السلام عليكم ورحمة الله وبركاته
موضوعي شويه ملخبط .. أصل الموضوع اني اعاني من ضعف برودة المكيف والوكالة قاموا بتغيير الكومبريسور والرادياتور اكثر من مرة الى ان انتهت فترة الضمان ..
اشتكيتهم بوزارة التجارة والصناعة انهم ما ظبطوا المكيف طول فترة الضمان .. كانت السيارة ماشية 75 ألف كيلو عند نهاية الثلاثة سنوات حق الضمان ورحت سويت صيانة دروية عندهم ودخلت السيارة وسويت الشكوى وبعد ان كانوا رافضين يصلحوها في الضمان قالوا انهم بيصلحوها وعطوني السيارة وقالوا تم ضبط الفريون وتغيير منظم الفريون مادري ايش وحاجات كده ..
المهم استلمت السيارة وتذكروا كانت ماشية 75 الف كيلو وعند الـ 80 الف كيلو وانا ماشي على الخط (دوامي جدة دهبان) والاقيني سامع صوت الماكينه .. للعلم صوت الماكينه ما كان يظهر ابدا حتى لو ماشي 160 ولكن هذا اليوم سمعت صوت الماكينة على 120 وفكرت ان الموضوع يمكن يكون من الشكمان ..
وصلت البيت وكلمت صديقي قاللي غير زيت .. بالفعل رحت اغير زيت لقيت الزيت القديم يختلف عن كل مرة اغير فيها .. لقيته يبغي يصير زي العسل يبغي يلصق بين اصابعك على خفيف كده .. وبصراحة شكيت ان في الوكالة بغوا ينتقموا مني لاني شكيتهم في الوزارة وووارد يكون ماغيروا الزيت في الصيانة الدورية وهكذا يكون الزيت ماشي تسعة الافا او عشرة الاف كيلو هذه المرة .. المهم انا في البنشر وقتها غيرته وقتها بزيت كاسترول 10-30 اللي انا متعود عليه وكنت اغير كل خمس الاف مع الفلتر أصلي دائما ..
المهم الصوت ما راح .. كلمت صديق في الوكالة قاللي الماكينة طيبة بس غير لزيت 20-50 ولا عاد تفكر في الموضوع .. غيرت ل20-50 بعد اقل من 500 كيلو فقط من التغييرة السابقة ولكن حسيت ان السيارة صارت أتقل والصوت ما راح ..
بعدين سألت الاصحاب عن ميكانيكي فاهم ورحت له قال غير لزيت 10-30 لان ال20-50 تقيل عليها خصوصا في الجو الحار وانا لسه ما غيرت الزيت وماشي عليه حوالي ألف أو الف وخمسمية كيلو وابغى اغير تاني ل10-30 ولكن والله ما عندي فلوس دي الايام :confused1:
أتمنى من الخبرات الرفيعة اللي شفتها في المنتدى ده انها تطمني .. عايز افهم الزيت لما خرج بالصورة اللي حكيت عنها دي ومع الصوت ده يبقى ايه الضرر اللي حصل في الماكينة ؟
ويا ترى ايه مدى الضرر اللي حصل في الماكينة دلوقتي واقدر امشي عليها كده ولا لا ؟
مع العلم ان صرفية البنزين زي ما هي ومافي دخان او عوادم غريبة من الشكمان بس السيارة صارت تقيلة شوية لما عبيت ال20-50 وفي انتظار اني اغير ل10-30 تاني واشوف التقل مرة تانية ..
السيارة وهي واقفة صوت التكايات صار واضح شويه .. وهي ماشيه صرت اسمع صوت الماكينه أعلى من أول ..
جزاكم الله كل خير للجميع اللي يساعدني ويفهمني المشكلة واللي ما ياقدر كمان جزاه الله خير
