وقف على جمب يا سيارة سباق حق سرعة
وقف على جمب يا سيارة سباق حق سرعة
وقف على جمب يا سيارة سباق حق سرعة
وقف على جمب يا سيارة سباق حق سرعة
وقف على جمب يا سيارة سباق حق سرعة
[/COLOR]
بسم الله وبهذه الكلمات التي صدرت من موظف المرور عند توقيفي تبداء قصتي
ابغى احكيكم عن قصة سارت ليا يوم الجمعه بتاريخ 29-11-2013 م يعني امس
قصه تدل على معاناة الشاب السعودي مع موظفين المرور وتخلفهم وجهلهم والي تحس انك تكلم واحد يبيع حبحب على السكين مو موظف مرور
قصتي ياجماعه انا معايا سيارة سيفك تايب ار والسياره معروفه سيارة سبورت يعني رياضية يعني اكيد بتجي مهبطه من بلدها زي الزد وزي الموستينق وزي الكومارو وزي الجينسيس كوبيه يعني نفس الدعسه ونفس التهبيط
الموهم ونا مع صاحبي في طريق الملك رايحين الممشى عشان نهرول جا المرور السري ونا صراحه اسميه الدلخ السري مو المرور السري جا بصوت المكروفون يقولي كلمة وقف على جمب ياسيارة سباق حق سرعه
وقفت على جمب ونزل رجال المرور اخذ اثباتي واثبت صديقي وقال امشو وراي مشينا وراه ابو مشوار ربع ساعه ووقفنا على جمب نزل بعدين قال السياره ليش مهبطه؟؟ انت مهبطها؟؟ قلت السياره من بلدها دعسه واطية وتهبيط شد بلد قال لاء مهبطه قلت كيف مهبطه؟ قال لو انها من بلدها يجي مكتوب في الرخصه سيارة سبورت :confused1:
ياجماعه فيدوني الي معاه جينسيس كوبيه او زد او موستينق مكتوب في رخصكم سيارة سبورت :confused1::confused1:؟
انا قلت انتا معاك كامري مكتوب في الاستمارة حق السياره أمري ياكامري؟؟
الموهم الرجال ضحك وراح للسياره وبعد نص ساعه نادى خوياه وجات 4 سيارات قالو يلا تعال معنا للحجز قلت حجز ايش؟ قالو حجز ان سيارتك مهبطه لاءنك مهبط سيارتك
:smilie16: طبعاً انا وقتها اتوحشت وسرت زي الرجل الاخضر وقلت وربي وربي السياره ماتتحرك ولا حتروح الحجز لاءن السياره مو مهبطه
بتعطوني مخالفه اني مركب استكر هاتو مخالفه بس تهبيط وربي ماتطلع
وبعد هواش جا واحد الي هوا الرقيب قلتلو ياخي انتو ماتعرفو للسيارات قال يعني حنا مانفهم بالسيارات صح؟
قلتلو قول نوع سيارتي جا قال اءء اءءء امم امم يعني قعد ينتع بالكلام
في النهاية مع الصياح والصراخ رحنا للتوقيف حق حوش السيارات .. ملاحظة ركب معايا واحد من المرور واحنا نروح الحجز عشان يضمنو انك ماتشرد وخويي ركب مع واحد ثاني
في الطريق الرجال كان يتكلم معايا كائنه خويي ويقولي ماعليك ماعليك انا ازبطك لمن نوصل هناك.. الرجال كان يعرج على عكاز قلتلو سلامتك والله
الموهم لمن وصلنا هناك رحنا عند المقدم مدري ايش الرتبه وقلت ياطويل العمر سيارتي مو مهبطه تعال شوفها
لمن طلع يشوفها يقول الا مهبطه :confused1:
وقتها قلت ياررب يجيني العقم لو انها مهبطه ياخي انتو كيف الا تبغو تتبلو عليا انها مهبطه
جا قال لاتصيح وقرب من عندي ودف صدري قلت بصوت عالي شاهدين ياجماعه يبغى يضربني من غير سبب اشهدو اشهدو وسويت افلام زي لاعبين الكورة وسامي الجابر لمن يبغى بلنتي ويطيح على الارض في منطقة الجزاء
الرجال خاف يكون سرلي شي جا يبغى يخوفني وقال اناديلك الشرطه قلت نادي الشرطة والهيئة والجوازات انا مني سايب سيارتي واذا بتحجزوها ابغى انحجز فيها وانام في السياره..قال عجيب لا احسن اجبلك سرير قلت ياريت والله مرتبة سليب هاي
قال اقول اطلع برى قلت وربي ماطلع ومني سايب السياره اذا بتحجزوها باجلس في السياره
الموهم جو جماعه هدوني وقالو روح المكتب
فاكرين خوينا الي حكيتكم عنو من المرور الي كان معايا بالسياره ويعرج وقال ماعليك ازبطك؟ تخيلو ياجماعة الخير عند المكتب قلب عليا وقال ذا يسرع بالطريق وصوت السياره عالي ومركب مكينة مو مكينة سيارة ومدري ايش:confused1:
قلت للعكسري حبيبي ترى ربي ماخلاك تعرج من حادث السياره الا من كثر ماتتبلى على الناس واحسن الي سرلك > وربي ياجماعه اني ندمت على الكلمة بس قهرني يقول كلام غلط ويتبلى عليا؟؟ ولا يقول كمان يكلم بنات؟؟<<
الموهم بعد الهواش العسكري يقولي شايف التاج الي على كتفي لبسه ليا الامير محمد بن نايف قلت والنعم فيه والله وربي يحفظه ونا اشتغل بشركة رئيس مجلس الادارة الامير خالد بن عبدالله الله يطول بعمرو
جا العسكري يطالع فيا يبغاني انزل عيني قلت شوف انا ماخاف الا من ربي ومني منزل عيني من عينك جا قال اعطوه محضر قلت ايواه خلوني اكتب محظر واكتب في المحظر انك دفتيني واني اعطيت لخويك بالسياره لبان بنص ريال لبان نوفا واكتب حاول رشوة رجل الامن بلبان بنص ريال
الرجال سكت.. في النهاية قال بتتطلع ولا كيف قلت وربي مو طالع والسياره مو مهطبه ومني ماخد مخالفه ولا حتعطوها مخالفة تهبيط
خويي هداني وقال خلاص اكسر الشر وخد محضر توقيف السياره ويوم الاحد راجعهم وقدم شكوى قلت طيب رحلت للعسكري وقلت زي ماخدتوني ترجعوني:smilie16:
قال كيف يعني؟ قلت والله التوقيف حقكم في بريمان بوسط صحرا وسحبتوني من طريق الملك ونا ماعندي استعداد ارجع ليموزين بوسط صحرا في اخر الليل ولون بشرتي ابيض اخاف يخطفوني ولا شي يحسبوني اسرائيلي ولا بريطاني
ضحك الرجال وقال خلاص وين تبغوهم يوصلوك قلت لبيتي في المحمدية قال ليش احنا تاكسي قلت في قلبي لا توصيل طلبات بيتزا هت:tongue:
الموهم ركبت مع خوويي بسيارة المرور السري كرولا كان نوعها وصولونا بنص الطريق قلت لهم يابو الشباب وقف على جمب باخد ليموزين قال ليش قلت والله كتمه ورا.. طبعن سيارات الامن السري من ورا مقفله ماتقر تتنفس والشبابك حاطين عليها شبك صغير
واخدنا ليموزين ورجعنا لبيتي ,,, وهادي قصتي مع رجال الأمن الابطال الجبابرة الي يخافو على جيوبنا ويعطونا مخالفات عشان رواتبهم لاننقطع
.. بس ياجماعه انا ايش ذنبي ان الي يتشغلو بالمرور شهادتهم ابتدائي وثانوي ومتوسط ومايفهمو شي بالسيارات؟ ايش ذنبي بالله يوقفو سيارتي وويقولو اني مهبط السياره وهيا زي بقية السيارات تجي مهبطه من بلدها زي الجينسيس كوبيه والزد؟ ايش ذنبي انهم مايفهمو في السيارات؟ عطلوني عن الدوام وضيعو خرجتي وقرفوني بحياتي واعطوني مخالفة تهبيط ظلــــــم من غير اي سبب عشان مايفهمو بالسيارات ويقولو مهبطه
حتى لمن سئلتهم هناك ليش ماتوقفو الفيراري مو الفيراري مهبطه؟ والكومارو مهبطه؟ والموستنيق مهبطه ليش ماتوقفوها؟ قالو حنا مانفهم الا في الونيت والتويوتا:confused1:
على العموم يوم الاحد بنروح قسم المرورو شعبة حجز السيارات وان شاء الله اطلعها وان شاء الله نقابل واحد يفهم في السيارات وبعد مانطلعها باشتكي على العسكري الي وقفني والي يحلف ان سيارتي مهبطه كذب والي قلتلو صوم ثلاثه ايام ولاتحلف كذب وفي يدك سبحه
ياجماعه لحد يتسدح على بطنو يجيك بكره المرور في بيتك ويععطيك مخالفة تهبـيط كــرشة:smilie16:
وسلامتكم واسف اني طولت في القصه بس وربي من القهر
