شاركنا بتجربتك : ماذا كان تصرفك عند انفجار الإطار (الكفر)؟

أنآ مرتين أنفجر علي الكفر بـ أكورد v6 مرتين والسبب أن الكفرآت لهآ سنه و 10 شهور تقريباً ونوعهآ ميشلآن ولآ حسيت بـ شي أبببد بس سمعت صوت طعععع وصآر يطلع صوت يقول طرررر وكنت أمشي 150 وهديت بـ القير لين وقفت السيآره .. والمره الثآنيه نفسهآ بس كآنت 140 وأشوى أني كنت مطفي المسجل ولآ بـ العآده أطول عـ المسجل بس الحمد لله , الله ستر علي

^^^^الحمد لله على السلامةحطمت الرقم القياسي في الموضوع 220 كم ^_^لكن ربك الحافظ

أنا ضرب علي الفكر الخلفي يمين بريجيستون له سنه تقريبا وكان معاي مازدا 6 2003 وكنت ماشي 220
لا وفرملت بعد :bigggrin:
المهم السيارة لعبت لعب شفت الموت
وبعدين وقفت عكس السير والسيارة سليمه وحنا بخير والحمد لله

^^^^^^^^
تنبيه مهم عن الإبرة لأن كثير من الناس يهتم بتركيب كفر جديد وينسى شئ اسمه ابره
لاكن كإجراء احتياطي يكون في درج السيارة 4ابر مع مفكها الخاص وكلها ما تكلف 5 ريال وحجمها صغير

لكن هناك شئ اسمه بلف وهو اللي تركب فيه ابرة وهو يغير مع تغيير الكفرات

وكل هذي الأشياء نستحقرها وما نفكر فيها وهي ممكن تسبب كوارث لا قدر الله

والله يحفظكم

وشكرا لك

انا اذكر كنت طالع الجنوب مع واحد من اخوياي < من الدمام طبعا
المهم رحت مكان كفرات (يمني) وركب لي طقم كفرات يوكوهاما << طبعا سيارتي لومينا .. يسعد قلبها ولبى ثباتها :xyxthumbs:

المهم دفعت حق الكفرات والوزنيه وكل شي تمام التمام

طلعت جربت السياره ومشيت وكل شي حلوووو :xyxwave:

كلمت خويي قلت له استعد انا بطلع من الدوام الصباح وباخذك ونمشي وتم ...

طلعت من الدوام و مشينا الخط المهم ماشين 160 - 180 .. ما انزل عنها دايم بالخط ..

بعد الدمام بـ150 كيلو تقريبا :confused1: اسمع صوت وانا ماشي 180 ... اطالع خويي اقوله وش هالصوت !!! يقول لا ماعليك يمكن الازفلت معدووم ..!!!

وامشي الا الصوت يزيد .. :confused1:

واهدي شوي شوي وانزل الا الكفر في الارض مرره مبنشر :mad1: اووووف توه جديد !!

وانزل بالسياره بالتراب قلت الله لايرده واعكس السير وادعس رجعت اقرب محطه ..!!

وادور جديد او مستعمل مااااافيه كفرات !!! :confused1:

قلت تدري طلع الاسبير محبل شوي لكن يمشي بتمشى عليه لين الرياض وبغيره :blue:

مشيت فيه شوي وراح التحبيل والله ياشباب تعدل هههههههههههه :bigggrin: قلت كفووو

دخلت الرياض وركبت ثاني جديييد مكان اللي بنشر بالخط ومشيت (طبعا ركبت نوعيه ابوركبه اسمه سوموتومو الظاهر كذا) <<لانها كانت عندي مشتني سنتين
المهم رجعت الكفر المحبل بالشنطه وحطيت الجديد الحين احلااااا شي امشي وانا مرتاااح :xyxwave:
وتعديت الرياض الظاهر ماوصلت 10 كيلو او 5 الا واسمع نفس الصوت :confused1:

انزل واشوووف الجديد مبنشر :mad1: وانعدم !!!

رجعت اقرب محطه وارجع الاسبير المحبل وقلت والله ما اغيره لين ارجع الشرقيه :a120(115):
المهم تمشيت فيه ليين رجعت وغيرت طقم جديد .. :xyxthumbs:


وش طلعت المشكله بالنهاايه ؟؟


شي ماننتبه له كثير :c0038:

الابره اللي ركبها لي لما غير الكفرات عند اليمني حط لي ابر مستعمله :c0038: حسبي الله عليهم حراميه .. ولما اسرع يطلع الهوا من اطرافها ويعدم الكفر :c0038:


انتبهو من هالشي قوله حط ابر جديييده وعلى مسؤوليتك



تحياتي


اخوكم


JNoN

^^^^
الحمد لله عدت على خير
ويوم يضرب الكفر عند اشارة الغرابي موقف ماله داعي وخاصة لو كان الجو صيف :wink:

انا انصلخ الكفر علي سبحان الله وان رايح اغير طقم كفرات

نوع السياره فكتوريا 2006 وكانت السالفه عام 2008 تقريبا

الكفر الخلفي جهت الراكب والكفرات من موديل السياره

السرعه تقريبا من 80 الى 90 داخل المدينه انصلخ علي تقريبا قبل

محلات الكفرات بأشاره وحده السافه كانت للمحل 100 الى 150 متر

وضاق صدري وقتها ما صار الا قبل المحل وتعال فك الاستبنه وتسدح بالطريق

والثوب انعدم والايدين صارت سود وحالتي حاله

يوم انفجر حسيت الكفر المنصلخ اكل مطبه قويه وصوته قوي وازعاج

شغلت الفلشر وهديت طبيعي جدا

وعدت على خير

لكن المضحك المبكي قريب جدا من محلات الكفرات الي بالغرابي بالرياض قبل الاشاره

حقت البريد السعودي ،،،،


ويعطيك العافيه على الموضوع

والله لا يريكم مكروه

تحياتي لك عزيزي

الحمد لله


مشكور على مشاركتك وأهم شئ أنك استفدت من موقف خويك


الله يعطيك العافية واستفدنا من موقفك لكن على كلامك ان ما نتصح بالتهديه بالنمرة




طيب اخوي ممكن تذكر نا كم كانت سرعة السيارة لأن الفرامل معروف انها سبب لإختلال التوازن



فعلا كنتم مسرعين جدا لكن هدوء الأعصاب والتصرف الحكيم له دور بعد حماية الله لكم



استفدنا منك كثيرا
ولا تنسى تبدل الكفرات الخلفية صحيح أن الكفرات غالية لكن روحك أغلى

وحاول تتذكر القصة الثانية وتفيدنا

انا تقريبا انفجرو عليي 3 كفرات وانخلع مني كفر وانا امشي على طول المدة اللي كنت اسوق فيها

والكفر اللي انخلع كان اول تجربة لي مع الكفرات

هذا كان اخوي جايب الددسن 88 من المنطقة اللي كان يعمل بها بالشحن وخلاني استلم السيارة .. وزين انه قال لي ان توايرها تعبانين وﻻتسرع بها

ولما استلمتها ومشيت راجع بها بفترة .. الا وطرف السيارة الخلفي انحدر فجأة ... السيارة كان تصرفها طبيعي والحمد لله لاني ما كنت اسرع ابد ... خففت ونزلت اشيك ايش اللي صار .. الا وانا اقول وين راح الاطار ؟؟؟ طالعت يمين وشمال ما لقيت شي لان الوقت ليل ... جيت بنزل الاطار الاحتياطي بس قلت كيف الحين بركبه والصواميل طاروا
اتصلي باخوياني وطلبت مساعدة صديق ... ولما وصلوا .. بحثوا على الاطار الطاير ولقوه .. وقاموا باخذ صامولة من كل اطار ومسكوا بها الاطار الرابع (زين ان مكان الصواميل ما خرب)


واللي اذكره من الاطارات اللي انفجروا

ان الاول لما كان عندي المرسيدس التعبان <<< اذكر ان الامور مشت على خير ما يرام عند الانفجار ... لكني اضطريت اني امشي على الجنط الى اقرب بنشري مشان افك صواميل الاطار .. ما قدرت افكهم لانهم كانوا مكبوسين بقوة ... والبنشري كمان ما قدر يفكهم لان الدريل (مسدس فك الصواميل) حقه صغير واضطررت اني امشي على الجنط الى بنشري ثاني وهناك فكيناه واستبدلناه بالاحتياطي

والثانية رايحة عن بالي الحين وما اتذكرها

والثالثة انفجر علي الاطار الخلفي من السوبارو .. والحمد لله كنت امشي 110 << معود نفسي على الركود

ولما سمعت الصوت افتكرت ان الكنداسة ضربها شي وانثقبت

لانه السيارة ما بين عليها شي << ممكن لان السيارة سحب امامي والاطار اللي انفجر مو من الاطارات اللي تحرك السيارة .. ولا كان ممكن انها تلعب بي شوية

طبعا .. اللي سويته اني اعطيت اشارة لليمن مشان اتجه للجنب ورفعت رجلي عن البنزين بشويش الين ما صرت بطيء ووقفت السيارة

طلعت اشيك على الوضع ولقيت الاطار منفجر ... جيت افك الاطار .. وخويي الطيب ما ادري كيف جا بيفك الصواميل وكسر المفتاح .. انا كنت اطلع الاطار الاحتياطي .. اتصلنا بصديق وزين انه لساته على الطريق وما تعدانا الى العمل .. طلبناه واخذنا منه المفتاح واستبدلنا الاطار

ولما مشينا 10 دقائق انفجر علينا الاطار الاحتياطي << الطيب متنعم داخل جنطة السيارة في البرودة وما حط رجله على ارضنا الحارة من زمااااان ... ما استحمل الوضع

فايش نسوي ؟؟؟؟ ما لنا الا اننا نمشي على الجنط على الهايوي الى اقرب محطة فيها بنشري ... ولما وصلنا ما لقينا نفس مقاس الاطار

طلبنا مساعدة الجمهور .. الكل يفتي بشيء مختلف عن الثاني

فخلينا السيارة واقفة ورجعنا الى خيار الاتصال بصديق مشان نروح ندور على اطار مناسب ... وتبهذلنا لين ما لقينا المطلوب وركبناه وافتكينا

وبالختام ... فيه عندي الاطارات الخلفية تعبانة وممكن انهم ينفجروا باي وقت << فانشاء الله تتيسر امورنا (على الغلاء الحاصل وقلة الرواتب) ونقدر نستبدلهم قبل ما يبهذلونا

وشكرا على الموضوع المفيد

انا الحمدلله ماقد انفجر علي كفر ولكن انفجر وكنت راكب معه

تصرفه سليم جداً ماشالله عليه

بالبداية اول ما انفجر الكفر انا اخرشت ولكن هو كانت اعصابه هاديه شوي ولو لو كنت مكانه كان انخرشت وكحيت الفرامل من الروعة

بس اول ما انفجر بهدوء اعصاب حول القير على العادي وصار يرد نمره ورا نمره حتى صارت السرعة 50 وبعدها شوي مرررره فرامل حتى توقف الاشارة ولاتنسى الفليشر اهم شي هو لأن حوادث كثيرة تصير لان اللي وراك ما انتبه لك والطريق سريع ماشي وانت بنص الطريق مهدي

يعني حاول ترد نمره لين تصير السرعة معقولة جداً 30 ولا 40 بعدها شوووي على الفرامل حتى توقف فيك السيارة

السيارة كانت ميتسوبيشي 2003 وقت انفجار الكفر كان 2005
والكفر ميشلان الظاهر برضو 2003

السرعة :150 كم/س
بس والله بغينا نموت لان الموتر هز هزة قوية اول ما انفجر يعني اي حركة بسيطة بالدركسون كان لعب فيك الموتر سلام سلام
بس ستر ربك والسرعة شينة

انا انفجر علي وكان معاي ٣ والسياره كورولا وكنا مسرعين شوي
عادي هديت بالفرامل مع انهم خرشوني لا تهدي بالفرامل *-*

يمكن اذا السياره دفع خلفي والكفر المنفجر خلفي تكون المشكله انك تهدي بالفرامل لانها بتغير من وزنية الموتر - وجهة نظر-

هلابكم انا انفجر علي ولكن بفضل الله ثم رساوة الموتر (بيوك 83) مايحتاج تعليق كان نوع الكفر يوكوهاما موديله 2001 وكان عمر الكفر 3 سنوات وكان ممشاي 140 وانفجر علي وانا بنعطف لكن الموتر ياجبل مايهزك ريح ماشاء الله ثابت ولاتحرك وتركته يهدي من نفسه لاتفضي القير ولاشي العكس لوتفضي راح يخف الموتر لكن لوكان على نمرة وحده يكون شاد معك شوي يمكن تشده بنمره راح يفقد توازنه الموتر خله على راحته وثبت الطاره ولاتمسك الفرامل ابد الا من 70 وتحت وبشويش وربي يكفيكم الشر ويحفظ ابناء امة محمد صلى الله عليه وسلم وبالتوفيق...............

انا ماتعرضت له

بس كنت مع واحد تعرضنا له

تصرفه كان

ثبت الدركسون حط القير N ومثبت الدركسون لين هدت السيارة ووقفنا ودق فلشر