مساكم الله بالخير جميعا
احب اعلق على بض الاقتباسات وللتوضيع كان معي bmw 2008 الفئه الخامسة 525 مع العلم اني يوميا اداوم من الرياض للخرج من 4 سنوات يعني حافظ الطريق اكثر من اسمي ..وأبدا بتعليق اخوي نيساني
بالنسبة لنظام التعليق واعتباري له سئ بالمنعطفات وتكلمت وحكمت عليه بأنه سئ من واقع تجربه ومقارنة بسيارتي السابقة وللتفصيل اكثر عن هالموضوع سلمك الله فيه على الطريق وانت رايح للخرج بعد ما تتعدى المنطقه الصناعية وقبل نهاية الطريق يجيك مفرق على اليمين ومقسوم يمين يرجعك الرياض ويسار يطلع على طريق الخرج طبعا على الـ bmw كنت اخذ المنعطف وعلى طول الكبري على سرعة 110 وانا مرتاح وفيه مجال اني اوصل للـ 120 لكن جربت ودخلت المنعطف بنفس السرعه على الانفنتي وحسيت اني على وشك افقد السيطره على السياره وتحس بثقل المنطقه الخلفية أثرت على ثبات السياره يعني تحس انه بتزحف من ورا ونفس الكلام صار معي في اكثر من مكان مختلف
والله مادري بس انسايد لاين ادخلت السياره M56s في منافسه في سباق التعرج والانزلاق وحققت نتائج افضل من بي ام دبليو الفئة الخامسة الجديدة 550i
ممكن يعود السبب ان فئة S السبورت فيها نظام 4was وهو نظام التوجيه النشط للاربع عجلات الي يحرك العجلات الخلفية ايضاً بشكل خفيف في المنعطفات والمناورات المفاجأة لأفضل نسبة توزان لهذه الحالات
وبالنسبة لصرفية الوقود ذكرت حتى مع استخدام النظام الاقتصادي للقياده اعتبر السياره تصرف بشكل كبير مقارنة مع الـ bmw لكن ارجع السبب وهذا تحليلي الشخصي لقوة المحرك
طبيعي، سيارتك السابقة 2.5 لتر وهذي 3.7 لتر، اكيد تحس بفرق
وبالنسبة لثبات السياره على السرعات العالية ومن بعد الـ 160 اذا الطريق مستوي ولا فيه هوا امورك تقريبا تمام لكن غير كذا ما تحس بالثقه اللي تعطيك اياها الـ bmw مع العلم ان العام الماضي سافرت لدبي من طريق حرض الظهر وكان هوا قوي طبعا على سيارتين انا بالـ bmw وكنت امشي 200 ومرتاح بالسواقه ولا فيه اي ملاحظات او خوف رغم ان الهوا كان بقوه ملحوظه وزميلي كان معه لكسز 2007 es350 وكان يتصل علي وحنا بالطريق يقول ياخي هد السرعه ترا الهوا قوي انا ماقدرت اتعدى الـ 150 يقول احس الهوا بيقلب السياره وبعدا ما رجعنا بفتره بسيطه طبعا باع اللكزس :ch19: وغير كذا ,, على سرعة 200 بالـbmw يمديك يعني تترك الدركسون اذا بتسوي لك شغله سريعي سريعي يعني اذا بتولع زقاره مثلا او بتفتح علبة عصير لانك تحس بثقل وثبات الدركسون اما الانفنتي ما يطاوعني قلبي اسويها لانه حتى على السرعات العاليه فيه خفه بالدركسون بتردد معين وبالنسبة لي اذا بتختبر ثبات السياره خلك على سرعه عالية بخط مفتوح ويكون فيه هوا هنا يبان معك قوة وثبات السياره
المفترض السياره فيها ثبات عالي والجماعه جربوا يوصلون 240 وفوق بدون مشاكل
وانا مشيت بسيارتي ماكسيما 2010 على خط الاحساء بسرعة 220 تقريباً بثيات عالي رغم ان الشارع تعبان حتى الجماعه الي معي قاموا يمدحون بثبات السياره ولاكائها تمشي هذي السرعه
واسمع عن الانفينيتي اكثر من ذلك في ثباتها فأنا مستعجب شلون معاك بعد 160 الثبات ضعيف وخطير!!
وبالنسبة لنظام عدم مغادرة حارة السير ممكن صح كلامك لاني ماذكر اني استخدمت الاشاره لكن انشالله بجربه مره ثانية لاني كنت افتقد هذه المعلومة :smilie16:
وللمناطق العمياء قلت انه كويس لكن مع الزحمة بيكون عديم الفائده لانك بتتعود على المؤشر شغال على طول ..
اما لنظام الرادار انا لاحظت لمرات كثير انه يوم تدخل سياره جديده للمسار النظام ما يتصرف حتى اني اترك السياره لدرجة اني شوي وادفه ولا يتدخل النظام وبذلك يصير وصلت لمرحله لازم اني انا اتدخل وامسك بريك :confused1:
مساك الله بالخير اخوي وضح النقاء بالنسبة لما ذكرت لثبات السياره كلامك صحيح ان 80% من ثبات السياره المسؤل عنه نظام التعليق لكن لاتنسى ان الـ FX اعرض واثقل من الـ M وهذا عامل مؤثر وحسب علمي بأن نظام التعليق الموجود بالـ FX نظام تعليق رياضي .. بالإضافة لان الاختبارت اللي تتم على السيارات تكون في اماكن مخصصه لاختبار السيارات مو مثل الاستخدام اليومي والطرقات العامه والاجواء اللي تتعرض لها السياره وخصوصا عندنا بالطرقات السريعه بين المدن
مقاطع الفديو كلها حوادث الله يكفينا شرها :blue:
نظام تعليق كل سيارات انفينيتي نظام واحد عدى الكيو اكس فهو يستخدم الهيدروليك
وحسب التجارب الام افضل من الاف اكس في المنعطفات والانزلاق مع العلم السيارتين فيهم 4was بالنسبة للفل
مساك الله بالخير اخوي the 1st fx50 وارحب بمداخلتك وتم التوضيح اعلاه لما ذكرته بالتعليق على الشباب نيساني و وضح النقاء
اخوي AL FAHAD ما جربت الـ m56 لكن كنت اتكلم عن الـ m37 بالصرفية اما بالنسبة للفرامل فعلا جدا فعاله وبشكل قوي وهذي ميزه نسيت اذكرها صراحه تحسسك انك مسيطر على الوضع في حال اضطريت لاستخدام الفرامل بشكل مفاجئ وقوي وتعطيك الثقه :xyxthumbs: وافضل من الـ bmw بمراحل وانشالله راح اجرب نظام عدم مغادرة المسار لكن بأستخدام الاشاره ..
واعذروني على الاطاله والتأخير
وانشالله راح اشترك برابطة انفنتي :smile:
