عدنا والعود أحمد
بتكلم عن تجربتي للسيارتين
بحكم أني كنت أفكر سابقا بأمتلاك سيارة دفع رباعي ووقع أختياري أكثر شيء على الأف جي كروزر والباجيرو الربع الجديد
ببدا أولا بالباجيرو طالما أنت تستفسر عنه أولا
رحت لوكالة العيسائي بالرياض فرع خريص عندهم أخذت موعد لتجربة باجيرو ربع 2008 محرك 3.8 لتر ستاندر قير تيبترونيك
مواصفاته
أيرباقين
جنوط 17 على ما أعتقد
مكابح ABS+EBD
أستريو كاسيت
نوافذ ومرايا كهربائية
فيه بعد مواصفات اخرى بسيطة ما أذكرها حاليا بس مثل ما قلت سابقا السيارة ستاندر (سياحي)
هذي صور السيارة الي جربتها
ملاحظاتي على السيارة
ميزات:
السيارة ديكورها مرتب كثير مقارنة بالأف جي وفخم جدا بالفل كامل
مركب السيارة مريح جدا
أنسيابية السيارة الأمامية أفضل من الأف جي يعود ذلك لتصميمها
مكابحها قوية بنسبة لي مقاربة لقوة الأف جي
أستجابتها قوية
المناورة فيه حلوة
العيوب:
صوت المحرك مزعج! تحس مافي عزل بين مقصورة القيادة وبين المحرك وأذكر سالفت مع واحد خبير بالباجيرو يمتلك باجيرو 2008 عن هذي المشكلة قالي أن الموديل الجديد منه قامو رجعو المكينة للخل علشان يكون أفضل في تنسيق الوزن لكن الضريبة كانت صوت المحرك صار يدخل المقصورة بشكل مزعج (البعض يراه طرب لكن بنسبة لي مزعج بقوة)
تعليق السيارة قاسي جدا هذا يعود لنظام تعليق الباجيرو المستقل أمامي وخلفي لدرجة أن لما أدعس على عيون القطط السيارة كلها تهتز!!! بعض السيارات تاكل عيون القطط تكتفي بالصوت وهزة بسيطة أو قفزة بسيطة
هذي ملاحظاتي على السيارة بحد ذاتها
كان معي المسؤول عن تجربة القيادة سألني بعض الاسئلة عن أختبار القيادة من ضمنها هل تفكر بشرائها
رديت عليه قلت لا!
قال والسبب
قلت له الأسباب الفوق
أضافة ان نقص شديد جدا بالمواصفات
يعني مواصفات الأمارات يعتبر أفضل المواصفات الي شفتها
يجي الباجيرو زينون وكان الباجيرو 2006 وأذكره زين الفل كامل الربع يجي زينون بينما الي عندكم هذا 2008 و2009 بدون زينون؟!
وعندك بعض نظام الدفلوك غير متوفر سلامات تشيل لي ميزة مهمة بالسيارة ماراح ادفع مبلغ وقدره على سيارة ناقصه مواصفاته
كذلك الي عندنا جنوط تحس ملفقة 17 مدري 16 شكلها بايخ بينما تجي بالأمارات والكويت جنوط 18 ليش العيسائي جايبها ناقصة مواصفاتها؟
فيه مواصفات يمكن تتعوض زي الجنوط لكن أما بلفق الزينون وبلعب بميكانيكية السيارة وأركب دفلوك فهذا الي ما يدخل المزاج.
هذا بخصوص الباجيرو
نجي للاف جي كروزر
أنا أستأجرت مرتين
هذا وكان سياحي
مواصفاته
كاميرا خلفية
نظام منع الأنزلاق ABS+EBD
مثبت سرعة
تحكم بالأستريو عن طريق المقود
البوصلة ودرجة الميلان ودرجة الحرارة الخارجية
المسجل الفل 6 سيديات MP3,WMA
ريموت كنترول
جنوط 16 ألمنيوم
سوب ويفر
المرايا الوسطى بخاصية التعتيم
حساسات خلفية (العدد أثنان)
ايرباقين
زر لفك الثبات تراكشن (غير التراكشن كنترول)
وهذا فل كامل
فرق المواصفات عن الي السياحي
الأيرباقات الجانبية ويطلع المجموع 6 ايرباقات
تراكشن كنترول
دفلوك خلفي
نظام VSC الخاص بالثبات
يمكن فيه غيره هذي المواصفات ما أذكرها حاليا
غير أني جربت حق واحد من أخوياي
المهم ناخذ تجربة الاف جي
الميزات:
السيارة نشيطة جدا في الشوارع والنفود
السيارة مركبها مريح
مكابحها حلوة
العزل فيها حلو لكن برأيي عزل الباجيرو أفضل بالسرعات العالية
مواصفاتها ممتازة كانظمة تعزيز للدفع الرباعي الدفلوك والتراكشن
العيوب:
خزانها صغير يعني أعتقد أقصى حد لما تعبي التنكي وسط المدن يمشيك 450 كيلو
الصف الثاني من المقاعد مو مريح بالدرجة الكافية
ابعاد السيارة من ناحية الرأية شوي صعبة لكن مسألة يبيلها تعود
هذا موضوع لي عن تجربة الأف جي كروزر
http://assayyarat.com/forums/showthread.php?t=152986
وملاحظة بسيطة للاف جي
الي يبحث عن الفخامة لا يشتريها لأن طبعها رياضي بحت
وش الي يميز الباجيرو عن الأف جي
فخم جدا ولا الفرق شوي :2smilie40:
الأنسيابية النوافذ وثباته بالخطوط أعتقد أفضل
الي يميز الاف جي كروزر عن الباجيرو
صوت محركه طرب وغير مزعج بخلاف الباجيرو
مواصفات المهمة والأساسية متوفر عكس الباجيرو
مسألة الدخول الركاب للصف الثاني عندي أفضل من الباجيرو الربع لازم تقدم المرتبة علشان يركب
التسارع بالأف جي أقوى بكثير من الباجيرو الربع
حيث حسبتها كم مرة
لقيت الأف جي من 0 إلى 100 في أقل من 8 ثواني
أما الباجيرو الربع من 0 إلى 100 في خلال 8.5 ثانية!
رغم أن المحرك الباجيرو كارقام الاحصنة أقوى لكن يبدون أن سعة الأف جي ونشاط محركه هو الي مخليه أقوى بكثير
الباجيرو 3.8 لتر الي جربته والأف جي محركه أساسا 4 لتر
وبعد تجربتي هذي للسيارتين طلعت الباجيرو من خياراتي
وبالأخير
المسالة ترجع لك أخي العزيز
جرب السيارتين جميع لأن يمكن تكون عكس نظامي وترتاح للباجيرو أكثر من الأف جي
وأنا أشوف الأف جي في أغلب الأشياء متفوق على الباجيرو
عموما أن بغيت تشتري باجيرو
نصحتي هي لا تقرب الباجيرو الخايس حق العيسائي لنقص مواصفاته
عندك الامراتي والكويتي افضل شيء وحسب ما أعرف أن الاماراتي أفضل لكن أغلى
الباجيرو الربع الكويتي أخبر الربع ما يجي منه جلد وفيه مواصفة ثانية ناسي مدري الزينون أو شيء ثاني منب متذكر زين لكن الي يجيك كامل المواصفات في الامارات
المشكلة أنك لما تشتري الباجيرو من خارج السعودية ماراح يدخل تحت الضمان والباجيرو الي عند العيسائي بصراحة ما يسوى
ولا تنسى الأستخارة
