اليوم خميس ومافيه دوام قلت وين اروح قلت خلنا نشقر على الوكلات فى طريق خريص ونشوف وش الجديد وانا امسك طريق خريص واول مااوقف عند الجميح طبع مافيه جديد عندهم وصراحه ماطولت عندهم وهم اول من نزل سيارات 2007 وطبعا كل سيارتهم متغيره بس لاحظت ان اكثر الزباين عندهم محتارين بين الدينالى (الشفر) واليوكن (الجمس) وماهم عارفين ايش الفرق بينهم وايش الافظل بس الى عرفته ومانى متأكد انه ال(جى ام سى) يبى ينقطع وهذا بدايه لتسويق ( لشفر ) .
وشفت عندهم الكابرس السياره مره حلوه بس الناس يبغو وقت عشان يتعودو على الشكل الجديد بس حسيت انها اصغر شوى من الداخل .
ومن السيارت الحلوه الى شفناها عندهم صراحه ( السكاليد ) مره السياره خطيره وأحس انها هى الافظل من بين منافساتها الانفنتى والينكون .
المهم طلعت من عندهم وانا امر محبوتى (وكاله السيف) طبع صارت محبوبتى من كثر مراجعات الصيانه عندهم واول مادخلت المعرض وانا اشوف ذاك الرنج مكتوب عليه 2007 قلت زين ماتغير المهم وانا افتح السياره واركب والى السياره ماههى السياره الى انا خابر تغير جذرى من الداخل الصراحه طالعه السياره مره حلوه وااهم شى انهم غيرو مكان تشغيل السياره من الكونسل وحطوه فى المقود وكذالك تم تغير شكل الطبلون كامل مع اخذ نفس الشكل القديم وتم تغيير الكونسل بشكل جذرى حيث انه تم الغاء البريك اليدوى ووظعه كزر عادى بالقرب من الدرج الاوسط حيث تم دمج جميع خيارات الهدروليك مع خيارت تحكم الدفع الرباعى وجعلها فى (ماوس صغير ) موجود فى الكونسل الاوسط خلف القير وتم فى الخلف وظع خيارت التكيف واهم شى اعجبنى هو شكل المقاعد من جد روعه وبنسبه لسعر الصراحه السعر مره عادى وتوقعته اكثر من كذا خصوص ان السياره جديده ولسا متغيره حيث ان سعر (hce) قرابه 280,000 ريال والشى الحلو بعد ان الوكاله سوت الظمان لمده خمس سنوات مفتوح الكيلو الى حد 250.000 ك
صراحه هذا اكثر شى شدنى عندهم لان الرنج بدون ظمان مثل العظم فى الحلق اذا خلص ظمان بعه مهما كان.
وبعد ماطلعت من عندهم مريت على الناغى بس ماطولت ومافيه اى جديدعندهم حتى x5 يقولون لساء ماجاء وهو الوحيد الى متغير فى 2007 بس اكثر شى شفته عندهم حلو هى اسعار السيارت المستعمله من جد الى يفكر يشترى bmw خله يمر على الناغى ويبى يلقى مطاوبه .
دويرت من تحت كبرى خشم العان وعلى ساماكو وكنت متحمس ابى اشوف الطوارق الجديد يقولو تغير وانا ادخل المعرض واشوف كل المعروض الشكل القديم وانا اسال واحد قلت لو سمحت مافيه 2007 قال كل الى قدامك 2007 قلت لا هذا الشكل القديم قال اكيد انت من حقين المنتديات والنت ياخوى هذا 2007 والشكل الى شفتوه هذا يبى ينزل فى 2008 وهو تغير فى الشمعات الاماميه والشبك الامامى والانوار الخلفيه و2007 مافيه تغيير الى فى المكينه حيث صار v6 2,7 يعنى افظل من المحرك الاول بكثير بس الحلو الى لقيته عندهم هو سعر v8 ستار 4 فول كامل ماعدا الهودروليك كم تتوقع سعره صراحه مره خيال بـ 205,000 طبعا كان سعره فوق الـ 250,00 وخذت كرت الموظف وطلعت عشان فيه واحد من العيال ناوى يشترى طوارق ومحتار قلت فرصه انه يلحق عللى السعر خصوص انه يقول ماباقى الى حبتين .
وانا طالع قلت خل نمر على الجفالى بس صراحه احس انهم اكثر شركه تعقيد واكتشفت ان معظم سياراتهم تجى الزباين ( اوردر ) وماعندهم شى جاهز كل الى عندهم استاندر يعنى يبغالك اقل سشى شهرين ثلاث شهور لين تستلم سيارتك واى زبون يبغى اى سياره يحدد بس ايش النوع وباقى ( الاوبشن ) كل شى له سعر والحسابه بتحسب بس انا لاحضت شى وهو شكل ال ( mg) على جنوط 20 او 19 افظل بكثير من الشكل العادى ومن السيارات الحلوه بعد هو الجيب (250E) بس شكله من الخارج مايوحى بالفخامه ومن الداخل تحس انك راكب افظل جيب دفع رباعى على الاطلاق .
يوم طلعت من عندهم واناظر الساعه الى باقى ربع ساعه على الاذان وكنت ناوى اشوف اللاكسبدشن الجديد عند توكيلات الجزيره المهم لحقت وليتنى مارحت السياره سخيفه مره احلى مافيها انهم حطو القير فى الكونسل ةلا من زينهم حاطين الشكل القديم جمبه وهو احلى بكثير بس الغريب ان الاكسبدشن صار منه نوعين قصير وطويل زى السكاليد والجمس واليوكن والغو الاكسفيرجن وانا طالع من عندهم كان قدام المدخل الشكل الجديد من جيب الينكون بصراحه السياره مره حلو من الخارج بس من الداخل تفتقر الى ابسط اساليب الفخامه معقوله سياره فى هذه الفخامه لا يوجد فيها شاشه او نفيجيشن .
وكانت زيارتى لتوكيلات الجزيره هى نهايتى جولتى لهذا اليوم اتمنا انى اسعدكم وتم توصيل مارأيته فى هذه الجوله .
مراسلكم من طريق خريص : هى كار
ولكم خالص تقديرى ودمتم|3|
