه عند فتحات المشاش تحت الغطا
قلت لا ما ببدل شي
رحت عند البيت و مسكت الاسلاك واحد واحد صرت اجرب فيشه فيشه اشيلها اذا صار اختلاف يكون من القطعه اللي راكبه فيها الفيشه
ظليت وراها لحد ما عرفت المشكله
و طلعت المشكله هي السينسور حق فلتر الهوا في باللومينا هوز الهوا اللي واصل من علبة الفلتر لبرا في بالنص سينسور المنيوم في سلك صغير مثل سلك الفيوز هذا كان مقطوع و فاصل غيرت هذي القطعه و رجعت السياره 100%


تقبلوا تحياتي

اطرح استفسارك بموضوع لوحده بقسم الورشه لتجد الحل .

بعد جهد جهيد وعمل 4 أشهر تمكنا انا ومجموعه من الشباب الحلوين (2 ) من رمي مكينة السياره في الزباله ( D15Y2 ) خخخ واستبدالها بي ( K24A1 ) والسياره اشتغلت وكلو 100% وحاليا قاعدين نبرمج ونفك الطبلون عشان نبي نخفف بعض الاوزان الزائده عن الحاجه .
7
7
7
7
7

الله يجزااكم خير
استفدت صراحه

حدث في سيارة الوالد فكس آر موديل 91 قبل سنوات طبعا لكن ما يمنع الاستفادة
دايم يتفتف وفجأة يطف يعني لازم تدعسله عشان ما ينطفي أنواع التويهقه في اللفات راح للوكالة تخيل أنهم قالوا عندك
1ـ راس المكينة
2ـ الديلكو
3ـ الكلبيتر
4ـ أسلاك البواجي
ما بقى إلا يقولون المكينة والقير مخبطة
طلعنا لورشة عادية وبالصدفة توفقنا في واحد زين توقع وش طلع

إبرة وزنية الهواء في الكلبيتر مكسورة وتم تصليحها بـــ 15 ريال

فلا تصدق الوكالات

[COLOR=Red]مشكله وكيف كان حلها :

عند تغيير عصا القير من D الى R , كان يسمع صوت طقّه .

اكثر من ميكانيكي قالو انها مشكله بالعكس ال AXEL .

تم معاينة السياره لدى ميكانيكي اخر وتبيّن ان الخلل
بان صامولة العكس التي تكون راكبه على الكفر من الخارج
كانت غير مشدوده جيدا .[/COLOR]

مشكوور اخووي صآلح ||~

كان عندي كابريس 90 وكنت مسافر فيه للحج وعند الميقات ذهبت للأغتسال ولبس الاحرام وحينما جيت اشغل السيارة لم تشتغل تدق سلف ولكن ما تشتغل ودعوت ربي ان تشتغل والحمد لله اشتغلت وذهبت لمكة ووضعت السيارة في مواقف حجز سيارات الحجيج وبعد الانتهاء من الحج ذهبت للسيارة في المواقف وكنت خائف انها لا تشتغل ولكم الحمد لله اشتغلت ووصلتني للرياض بعد الدعاء والحمد لله وبعد وصولي بيومين عادت مشكلة انها ما تشتغل وقلت الحمد لله انها وصلتني للرياض ووديت السيارة للميكانيكي وبعد الفحص قال طرمبة البنزين خربانة واشتريت طرمبة بنزين جديده وبعد التركيب لم تشتغل السيارة وقال الميكانيكي الطرمبة اللي انت جبتها ما تشتغل انا قلت هات ارجعها او استبدلها وفعلاً استبدلت طرمبة البنزين وركبتها واشتغلت السيارة وعلى سبيل الاحتياط احتفظت بالطرمبة القديمة وبعد 3 ساعات عادت نفس المشكلة لم تشتغل السيارة وبعد فترة اشتغلت ورحت لكم كهربائي وفحصو كل شيء ولم يعرفو سبب المشكلة وقالي واحد منهم ما يحلها الا فلان وكان سوري وبعد الفحص وتتبع اسلاك الكهرب التابعة لطرمبة البنزين وجدو فيش كهرب يعتبر توصيله لسلك طرمبة البنزين داخل الشنطة في الرفرف الخلفي الايسر غرقان زيت !!! ههههههههههههه
وهذا سبب ان السيارة مرة تشتغل ومرة لا ، وتذكرت اني حاط علبتين جديده زيت مكينة على سبيل الاحتياط اذا نقص زيت المكينة ولكن حرارة جو الرياض فكت العلبتين على الاسلاك وعلى جانب الشنطة من زمان ومن كثر اغراض الشنطة ما بين شيء لأن الزيت منفك من شهور وانا قليل استخدامي للشنطة وتم قطع الفيش وتوصيل اسلاك جديده بدلاً من الفيش الغرقان بالزيت الجاف هههههههههههه والحمد لله انتهت مشكلة السيارة 0 تحياتي للجميع