...:::الحيره ذبحتني....جيب ربع2006:::...

ولد البراري @user_25286 · 21-01-2006

السلام عليكم ورحمة الله وبركاته

كيفكم يا شباب ان شاء الله بخير...

داري والله اني غثيتكم بكثرة اسألتي..كل يوم جايب لكم موتر

مره هدد ومره شاص ومره مدري وشهو..!!

لكن ارجوا المعذره لاني والله اني محتار بين هالسيارات كل يوم يطلع

براسي سياره كل ما جيت ابي اشتري سياره اتردد في اللحظه الاخيره..اقول في نفسي يا ولد اخاف اخذها واندم واقول يا ياليت صبرت...ياليت خليت فلوسي في جيبي اصرف لي..

واكييييد انه في كثير منكم مر بالوضع اللي انا فيه الحين!!الله لا يبلاكم

الزبده...

اليومين ذي جاي براسي الجيب الربع 2006 وش رايكم به؟؟

كيفه في البر والمدينه؟؟كيف الصرفيه؟؟هل هو مريح ولا مثل الشاص؟؟كم سعره؟؟حق خطوط ولا لا؟؟

يعني بالعربي الموتر يستاهل ولا لا؟؟

ارجوا انكم ما تبخلون علي بالنصايح علّ وعسى اقدر اتخذ قرار

وافتك من الموضوع هذا اللي شاغلني من رمضان اللي فات..

واكرر اعتذاري للجميع...

ويعطيكم الف عافيه...

الـصـقـار @user_12505 · 27-01-2006

الهدد هو اللاند كروزر GX القطري من موديل 98 وفوق

مواصفاته مواصفات الGXR فل كامل

يختلف في خفة الوزن وانعدام الكماليات ورخص السعر

وسمي هدد من هد الطير لان اصحاب الصقور يحبون هذا النوع

اما البريمي اخي كين

فهو وكيل لسيارات تويوتا في امارة رأس الخيمه او في عمان لست متأكدا

ويختلفون باختلاف المواصفات والاسعار

Kenny @user_9622 · 25-01-2006

يعطيك العافية أخوي

يعني مثل البريمي بعد ... الإسم يكون إعتماداً على الوكيل .. أو الموزع ... جميل جميل

إلا صحيح .. البريمي .. وارد عمان .. والا مكان ثاني؟؟؟؟ :rolleyes:

الظاهر أنا بهاجر إلى أذربيجان :o .. وبـ أصدّر سيارات ميتسوبيشي للسعودية .. بمواصفات خيالية .. وبعد كذا .. يصير إسم هالسيارات .. وارد Kenny ... وياااااااااااااااااااااااااااااااااااااااااااااااااااااااااااااااااااروحي |1|

تحياتي

Kenny

ولد البراري @user_25286 صاحب الموضوع · 25-01-2006

الهدد هو الجيب اللاندكروزر القطري بس يكون جي اكس... يجي فيه مواصفات حلوه جداً كنه الجي اكس ار السعودي وسعره حول 135000

Kenny @user_9622 · 25-01-2006

ممكن أعرف وش الهدد ؟؟؟

هذا موتر والا عصفور :) هدد = هدهد .. بس بعد الدلع

تحياتي

Kenny

salehhd @user_17805 · 24-01-2006

و

ولد البراري

والله يا جماعة الخير..شكلي بستخير الله واستنى لي كم شهر واخذ الهدد افضل لي سواء للبر او الخطوط وانا صراحه انسان راعي خطوط اكثر من البر...فشكل الهدد يناسبني اكثر من الربع..

والله يكتب اللي فيه الخير..ومشكورين وماقصرتم على النصايح

اختيار موفق ان شاء الله

والله ييسر لك امورك وتشتري الموتر الي تبيه

ومبروك مقدما

الـصـقـار @user_12505 · 24-01-2006

ونعم الرأي

تحياتي

ولد البراري @user_25286 صاحب الموضوع · 24-01-2006

والله يا جماعة الخير..شكلي بستخير الله واستنى لي كم شهر واخذ الهدد افضل لي سواء للبر او الخطوط وانا صراحه انسان راعي خطوط اكثر من البر...فشكل الهدد يناسبني اكثر من الربع..

والله يكتب اللي فيه الخير..ومشكورين وماقصرتم على النصايح

أبـوأسـد @user_15810 · 24-01-2006

s

salehhd

السلام عليكم

بصراحة انا مع الاخ الصغار

ولاتنسى ان ا لربع والشاص ما تغير شكلها من زمان وغالباً التغيير جايها السنه الجاية او الي بعدها بالكثير

واخيراً

انصحك بالاتسخارة وتمر الوكالات وتاخذ سواقة تجريبية والله يوفقك

للأسف أخوي صالح الشاص والكبسولة (الربع) ما تقدر تجربة تجربة قيادة على ما اظن
فقط أشتره وبس:( بدون تجربة ولا شيء

وفعلا على كلام KeN سعر الربع مبالغ به بقوة صراحة غالي عليه 90 ألف فل كامل بعد

Kenny @user_9622 · 24-01-2006

مع إحترامي ...

والله غالي .. مقارنة بالمواصفات والتجهيزات اللي يعطيك إياها .. في التحمل ماعليه كلام .. وسعر ما بعد البيع برضو .. بس يظل السعر غالي على سيارة غير مريحة وسريعة الإنقلاب .. وصرفيتها عالية.

على العموم كل واحد له وجهة نظر .. وأنا أحترم وجهة نظر ولد البراري

تحياتي

Kenny

salehhd @user_17805 · 23-01-2006

السلام عليكم

بصراحة انا مع الاخ الصقار

ولاتنسى ان ا لربع والشاص ما تغير شكلها من زمان وغالباً التغيير جايها السنه الجاية او الي بعدها بالكثير

واخيراً

انصحك بالاتسخارة وتمر الوكالات وتاخذ سواقة تجريبية والله يوفقك

الـصـقـار @user_12505 · 23-01-2006

طيب ياخي العزيز

جيب الربع ب 120 الف ريال

والشاص حوله بالسعر

يعني اذا قررت تشتري واحد منهن تبي تصبر للصيف حسب قولك لان الفرق 10 الاف بس

وش رايك بالباثفايندر رخيص وحلو

بس حط ببالك انه بعد كم شهر يبي يتغير

ولا وش رايك بربع الباترول فل كامل ب 105 الاف ريال

عندك عدة خيارات

ولد البراري @user_25286 صاحب الموضوع · 23-01-2006

KeN...
والله تقدر تقول استخدام شخصي لانه عندي سياره ثانيه لو كتب الله واخذته...ومشكور على الرد.

salehhd...
انا ماني راعي عايله لاني لسا ماتزوجت ***عقبالي يارب***
يعني ودي به لطلعات البر والكشتات والخطوط...فما ادري الى الان انا محتار...ويعطيك العافيه

الصقار...
الهدد انا ودي به من زماااااان لكن ماعندي حقه...سعره يبدا من 130000 عند اليحي...الا اذا استنى الى ان اجمع دراهمه واشتريه يعني يبي لي حول الخمسه او الست شهور...يعني بالعربي في الصيف ان الله اراد....وبعدين اخاف اخذه بــ140000 واخر شي يتغير شكله 2007 وذيك الوقت انطق انا والهدد حقي ولا انا غلطان...وعموما انا الى الحين ما قررت....ويعطيك العافيه اخوي وماقصرت على النصيحه.

الـصـقـار @user_12505 · 22-01-2006

هههههههههههههههههههههه

لا 120 الف على ربع

لا والله اللي شريته

شكرا لك اخي راعي 8100

راعي ال 8100 @user_22094 · 22-01-2006

الصقار ازيدك من الشعر بيت موب 103 الربع ب 120 ماصرت غـــــــبـــــــــي ادفع القيمة ذي في قفص خذ لك هدد وانت مغمض

الـصـقـار @user_12505 · 22-01-2006

نصيحه من اخ وياليت تاخذها على محمل جد ( ولا يهونون الاخوان ونصايحهم )

اذا لك مقدره على الهدد فخذه ولا تشاور

يأتي بعده الشاص اذا ماكنت راعي عايله

اما الربع فابعد عنه
سمعه سيئه وسريع الانقلاب ويصرف بنزين

صحيح انه قوي بس هو موتر شهرين او ثلاثه وتبيعه

او يكون سيارة بر فقققققققققققققققط

وصراحه حرام عليه 103 الاف ريال

المفروض سعره مايتعدا 70 الف

تحياتي

salehhd @user_17805 · 21-01-2006

السلام عليكم

الي اعرفة ان الموتر قوي وعزم جبار سواء التويوتا او النيسان لاكن مافي رساوة في الخط ويصرف بنزين

نصيحتي لك اذا عندك عايلة صغيرة خلذلك باث 2005 قوى وراسي على الخط واستهلاكة اقل من الربع والشاص

ولو تحدد لنا اش استخدامك للجيب علشان نساعدك في الاختيار

واخيراً انصحك بالاستخارة ترى من استخار ما خاب

al7zeen12 @user_15349 Registered User · 21-01-2006

بنسبه لي معي شاص 2002م
والله ان الموتر ولا احلى منه
لافي بر ولا في خط
لسه امس جاي من رفحاء خط فيه الى الرياض صراحه مووتر
وعلى فكره انا من فورد فكتوريا الى شاص شوف وملاحظ انه مريح ولا احلى منه
خااصه ان كانك راعي بر تستفيد من الصندوق وعزبتك وكل شي
الجيب الربع مثله مثل الشاص من ناحيه المواصفات والقوه
بس عيبه ان الدفرنسه صغير
وسريع الانقلاب خاصة بالرمال << الكلام هذا للي مايعرف يتصرف في التطعيس

وعلى فكره انا اببيع الموتر
ان كانك
تبي تسأل عن الاسعار
اضفنني
[email][email protected][/email]

Kenny @user_9622 · 21-01-2006

والله .. إذا بتاخذه إستخدام شخصي .. يعني مشاوير داخل البلد .. وتركب الأهل معك .. فنصيحة إبعد عنه ... أما إذا بتستخدمه بس إذا جيت تطلع البر أو في مشاوير خفيفة .. توكل على الله

الموتر قوي وماعليه كلام ويمسك سعره .. بس يصرف بنزين .. و مافيه راحة أبداً ... وسريع الإنقلاب في المنعطفات.

و الله يكتب لك اللي فيه الخير

تحياتي وأشواقي