السلام عليكم
يااخوتي السيارة قبل كل شي هي توفيق من الله سبحانه, ممكن تتوفق فيها وممكن لا
انا مثلا معاي لومينا 2001 مشيت عليها فوق 140 الف والحمد لله ماشفت منها الا كل خير, ولد عمي معه وحده موديل 99 كرفها لين قالت (الله حق)ومشر عليها فوق 270 الف كيلو وبعدها اشترى ايش؟ اشترى كابرس 6 سلندر 2005
وكما اعرف واحد رقيب اول في المرور اشترى لومينا LTZ قلت له على اي اساس اشتريتها؟ قال لأننا عارفينها كويس عندنا في الشغل نكرف ابوها (بس يسوون لها صيانة محترمة)
وبرضو اعرف ناس باعوها من اول سنة
وعندي لكم قصص كثيرة, مثلا الفورد فكتوريا معروفة بشدة تحملها وطول عمرها مع ذلك اخوي جلست معه 3 شهور بس وباعها موديل 2006 بسبب مشاكل ميكانيكية (طقطقة في المكينة تروح اذا احتمت السيارة)
ليش؟؟ ماتوفق فيها, ومع ذلك راح نشتري وحدة مستعملة للوالد من امريكا لأننا نقتنعين بالسيارة
زميلي في الكلية اشترى لاند 2004 من تويوتا الغنية عن التعريف ومع ذلك مرة علق علينا القير الاوتو في الثمامة
واحد من العيال معه ميتسوبيشي ومع ذلك وظب مكينتها بسبب تمزق راس المكينة وهي بعدها ماكملت 40 الف كيلو......
قصص كثير ولا توجد سيارة توب التوب وعطني اي سيارة تقولون انها جودتها عالية وارجعها لك بعد اسبوع واخليها تكلفك 20 الف اقل شي اصلاحات
اخواني ارفقو بالسيارات الجديدة تراها جدا جدا حساسة وكلها الكترونيات وممكن يروح باللك بعيد عن المشكلة وهي جدا بسيطة
انا عن نفسي ماراح اشتري لومينا مرة ثانية في الفترة القريبة ان عطاني ربي عمر , مو لأني مو مقتنع, بس لأني مليت منها وودي اغير
تحياتي للجميع
