بعد طول إنتظار .. تم بدء بيع رائعه شيفروليه الجديده إمبالا 2014 بشكلها الجديد كليا بعد فتره طويله من خفوت ضوء اسم امبالا بين السيارات بسبب إهمال شيفروليه لها وتخلفها عن المنافسه .. ولكن الأن عادت السياره بجيلها العاشر أفضل من أي وقت مضى وجاهزه للمنافسه بشراسه !
هذا هو الجيل التاسع من السياره وما كان يوصل عندنا واغلب مبيعاته بأمريكا لشركات تأجير السيارات والأساطيل الخاصه بالحكومه والشركات الكبرى ومن هنا بدء لقب "Rental cat" وهو زي الإهانه للسياره على انها مجرد سياره تأجرها لكن ما تستحق تشتريها
شفروليه إستجمعت قواها وبدأت في تصميم الجيل الجديد من السياره واضعه نصب اعينها الفورد تورس والافالون تويوتا وهم المنافسين الرئيسيين لها ... وللعلم السياره من فئة السيدان الكبيره وتعتبر رسميه او عائليه ( وتنفع شبابيه ايضا ) زي التورس والافالون والازيرا والكادينزا وليست رياضيه مثل التشارجر ، كنا نتمنى انها تكون بدفع خلفي لكن للأسف ما حصلت ويمكن السبب لانه اغلب المنافسين توجهوا للدفع الامامي بما ان تكلفته أقل وهم يبون يبيعونها بسعر منافس .. الي يفضّل الدفع الخلفي انصحه يتوجه للكرايزلر لكن الله يعينه على الوكيل ويبعععد عن الكابرس الموجوده عندنا لانها من 2007 نفس الشكل ومشاكلها كثيره جدا والله انها عندنا وانواع التفكك واصوات الطقطقه مع انها ما مشت الا حول 80 ألف .
شفروليه امبالا 2014
بدء بيع السياره في وكالة الجميح والتوكيلات العالميه وهنا بأذكر أبرز مواصفاتها والفرق بين الوكالتين
اولا التوكيلات العالميه وهي الأفضل وكلامي كله عن فئة الفل كامل LTZ
1- تتوفر بجنوط 19 وجنوط 20
2- فيها ملاحه
3- فيها تبريد وتسخين مراتب
4- كاميرا وحساسات خلفيه
5- نظام النقطه العمياء
6- نظام التنبيه من الإصطدام الامامي
7- نظام التنبيه عند الخروج من المسار
8- 9 سماعات BOSE
وسعرها كان متقلب جدا جدا جدا للفل كامل .. اول مره قالي 143 قبل ما تنزل بعدين قالي 139 بعد كم يوم بعدها 140 بعدها 141 وقبل ثلاث ايام عارضينها بـ 146 بفرع الدائري الشمالي ! لكن اغلب الاعضاء يقول حول 140 على كلامهم ( انا كل يومين عندهم خلال شهر رمضان )
اما عند الجميح كان السعر مميز بـ 136 ألف شامله كل شي على كلام الموظف لكن فيها نواقص عن الي عند التوكيلات ولاحظتها بالنظر يوم شفتها بالمعرض
1- مافيها حساسات بلايند سبوت ( المرايات ساده ماعليهم اللمبه )
2- مافيها تنبيه الخروج من المسار ( الزر مشيول )
3- مافيها نظام الصدمات الاماميه ( الزر مشيول من الدركسون + الكاميرا الي ورى المرايه الي بالنص مكانها بلاستيك )
4- عدد السماعات أقل
ممكن عند البعض احسن انه يوفر 5 الاف تقريبا ويستغني عن مواصفات يعتبرها كماليه مثل انظمة المراقبه ، والبعض يعتبرها ضروريه وتستاهل خمس الاف ريال فرق
اما فئة الاستاندرد فهي بـ 108 الاف عند الجميح و110 عن التوكيلات وفئة النص فل بـ 119 عندهم اثنينهم وطبعا بما ان السياره جديده توقعها تقلبات كثيره بالسعر سواء زياده او نقصان
