بسم الله الرحمان الرحيم
السلام عليكم ورحمة الله وبركاته .
اعتقد كثير من الناس يبغى يعرف كيف السيارة وللأسف سيارة التجربة ما تم توفيرت إلا متأخر في المنطقة الشرقية , وغير كذا البعض ماعنده وقت يروح لهم يجرب السيارة خاصة مع مماطلتهم .
ندخل للموضوع انا راح احاول اكتب لكم ملاحظاتي من ايجابيات وسلبيات في السيارة بس هذي ملاحظات مبدئية والسبب اني جربت السيارة تقريبا 40 دقيقة او 19 KM والي يقدر يعطيكم معلومات اكثر الي اشتراها ومشي فيها 10000 او اكثر . والسيارة الي جربتها هي ال IS350 فئة سي سي لونها فضي . نبدأ :
الإيجابيات والمميزات:
1- السيارة فيها مواصفات كثير مثل قارئ ضغط الكفرات وملاحة وكاميرا خلفية وحساسات .
2- الشاشة حسيت انها صغيرة وهي مغلقة بس طلع حجمها جدا مناسب بعد التشغيل وماشاء الله مكانها حلو وغير كذا ابعاد الكاميرا جدا حلوة .
3- المرايا الداخلية فيها التعتيم الأوتوماتيكي والخارجية فيها خاصية الإنطواء , وايضا المرايا الجانبية تنزل على تحت في حال الرجوع للخلف .
4- شكل السيارة مرة حلو وفي الإشارة ناس كثير كانوا يشوفوا السيارة متعجبين .
5- المساحة الخلفية كانت جيدة بحيث اني جلست في الخلف مرتاح .
6- السيارة راسية وماتمايل في المنحنيات وتحسها قطعة وحدة .
7- جودة السيارة مرة حلوة (تحس بجودة المواد الداخلية وتماسكها ) .
8- السيارة عزمها حلو , تمشي فيها وانت مرتاح وصوتها اثناء التسارع جدا حلو بالنسبة لمكينة 6 سلندر .
9- جلسة السيارة حلوة وتحسها كوبيه ورياضية درجة اولى ( ماحسيت اني في سيارة سيدان ) .
10- الدفع الخلفي جدا جيد وتلاحه في تصرف السيارة اثناء القيادة .
11- السيارة مع انها خشنة إلا انها حلوة في المطبات الصغيرة والتشوهات الي في الشوارع ( هذي كثر منها كل شارع تحصل فيه كم نوع من الإسفلت ) .
12- يوجد فتحات للتكييف في الخلف وهذي ميزة جيدة جدا , ومفقودة من السيارات الصغيرة الي بحجم هذي السيارة .
13- البريك عجبني و تحسه معتدل مو مثل سيارات التويوتا (الأف جي او الكامري ...) . الكامري مثلا اذا ماضغطته كفاية مايمسك واول ما تضغط رجولك شوية بس يمسك بشكل مبالغ فيه .
السلبيات :
1- مساحتها تكفي بس لسى تحسها صغيرة مقارنة مع السيارات السيدان الكبيرة , وتحس بصغر السيارة عند الجلوس فيها ( مثل ماوصفتها تحس انك في سيارة كوبيه , لكن البعض يحب تكون السيارة واسعة من الداخل) .
2- السيارة رياضية وتعتبر قاسية مقارنة مع الES والأفالون , وكثير يبغى سيارة مايحس بالمطبات فيها .
3- العزل الأرضي للسيارة متوسط الي جيد مثل العزل الارضي في الهوندا اكورد الجديدة , قد يكون السبب هو كفرات دنلوب ( انا سيارتي الحالية غيرت كفرات دانلوب بسبب الإزعاج ) .
4- المكيف يعتبر عادي ( احس تبريده مثل تبريد مكيف الكامري 2010 , يعني مايتقارن مع الاف جي والاندكروزر ) .
5- الإضائة النهارية احس انها غير جيدة لانها داخل الصدام فماتقدر تشوفها إلا اذا كانت السيارة بعيدة اما من قرب ماراح تشوفها.
6- مكان الأكواب غلط , بحيث ان الي راح يجلس في جهة الراكب ممكن ينزعج منه .
7- بريك التوقف او الهاند بريك حسيته قديم ( بالرجل مو الكتروني او حتى باليد ).
8- الإشارات (يمين و يسار ) حسيت ان صعب توقفها لو مثلا اعطيت اشارة لليمين وغيرت رأيك .
........................................
هذا الي لاحظته وإذا تذكرت اي شيئ راح اضيفه للموضوع ان شاء الله .
