الو كالة ارحم او البنك في حالة التقسيط او الايجار

شكرا اخوي وضح النقاء هذا من ذوقك واكيد كل شي اصلا قابل للربح والخسارة

راي تجاري بحت ولايجيده الا الاذكياء مثلك وليس كل من شراء ارض استفاد بل على العكس فيه ناس خسروا والقضية تحتاج واحد شاطر يحسبها صح مثلك

التأجير المنتهي بالتوريط

اخوي لي راى بالتاجير وانا ممن يؤيدون ذلك لان اسعار السيارات حاليا غير منطقي للشراء المباشر لان السيارة سلعة متناقصة الثمن
فمبلغ زي 130000 تستثمر ومن مردوده تاخذ سيارة بالتاجير وفي الاخير تجد انك حصلت على سيارة وفلوسك عندك وسيارة يمكن بعد الخمس سنوات تسوى في افضل الحالات 70000
في حالة شراء السيارة كاش بعد خمس سنوات عندك 70000 الف بس
كثير يقول ما اعرف استثمر في اسوء الحالات ضعه في عقار وبعد خمس سنوات براس مالك او كسبان
وانا شخصيا بعد دراسة انصحك بالتاجير من نيسان نسبة الرابح مع التامين 6.5 بالسنة

طبعا الذي عنده اقساط سابقا من البنوك يكون صعب يا خذ مرة ثانية لذلك ما فيه الا تاجير ومع ذلك انصح بشدة ان ما احد ياخذ منه للاسباب التالية
1- التامين محسوب عليك بسعر فلكي مرة مع انه احيانا ما ينفعك
2- يحسبون عليك رسوم ادارية حوالي 3500 ريال بدون وجه حق طبعا مايخبرونك لكن لو دققت ستجدها
3- لو بغيت تبيع السيارة الله يعينك لن يشتريها منك الا القليل من الناس
4- يعاد حساب التامين مرة اخرى لوبعت السيارة وبسعر اغلى من السابق
5- ضمان الوكالة وتشييكاتها لن تكون بسهولة اذا كنت اخذها بطريقة التاجير حيث يستهترون بك لحاجتك لهم لكي يسري الضمان

أعانك الله أخي الكريم

ينقل إلى الدفع الرباعي

شــــــــــــــــــــــــــــكرا لك

وفيت يابو اسد في الحديث , والله يعطيك العافية

وانا افضّل , التمويل الاسلامي من البنك ,, وشراء السيارة من الوكالة كاااش
فهذه ارخص طريقة ( مقارنة نسبة فائدة القرض مع فائدة التقسيط او التأجير )

يعني التقسيط افضل والفائدة اقل؟

اكيد البنك افضل من الوكالة

قلة ذات اليد عند اغلب السعوديين فنادر احد يشتري كاش

بارك الله فيك ابو اسد
المشكلة مع استمرار ارتفاع اسعار السيارات اصبح شراء الكاش بعيد المنال.
من الصعب الوحد يدفع 80-90 الف مرة وحدة في كومة بلاستك وحديد.

ابو اسد وفى وكفى الله يعطيه العافية


الله يوفقك ولاتنسى صلاة الاستخارة

اللي مالاخوة ما انتبهو ا له ان البنوك تشتري لك مواد غدائية او اي سلعة حديد او خشب او او بحيث يشترون لك بقيمة السيارة وبيعونه طبعا هناك نسبة العمولة 4.5 عليك وتتحملها انت يامن تريد التمويل ثم يشترون السيارة ويكتبونها باسمهم طبعا يبغونها بطريقة اسلامية !
ثم تشتريها انت منهم ويحسبون نسبة العمولة 4.5 مرة ثانية وتدفعها انت وانت ما تشوف الطريق ،
انا كنت اظن انك تدفع 4.5 مرة واحدة لقيت تدفعها مرتين
يعني ميزةا البنك انهم يكتبون السيارة باسمك على طول اما الوكالات فبعد ان تنتهي من اقساطك يكتبونها باسمك

^^^

رد جميل ووافي اخي ابواسد .. اقترح انشاء موضوع مستقل لتعم الفائدة

شوف بأي شكل من الأشكال

البنك أرخص دائما فهو المتخصص بمجال التقسيط والقروض وغيره

الوكالة همها المبيعات فقط لذلك لو تدقق في التقسيط بينها وبين الوكالة وتسأل النسبة الفائدة كم توصل بـ % راح تشوف أنها أعلى من البنوك

عموما أنا نصيحتي لكل من يريد شراء سيارة مو كاش فيه أفضل حلين:

1- القرض الأسلامي.
2- التقسيط.

فقط

أما التأجير المنتهي بالتمليك

فياشباب أنتبهو منه تراه كارثة من أخطر الأنظمة الي يتعامل معه الواحد ففيه مشاكل كثيرة جدا

أولا نسبة التأجير فيه عالية مقارنة بالتقسيط أو القرض والسبب يعود أن التأمين الشامل ألزامي يعني نسبة الفائدة راح تتجاوز 8% سنويا لأن 3.25% هذا التأمين الشامل لحاله

بتقولون لي شيء زين صح

بالعكس هذا أخطر شيء فيه

نظام التأجير المنتهي بالتمليك لما تصير لسيارتك مشكلة قوية كحادث راح تصير مثل الكورة الي الكل يشوتك لما تراجع الوكالة أو التأمين أو البنك كل واحد يقول راجع الجهة الفلانية مو شغلنا!

وأعرف ناس قابلتهم متندمين أشد الندم على أخذ السيارة بهذا النظام

سياراتهم راحت تشليح ومازال يطالبونه البنك بدفع القرض!

أولهم البنك الأهلي!

وما يهون بعد الراجحي قد سمعت أنه سواها وما أحتكرها عليهم بس أغلب البنوك نفس الطريقة

ونفس الشيء تأجير المنتهي بالتمليك عن طريق وكالة تويوتا أبوجميل

لازم تعرفون أنه شيء سيء جدا أستخدامه

الي أكثر من ياخذ عن طريق النظام هذا هو الي عنده قرض مسبقا فيضطر أنه يستخدم نظام التأجير المنتهي بالتمليك لأنه هو الي تقريبا يسمح أنك تاخذ السيارة وأنت مازال عندك قرض أهم شيء لا تتعدى نسبة 33% من أجمالي القروض الي عليك مقارنة براتبك

ومن عيوب التأجير المنتهي بالتمليك غير سالفة التأمين الي ذكرتها

2- السيارة مو مسجلة بأسمك يعني مالك حرية التصرف فيها من ناحية بيعها أو غيره.

3- ما تقدر تسافر خارج المملكة إلا بتصريح من البنك أو الوكالة (علشان ما عليك تأخرات بالتسديد القسط) والمرور(علشان ما تطلع وعليك لو مخالفة وحدة إلا وأنت مسددها غصب عنك ولا ما تطلع) <<< شفتو المرمطة.

4- لو ما تسدد سحبوها منك كأنك وأنتم بالكرامة وأسمحولي أقولها (بهيمة) تسدد دايم يتركونك ما تسدد والله ما عندهم فيك

ولا

أعرف سالفة واحد سحبو منه السيارة بالغلط بحجة أنه ما سدد أخر القروض الي عليه وهو يسدد دايم

وسالفة ثانية

أعرف واحد قابلته يقولي أحد زملائه مطلع سيارة وتأخر بالسداد وبطريقة وقحة جدا من البنك دقو عليه قالو حنا البريد نبي نرسل لك بريد لنا وطبعا دق على البيت وكلمته زوجته مدري أحد الأبناء وهم على نياتهم وصفوله البيت وجو وأخذو السيارة! خلو مسألة أخذو السيارة بس

يوم أخذوها راح خوينا يقضي مشاويره بالليموزين

فجأة نفس اليوم دق عليه خوية يقولي مجنون أنت تطعس بموترك!!! الرجال أنهبل قالي يا أخي أنا بمطعم هرفي وش يوديني البر

قال مو موترك لوحته كذا كذا كذا

قال ايه هو

قالي الموتر قدامي يطعس ومليان شباب وناس جالسين فوق التندة بعد بالعاذرية مدري بالثمامة!!!

تخيلو وش صار

أثر الحقير الوقح مندوب التأجير بالبنك يوم أخذ السيارة عزم أخوياه على موتر الرجال يطلع به ويلعن خيره ثم يرجعه!!!

عاد صارت قصة طويلة عريضة بتحجيرة غير طبيعية من أخويا صاحب الموتر ومن الشرطة ولعنو خير خيرهم قبل لا يودونهم القسم ورفعوها للمحاكمة ومحامي وغيره

وأن بغيتو تعرفون المندوب من أي بنك فهو بنك الرياض!!!

يعني لا أحد يثق بأي بنك أو اي وكالة نهائيا عندنا نظام التأجير المنتهي بالتمليك لأن النظام فيه يكون غير متكامل جدا علشان يكون فيه ثغرة بالنظام يستغل فيها ويكون العميل هو الضحية

ولا أزيدكم من الشعر بيت لو تبحثون عن مواضيع بالمنتدى عن هذا النظام راح تشوفون البلاوي والفضايح والمأسي

هذا أقربها كموضوع جديد بتاريخ أمس!

http://www.assayyarat.com/forums/thread207349.html

وسلامتكم

طبعا البنك ارخصص بكثير من الوكاله (هذا اللي اذكره )