اليوم مريت على وكالة العيسى -الدائري الشمالي, علشان اجرب لومينا رويال,
قالو لي مافيه للأسف, قلت ايش فيه, قال لومينا SS
قلت مو مشكلة
بعد مانهى الاجراءات , طلعت انا والمندوب
كانت السيارة لونها فضي, عدادها اقل من 9000 بشوي,
سميت بالله ومشيت لين وصلت طريق الثمامة, وكان فاضي وقلت نبدأ نشوف وشهي من لحية
يوم دعست الا وانتفضت بقوة وانطلقت تشق الطريق شق, قلت ماشاااااااااء الله, بس ما امداني الا وتخيب ظني,
الدعسة رجعت,
يعني يوم وصلت 120 تقريبا تحس المكينة ينزل ضغطها بالقوة,,
قلت مو مشكلة نجرب ثانية
يوم فضى الطريق شوب الا واعطيها اقوى ماعندي وانا سرعتي فوق 120
طااااااااارت ونفس المشكلة, الـRPM ماياصل 4 الا شوي الا يرجع بقوة على تحت وكأن السيارة ماودها تروح اقوى من كذا
قلت برضو مو مشكلة
وصلنا دوار طريق ابو بكر وديورت من عنده, واطالع في المراية الا واشوف هايلوكس براسه مهايط, قلت زين بقطعك هالحين, كنت مهدي لين صار بجنبي وناوي يطلع, قمت عطيت الموتر باور ودووووووووووووس
ما امداني احط رجلي الا والهللي اشوفه بالمراية من بعيييييييييييد
واطالع السرعة حصلتها 120 تقريبا بدون ما احس, وهنا خفت مشكلة ان الدعسة ترجع
قمت اكسر فيها يمين ويسار علشان اشوف الثبات, وكانت ماشاء الله قمة في الثبات
قلت خلني اجرب الدعسة في خط والباور شغال, قمت دعست اقوى شي , ونقزت الى 160 وعادت حليمة الى عادتها القديمة, :( الضغط ينزل وكأن السيارة تقول لا تدعس علي واجد
وبعدها وحنا راجعين على طريق الملك عبدالعزيز, وقفت تماما علشان اجرب التسارع من الـ0, مع الباور عطيتها اقوى ماعندي الا وتشق الخط وجابت الـ 100 بـ6 ثواني تقريبا
ونفس المشكلة ماعرفت وش حلها, (الـ RPM ياصل اقل من 4000 ويرد بقوة على تحت)
قلت للمندوب وش بلاها, (انا مجرب كابرس 2004SS قبل سنتين تقريبا, كانت تروووووووووع من جد)
قال ترا اللومينا فرق عن الكابرس, الكابرس SS ما ينجاب ابد, وهو بطبيعة الحال مجرب كل السيارتين
الزبدة
الملاحظات الايجابية على السيارة
1- الفرامل ممتاز جدا وقوي, تحسن عن الموديل السابق
2- ما تفحط مع قوة الدعسه, يعني ستررررررررررريييييييت قدام (لومينتي اللي معي 2002 اي دعسها تخليها ترقص تانجو على طوووووووول)
3-مريحة الى حد ما
4- راسية جدا في الخط
5- عزل الصوت جيد بشكل عام ولا تحس بصوت المكينة على الدعسات المتوسطة
6- تعشيقات القير مرة حلوة وسلسة, القير على طول يعشق
السلبيات:-
1-القوة ليست كما توقعتها ابدا (مع انها قوية لكن عموما احس انها اقل من المطلوب), يعني لا مقارنة مع الكابرس SS , ما ادري ايش السبب, هل لأنها جديدة وما تمرنت ولا الكمبيوتر برمجته ضعيفة ولا ولا, لدرجة انها في القومة ماتصف ما الباثفايندر 2003 وفوق (من خلال التجربة)
2- مكيف يدوي
3- عدم وجود شاشة معلومات
رأيي الشخصي:
ما اشوف اي داعي لشرائها, يعني لومينا LTZ اشوفها جدا كافية خصوصا مع المحرك الجديد 3.6 اللي اداءه جدا ممتاز, والـ LTZ فيها ميزات فخامة اكثر ورسمية اكثر
طبعا اذا الكلام عن الكابرس فهو يختلف,, وهذا راي شخصي لا يمثل الا صاحبه
اطيب تحية|3|
