ماهو سبب ظهور لمبة الماكينة البرتقالية؟

بسم الله الرحمن الرحيم والصلاة على محمد وأله الطيبين الطاهرين اخي العزيز ان مصباح السيرفس الاصفر في حالت سيارتك لا يبعث على الخوف فسبب توهجه هو استبدال حساس ضغط الزيت كون الجديد ليس لهو نفس القراءات الكهربائية وهذا مايتحسس به كمبيوتر السياره فينبهك بالمصباح ****الحل : ان تستبدل الحساس مره اخرى ولكن بواحد من نفس النوعيه والموديل -------- ومن الله التوفيق

شكرا اخي هدير المحركات على تجاوبك ومرورك الكريم
السيارة الحمدلله مافيها اي شي الا اللمبة البرتقالية للمحرك تشتغل وتطفي وماعرفت السبب !!؟
أفيدوني أفادكم الله
وشكرا

زي ماقالوا الشباب

الحكاية حكاية حساسات ، والحساسات كثيره وموزعه بأجزاء معينه بالسياره

مثلا حساس العادم ( الكنداسه ) يكون مع السنوات والإستخدام متوسخ بالكربون تبع دخان السيارة ، ومايعطي أشارات صحيحه لكمبيوتر السيارة عشان يحدد كمية البنزين ، فتطلع لك العلامة أنه فيه خلل في أحد الحساسات
هذا على سبيل المثال

عندي سؤال : السيارة ماشيه تمام معك ، تشتغل وتمشي طبيعي ؟

حياك الله اخوي

والله شوف يالغالي ..اول شي موترك سعودي ولا امريكي
اذا امريكي ترى عادي تكون موجوده دايم ..حالها حال الكوابريس والفوردات

كان عندي فورد كراون فكتوريا ..اشتغلت لمبه تشيك انجين..ماعرفت ايش المشكله
وديتها فحص كمبيوتر طلعت الحساسات حق الكنداسات..الدبات اللي تحت القزوز..خربانه
نضفوها وعدلوها وطفت اللمبه ..ورجعت مرره ثانيه ..بعد فتره طبعا ..طلعت الحساسات اللي موجوده في الاربع الكفرات ..الي هي تابعه لنظام مانع الانزلاق..وديتها الفحص واكتشفو الخلل
وغيرت الماطور ( المنظم ) حق مانع الانزلاق لانه سرت اذا جيت امسك بريك بقووه ..التواير الاماميه سارت تمسك على طول ..واول لما كان النظام شغال كانت تمسك وتفك عشان تقدر تتحكم
بالسياره ..فلا تخاف مشكلتك بسيطه ولا توسوس واجد ..وبعدين انت الله يهديك وش مجلسك هنا ههههههههههه..روح افحص سيارتك كمبيوتر وريح نفسك ..وترى الشغله ماتسوى بالمره كلها عشر دقايق وتعرف ايش المشكله

تقبل تحياتي

للمعلومية السيارة يوكون 2005

انا صارت معي وكانت المشكله من حساس والحمدلله غيرناه وراحت المشكله والفحص امره سهل نصيحه افحص وشوف ايش الخلل .

اخواني خايف اروح عند احد مايفتهم يقوم يسوي فيها شي ونكون بشي ونصير بشي ثاني!!!

اريد احد صارت معاه المشكلة وحلها لو تكرمتوا وجزاكم الله الف خير

انا عندي نفس المشكله

هو حساس فيه شي عندك محتاج تغيير بس شف ايش

والضاهر ماتبان الا بالفحص بالكمبيوتر انا مطنشها لان اغلب الاشياء الاساسيه سليمة

هلا أخوي أنا نفسك معي يوكون 2005 ونفس المشكلة
أنا وديتها للورشة قال لي نفس الكلام افصل البطارية وبتروح وزي ماقلت راحت يومين ورجعت والحين كل يومين تروح ويومين تجي وانا كان عندي من قبل خربانة طرمبة البنزين وغيرتها مع حساس ضغط الزيت وطلعت هالمشكلة اما قبل كان ماعندي شي وانا اتوقع المشكلة من هالحساس وشف اخوي انت شيك على الحساس

وينكم شباب ارجو المساعدة....!

يعني يا شباب ماكو حل ؟ ارجو ان تساعدوني ولكم الشكر

لازم تفحص كمبيوتر وبعدين يطلع السبب

شيك على الكتالوج..على حسب ما اعرف ان عدد مرات الاشارة لها علاقة بالمشكلة....يعني اذا تولع ٣ مرات متتالية ثم تطفأ لثواني معناها المشكلة تكون كذا...واذا ولعت ٤ مرات متتالية ثم تطفأ لثواني..معناها المشكلة تختلف ...ما ادري اذا كلامي مفهوم..

مشكورين شباب على المعلومة القيمة سويتها امس راح الضوء واليوم الصبح رد!! مادري شنو السالفة!! وخايف اروح عند احد يسوي نفسه سوبرمان وفهمان ويخربلي كلشي!!
شباب اللمبة هذي فيها ضرر؟؟ وشنو سببها بالضبط وحلها ؟؟
وشكرا

هو يقصد ان ممكن يكون من احد حساسات المكينه او احد حساسات الشكمان وهذي ما تظهر الا بفحص الكمبيوتر او مهندس خبير بالجموس

ولكن عموما ومبدئيا افصل البطارية لمدة ربع ساعة ثم رد اشبكها مره ثانيه
وحط المفتاح بالسلف وفره الين ماتشتغل انوار التنبيه بالطبلون من دون تشغيل السيارة لمدة دقيقة ثم شغل

شكرا اخوي kaji على مشاركتك ولكن ممكن توضحلي اكثر شلون حساس؟ لاني مافهمت السبب بصراحة واتمنى من كل من عنده معلومة يفيدني فيها لان لحد الان ماعرفت سببها وخايف تكون خطيرة على المحرك!!
ولكم كل الشكر