أستشيركم في سيارات مستخدمة حسب ميزانيتي

الله يكتب الي فيه خير من السيارات و الله ييسر زواجك و يبارك فيه.
من بين الي كتبته ما أشوف شيء يلبي كل الصفات المطلوبة عندك. الي مريح صيانته غالية. و الي مواصفاتها معقولة ما يمسك سعر ... و هكذا.
لكن برأيي من بين الي فكرت فيهم: لكزس GS . لكن نصيحة لوجه الله افحصها و خذها نظيفة صح. اللكزس لو خربت تفاجأت أن يكلف أكثر من الألماني! يبغالك ركادة بهالسيارة. اطلعت على إصلاحات سيارات لكزس لدى بعض الزملاء , و الله ما هي رخيصة!
غير ذلك و حسب إفادة أعضاء كثر في منتديات لتويوتا: أن القير به عيب مصنعي من مويدل 2011 للأفالون و الأوريون و اللكزس ES350 , و رفعوا شكوى للشركة عشان إهمال الوكيل و لا عندك أحد! يعني يوجد عيب مصنعي على كلامهم. فالأسلم أن تجتنب هذا الموديل. صح بيجي واحد و يقول أنا معي 2011 و لا صار شي , أقول: العيب المصنعي إما يصيبك أو يخطئك. بس هو فعلاً عيب مصنعي و تكرر.
و الأفالون حساسة أيضًا تحتاج اهتمام خصوصًا في أعطال الكهرباء. بس بصراحة رساوتها و عزل الصوت سيئ. ما كأنها سيارة فخمة كما تظهر للناظر , و سعرها الفل 150 ألف تقريبًا و زيادة!!
الجينسس أو الأزيرا لا تاخذ مقلب فيهم بأن صيانتهم رخيصة , أيضًا أفاد أحد الأعضاء عن تكاليف صيانة أزيرا العجيبة , فما بالك الجينسس؟ تقول أنها ألماني!
المكسيما فخمة و مريحة ما تختلف , حتى قطعها مو غالية على فكرة. لكن ما تمسك سعرها. كذلك تكرر مشكلة في القير حقها حسب ما يُقال , و الله أعلم. الألتيما بصراحة خيار جيد لو تفكر فيه.

خياراتي لك:
1- أكورد 2008 إلى 2011. سيارة بتريحك في كل النواحي و مريحة بس عزل الصوت ليس كالسيارات الفخمة. لكن سيارة يُنصح بها. و الهوندا يمسك سعره بشكل ملحوظ.
2- ألتيما 2010 أيضًا يقال فيها ما يقال في الأكورد. و قطعها أرخص لو احتجت شي. و سعرها أقل تلقاه يعني أقل في مسكة السعر لكن تظل معقولة السعر عند البيع.
3- مازدا6 موديل 2010 مثلاً. تلقاها رخيصة. أيضًا المازدا ما تمسك سعرها بقوة , لكن ما عدا ذلك كل شيء إيجابي. و من يقتنيها يرتاح فيها زمن طويل. و أسعار قطعها عادية.
4- متسوبيشي لانسر EX محرك 2.0 لتر. صحيح ما هي سيار فخمة لكن الراحة فيها ما شاء الله و الرساوة كذلك. و عزمها ينافس كثير سيارات 6 سلندر بفضل قير CVT الي فيها. سيارة لك و للزمن ما تخرب إلا نادرًا , و لهذا قطعها غالية نوعًا ما. أيضًا أتوقع أنك لو اقتنيتها ما راح تتركها بسهولة. و سعرها بالمستعمل زي المازدا بالضبط.
5- لو تحب اللكزس ما عندك مشكلة بس حافظ عليها. لأن الفئة GS مكلفة شوي في الصيانة. لكن حليلة و مريحة. و إذا حافظت عليها تدوم معك.

هذا ما لدي في السيارات اليابانية. و أغلاهم في المستعمل الهوندا طبعًا. و نصحتك من منطلق اعتمادية السيارات و صيانتها التي أعرفها أو جربتها., لا أنصح من منطلق الانتشار الغير دال على الجودة دائمًا أو كثرة المواصفات ,, هذا مبدئي.