السلام عليكم ورحمة الله وبركاته ..
طبعا الكل يعرف مشكله اصوات الديكور بالتاهو واليوكن واللي تضايق أغلب ملاكه , مع العلم ان الاصوات ماهي بذيك الدرجه المزعجه لكن الواحد ماوده يسمع اي شي بسيارته .
عموما , سيارتي موديلها 2007 وماشيه تقريبا حدود 160 الف ( ماشاء الله ) , واستخدامي لها كثير جدا بالبر , ويمكن هالشي ساهم في اني اسمع اصوات الديكور بالطرق السيئه او المحفره , وبرضو يمكن بسبب ان الديكورات انفكت من قبل بسبب الايرباقات .
عموما حاولت اشوف حل يخفف من هالاصوات ويا حبذا لو ينهيها من الاساس خصوصا لما امشي بالردميه ( طرق وعره ) اسمع اصوات طرب جوا السياره تحسسني ان السياره شوي وتتفكك , وجوا المدينه بالطرق السيئه برضو تطلعلي اصوات لكن خلاص تاقلمت معها وماهي مزعجه زي الاصوات اللي تطلعلي بالطرق الوعره .
وجلست اختبر هالحل لمده شهر تقريبا وخليت اخواني يستخدمون السياره ويشوفون هل فيه فرق كبير عن اول ولا لا , والحمد لله ان الاجابه طلعت نعم وبفرق كبير عن اول .
طبعا هاللي سويته ماكلفني الا 200 ريال بس , وما تحسفت ابدا اني حطيتها فيه خصوصا ان النتايج مرضيه بالنسبه لي واطمح للافضل اكيد .
نجي مع الصور
تفك ديكور الباب , والطريقه بكل بساطه تروح لمساكه اليد اللي تفتح الباب بتلقى وراها مستطيل مربع لونه اسود , تنقزه من مكانه وبتلقى مسمار وراه تفكه . بعدها تروح للمكان اللي تدخل يدك فيه عشان تسكر الباب ( يارب فهمتوا :bigggrin: ) وبتلقى وراه مستطيل بعد تنقزه وبيجيك مسمارين وراهم تفكها , وبعدها تنقز الكلبسات من جهة اليسار بسكروب او بـ اي شي تبيه , ( حبه حبه لا تنكسر لانه حساسه ) .
هذا شكل الديكور من ورى , وراح تشوفون بالصور الجايه وش لقيت فيه .
مثل ما انتوا شايفين واضح الكسر , والحل لها هو انك تلحمها , وبتشوفون كيف بالصور الجايه .
هذي صوره لكلبس مكسور بعد .
هذي بعد ما لحمناهم , طبعا قلت له ليه ما تلحمها على طول قال لان سمك الديكور نحيف جدا , لو لحمه ببعض على طول يمكن يخرب شكل الديكور من الجهة الثانيه .
****
بعد ما خلصنا من هالمرحله , بنجي لمرحله الاسفنج اللي بحطه بين الديكور والباب , طبعا الاسفنج لازم يكون من النوع النحيف لانك لو ركبت الاسفنج الاصفر ( عريض ) احتمال كبير يضغط على الديكور ويطلع الكلبس من مكانه .
يحط غراء عشان يثبت الاسفنج عليه .
بعد ما ثبت الاسفنج , وتفتح فتحتين صغار عشان المسمارين اللي يمسكون الديكور .
طبعا يمكن تقولون ليه ماحطيت على كامل الباب اسفنج , السبب لان الجزء العلوي مثل ماوراني هو قريب جدا من الديكور ويلامسه , اما الجزء السفلي فيه فراغ كبير بين الباب وبين الديدكور فـ مستحيل يتلامسون .
عند تركيب الديكور .
* وطبعا تتسوى نفس هالحركه لكل باب .
****
نجي للجزء الاخير من الموضوع ..
الباب الخلفي ( الشنطه ) لاحظت ان فيه حكات في الفراغ بينه وبين الديكور , وتوقعت ان الديكور يضرب في زاويه الباب ويحكه وهالشي اكيد بيطلع صوت .
والحل بسيط جدا , تحط لزق ابو وجهين بين الديكور والشنطه على كامل الباب , وتنتهي الحكايه ( اسف على عدم وضوع الصوره ) .
في الختام , فيه بعض الاصوات اكتشفتها بعد ماصار الباب ثابت ومايطلع اي صوت مع المطبات والطرق .
1- صوت بـ ازارير البيبان ..! انا مثلكم مستغرب :bigggrin: وكان قلق ومزعج بنفس الوقت , يوم حطيت اسفنج عشان اثبته موقتا بس على كل الازرار , ما سمعت ولا صوت بالسياره
2- طلع لي صوت صرصره من الخلف , وحاولت اصفط الكراسي الخلفيه كرسي كرسي لين اعرف مصدره , واتضحلي انه من قاعد الكرسي الخلفي , حطيت عليها فازلين وبعدها اختفى الصوت .
في النهايه زي ماذكرت لكم الحمد لله راضي عن التغير اللي حصل بالسياره وما تحسفت ابدا اني سويتها , خصوصا انها بمبلغ بسيط لكن تعطيك فرق كبير .
الموضوع اهداء لمنتدى السيارات بشكل عام , ولملاك التاهو واليوكن بشكل خاص , اتمنى عند نقل الموضوع ترفق اسم المنتدى واسمي الله لا يهينك :bigggrin:
والف شكر للجميع ...
TAHOE_LTZ
