الأخوة الأعزاء
السلام عليكم ورحمة الله وبركاته
تحية طيبة وبعد
السلام عليكم ورحمة الله وبركاته
تحية طيبة وبعد
عندي مشكلة في سيارتي اليوكن موديل 2007 والله العظيم أنها حيرتني وضيقت صدري وكل يوم وأنا بالصناعية مرة راكب معي هندي مرة سوداني ومرة فلسطيني وكل واحد يعطيني علة والله أحترت ماأدري وش أسوي .
أفكر أروح للوكالة بس من شريت السيارة وأنا أسوي جميع أمور الصيانة برا الوكالة يعني السيارة خارج الضمان وإلى الآن ماشية 60000 كيلومتر.
نجي للمشكلة ممكن أحد منكم قد مرت عليه ويقدر يفيدني الله يجزاه عني خير الجزاء.
المشكلة هي رجة بالسيارة لما أمشي بسرعة 80 وأحياناً 100 وأحياناً ال120 ماهي ثابتة على سرعة معينة قلت يمكن السيارة يبغالها ترصيص قمت ورصصت الكفرات بالكمبيوتر عند الطيار ولا نفع مريت على كذا بنشري قال كفراتك تعبانة مكرشة مع الجنب قلنا ميخالف نغير الكفرات وش نسوي بحثت عن كفرات ذات مواصفات ممتازة وطحت بموضوع أخوي رفيع الشأن والذي أستفدت منه أستفادة رائعة ووقع أختياري على كفرات هانكوك ومواصفاتها جداً ممتازة من ناحية الإحتكاك وتحمل الحرارة وسمك الدعسة وتاريخ الصنع وشكل الدعسة والقيمة وهي 550 ريال للكفر الواحد مع ضمان لمدة سنة من وكيل هانكوك بن شيهون قلنا ركب يابوالشباب.
ركبنا الكفرات ومسكت الدائري أبي أجرب وأشوف يمكن تروح الرجة ولكن :emot101: أنصدمت لما رجت السيارة يعني كل اللي سويته طلع على الفاضي يعني كفراتي القديمة مافيها شي.
قلنا نمر على مركز العضيب للترصيص بالصناعية القديمة يمكن يكون أذرعة أو مساعدات ولما جيتهم وشرحت لهم السالفة قالي المهندس الأذرعة والمساعدات ماتسبب رجة للسيارة ودامك مركب كفرات جديدة ومرصص حل مشكلتك ماهو عندنا رح للمخرطة علشان يفحصون عامود الكردان (( قلت ياليل ماطولك)) :a120(28): رحت أبي أفحص قالي الفني اللي بالمخرطة صاحي أنت السيارة جديدة مستحيل يكون عامود كردان قلت أفحص الله يرحم والديك قال بخمسين ريال مع أني أقولك السيارة مافيها شي قلت ماعليه.
رفع السيارة وشغلها ودور الكفرات ونزل تحت السيارة وطلع معي بزحمة الناس بعد التراويح وأنا اللي أسوق يوم جت الرجه قال أرفع رجلك عن الدعسة رفعت رجلي راحت الرجة قال هذا أحتمال يكون طنجرة القير قلت وشو قال طنجرة القير .
قلت قول غيرها الله يرحم والديك كل شي ولا القير :emot105: ترى ماأتحمل قال هذا اللي باين معي قلت تعرف أحد مضبوط قال رح لواحد سوداني بالورشة الفلانية رحت ركب معي سوداني أكبر من اليوكن الله يجزاه خير وهو اللي يسوق قال الحين يبي تطلع معنا الرجة ولا لأ .
قلت لا أنا بس ضايق صدري وقلت أمر عليك ونطلع نتمشى شوي سلامات ياأبو الشباب أنا فاضيلك ضحك وحس أن كلمته مالها داعي :a120(39): قال شوف هذي يمكن تكون حساسات قلت شكراً وأنا أقول بقلبي أنزل بس ريحة السيارة قلبت كمونية نزل الزول من هنا وأنا :emot4: أفكر وش أسوي وين أروح تذكرت منتدياتكم الرائعة ومدى تجاوب الأعضاء الكرام مع جميع المشاركات قلت مالي الإ الله ثم أنتم يمكن أحد يفيدني ويحل هالمشكلة والله أنها ضيقت صدري. لكن وش نسوي الخسارة بالنفوس ماهي بالفلوس.
أتمنى أني ماثقلت عليكم وتقبلوا تحياتي وشاكر لكم حسن تجاوبكم مقدماً.:emot154:
