888888
ما شاء الله
مع انها اقل فئة من GS
بس زين حصلنا احد من الشباب جرب Q50
ادري طلبي مو هذا مكانه .. بس ياليت تعطينا لو باختصار عن تجربتك ورايك بالـ Q50
راح اقارن بين الانفنيتي g35s لاني امتلك وحده حاليا 2007 و بين ال Q50
و جربت 2008 G37s كوبية عند قريبي.
اللي جربتها كانت Q50 عليها كل البكجات ماعدا السبورت باكج ولاكن جنوط 19 بدون بريكات الكبيره و بدون التعليق الرياضي.
التسارع ممتاز و تحس بفرق واضح عن الموديل اللي قبله سواء السيدان او الكوبيه.
تعاشيق القير ناعمه اكثر من اللي عندي خصوصا انه 7 غيار ولاكن فيه تعديل عن ال 7 غيار حق ال 2012 لاني جربتها قبل سنه تقريبا ولاكن الفرق مو كبير.
العزل الارضي ممتاز مع العلم ان الكفرات كان هواها 45
عزل الهواء اكثر من ممتاز بما ان التجربه كانت في اجواء فيها هواء قوي شوي
اعلى سرعه وصلت لها كانت 140 كيلو او 80 ميل
السياره فيها جميع الانظمة المساعده مثل النقطه العمياء و الخروج عن المسار و التحذير من السياره اللي قدامك و غيرها كثير.
اللي ابي اتكلم عنه وضعيات القياده اللي هي ECO السياره تصير ثقيله بشكل ملحوظ و الدعسه تثقل بشكل واضح كل ما تدعس تحس شي يرد الدعسه و القير يعشك بدري عشان يخلي المكينة على دورات نازله ولاكن اذا دعست الدعسه كامله على طول يفصل نظام ECO و تصير السياره عاديه و مجرد ما ترفع رجلك عن الدعسه على طول يرجع يشتغل نظام ECO.
نظام التوجية الجديد شي خرافي جدا جدا جدا
تقدر تختار درجة ثقل الدركسون و حدة توجية الدركسون.
بالاضافه الى انك مستحيل تحس في اي اهنزاز بالطريق تحس ان الطريق ناعم مع العلم ان الازفلت عادي و فيه بعض الحفر ولاكن ما تحس فيها بالدركسون ابدااا.
الشي الحلو انك تقدر تغير الوضعيه و انت ماشي على اي سرعه.
لاحظت ان الدركسون سيدا مع العلم ان الجو كان فيه هواء قوي شوي و ماتحس اي مقاومه بالدركسون.
نظام الشاشه الجديد جميل جدا و النظام السمعي افضل من اللي قبله بفرق شاسع 14 سماعه مقابل 9 سماعات.
الشي اللي ما عجبني لما تشغل السياره و تدخل على الاعدادات في الشاشه عشان تغير اي شي تطلع لك رساله النظام قيد التحميل تاخذ تقريبا 5 الى 10 ثواني و بعدها تقدر تدخل على الاعدادات فقط لما تشغل السياره و تدخل لاول مره مباشره بعد التشغيل و بعدها تدخل في اي وقت ما ياخذ نص ثانية.
المواد الداخليه تحسنت و للافضل بنسبه على الاقل 30 بالميه.
جلسة الكراسي مريحه مع ان فيها شوية قساوه ولاكن بالنسبه لي انا وزني 72 اشوف الكرسي مناسب لي.
نظام التعليق قاسي و هادئ بنفس الوقت ما تحس انه يضايق بسبب القساوه و امتصاص الصدمات ناعم جدا.
الشي اللي ماعجبني السياره ما فيها تشغيل عن بعد مثل الالتيما و الباترول.
