والله مشروع ممتاز جدا وفكرت فيه كثير
شوف عندي لك مكان ممتاز ونصائح كثيرة
وش رايك يكون مكان المحل في طريق خريص حول محل العليان حق الزينة
وشوف نصيحتي بعد يكون أغلب الأشياء الي عندك أصلية هذا ترى يحدد منهم زباينك يعني نصيحة لا تجيب شيء صيني لأن عمري ما حبيت اشتري شيء صيني أبدا إلا أذا انت تبي كذا بس الأشياء المهمة لا تجيبها صيني مثل جنوط ولا أنوار ولا مساعدات ولا ولا يعني حاول يكون الشيء أصلي وشي طبيعي أنه بيكون سعره اغلى بس على الأقل شيء يستاهل لأن في أشياء أستحالة الواحد يفكر يحطها في موتره صينية لأن مو حياته رخيصة حتى يشتري جنط صيني ولا كفر صيني ثم يجيب العيد في الخط وتاخذ أثامه!
يعني خلك على قطع ياباني وأسترالي وأمريكي وألماني وبريطاني وتركي وووو وعد وأغلط بس شيء الواحد يحب صناعتها ويعرف أنها جيدة وممتازة يعني لا تقبل بالي يمشي الحال في الجودة (صيني وتايواني وتايلندي وطقتها) إلا الأشياء الي تعتبر عادية جدا مثل عطر ولا علبة غاز لدافور صغير وتلبسية مراتب مع أني أفضل أنك ما تتعمق فيها كثير.
وعندي لك نصيحة حلوة
طالما أنك بتجيب قطع غيار من الخارج أيضا لا تنس تجيب أشياء خاصة بالدفع الرباعي وصدقني بيجونك زباين بالهبل
شوف الشركة ARB لمنتجات وأكسسوارات الدفع الرباعي وأخبر صناعتها أسترالية يعني شيء ممتاز
وللمعلومية عندهم بلاوي حق الجيوب والبيك أب أشكال وألوان ولو تصير وكيل حصري لها في الرياض صدقني مشروع ولا أقوى منه |1|
وهذا موقعهم
http://www.arb.com.au/
بصراحة عندهم اشياء كثيرة أنا ودي فيها بس ما لقيتها في السوق دورتها في الرياض وما لقيتها بس لو تجيبها راح أكون أول زبائن الجيوب لك :D
ولو بعد تسوي مركز صيانة لك تابع للمحل يطلع ممتاز مثلا تركيب الفلاتر والهيدرز والدعامات الخاصة بشركة ARBوأقفال الدفرنس وصدامات فولاذية وأشياء كثيرة وتصير حق مركز للترهيم ثم تتطور في المستقبل أكثر ويصير عندك دانيو وتكون الوحيد الي عندك هذا الجهاز في الرياض :)
يعني الواحد يبدى حبة حبة
أبد أول شيء بمشروع المحل
ثم بالورشة ثم تطور إلى أن تصير عندك الدانيو وحق ترهيم سيارات مختلف الأنواع.
ومكان طريق خريص أعتقد ممتاز وخل مكانك يكون واضح جدا والطريق معروف أنه مشهور كل وكالات السيارات عندك يعني يمكن الواحد الي يبي يمر هذا الطريق يبي يشوف السيارات في المعارض أو الوكالات علشان يشتري بس يشوف محلك بالصدفة |10| (لازم يكون واضح أنه على طريق الرئيسي في خريص) ويزور المحل ويعجب الي فيه ثم يكون زبون دائم لك ويخبر زملائه عن المحل وش رايك بالتفكير
وخل أسم المحل : أبــــــــوأســـــــــد أسم لامع لمستلزمات السيارات والدفع الرباعي :D <<<< بتتصفك أنت خخخخخ
على فكرة خل أسم المحل يكون كلمات قليلة أو كلمة وحدة أفضل شيء يعني المحل الفلاني للمستلزمات الــ ألخ.
على العموم انا يمكن عندي لك أفكار وأستشارات كثيرة أن بغيت شيء راسلني على الخاص ;)
أخوك أبــــــــوأســـــــــد|3|
