ابي مشورتكم ونصيحتكم في الدفع الرباعي ماالمناسب منها..

الدرانقو راح ينفعك في الخطوط دامك مو راعي بر

ا

انا وسيارتي

وعليكم السلام ورحمة الله وبركاته

حياك الله أخي الكريم معنا عضواً في المنتدى وأتمنى أن تفيد وتستفيد :)

جميع السيارات المذكورة أعلاه غير مناسبة للبر عدا الباجيرو ،

وهو يلبي كل طلباتك من ناحية التحمل والعزم بشرط أن تكون المكينة 3.8 وأيضاً الرساوة ،

من ناحية الراحة جيد وهو لا يفرق كثيراً عن غيره من الجيوب اليابانية ،

هناك بديل رائع ومشهور بالتحمل والصبر ومناسب للسفر بحكم أنه مريح وراسي وهو نيسان باثفندر كلاسيك ( الشكل القديم ) موديل 2014 وتبدأ أسعاره في المعارض لفئة الستاندر من 99 ألف ريال
محرك حجم 4.0 بقوة 291 حصان اوتماتيك ست سلندر دبل بثلاث فئات " أوتو وخفيف وثقيل "

أيضا باترول سفاري فتك تجده اوتوماتيك بسعر 145 ألف ريال

جيوب تويوتا غير مريحة باستثناء اللاندكروزر فهو مريح بعض الشيء ،

بالتوفيق ،

مثل ماقال أخوي

كل السيارات الي فوق نظامها AWD مافيها دبل ثقيل البعض منها متوفر بقفل وسطي فقط الي يعطي نسبة دفع 50/50 بالأمام والخلف أما الوحيد الي من خياراتك للبر هو الباجيرو وبصراحة لا أرى أنه الخيار الامثل ليس سيئا لكن ليس الافضل لان صوت المحرك مرتفع بالنسبة لي (فأنسى مسألة العزل بين المحرك ومقصورة الركاب أذا أنت مهتم فيها) أضافة أنه مو قوي بالشارع أذا يهمك نشاط الموتر بالشارع والموتر نكبه التراكشن حقه بالبر يقرفك مايقدر يرقى بسبب تدخل التراكشن بأستمرار بالطعوس (الاماكن الرملية تحديدا) أما الصخرية بيكون مفيد أكثر التراكشن, أضافة أني أشوف أنه مو مريح ليس كمقاعد لكن تعليقة قاسي جدا برأيي الشخصي

وبما أن خياراتك الي فوق واضح أنها كلها على سيارات 3 صفوف من المقاعد بحجم الوسط أشور عليك تشوف البرادو محرك V6 تراه خيار جيد بالاخص أن أخذت الخليجي أو من البازعي لأنه يجي تنكيين بنزين بسعة تقارب 177 لتر هذي أكبر من تانكي الاندكروزر نفسه ومريح لكن جربه علشان أنت تشوف راحته بنسبة لك

برضو عندك الباثفاندر الشكل القديم وأخبر أنه لسه موجود بالعيسى لكن أنا أُفضل لك البرادو وطبعا 6 سلندر يعيب البرادو بنسبة لي أن الدفلوك ماتاخذه إلا بأعلى فئة :a1120(121): خلاف اللاندكروزر 6 سلندر ذا المواصفات البدائية تقدر تحصل الدفلوك بأقل فئة من GXR؟؟؟!!!

الله يعطيكم العافية جميعاً كفيتوا ووفيتوا ..
فعلاً استفدت من كل رد واحد منكم ،، بارك الله فيكم

أنصحك بـ باجيرو فل أوبشن لا يفوتك ..

ياباني الصنع + جلد + زينون + فتحة كبيره + ديف لوك + مراتب كهربائية

خلوص ارضي ممتاز + توفر قطع غيار + تخشيب ديركسون مريح ليد السائق

+ سعر اقل من المنافسين ، بالتوفيق .

الله يرزقك الي فيه الخير والصالح

هذا يحدده استخدامك تبي خط درانقو ((وتذكر انه يطيح سعره ووكيله مش لهناك))

تبي بر باجيرو ((مع العلم سمعت ان التراكشن حقه ما يطفي))

تبي ديره سنتافي ((لانها كوريها فلو حككيت باحد لاقدر الله تقدر تغير قطعها بالرخيص بأذن الله))



اقعد ويا نفسك وشف اكثر شيء تحتاجه وصل الستخاره وتوكل على ربي وربك ورب الخلق


مع اني اميل للباترول فتك حول سعرك اعني الربع

ولا اكسبدشن يتصور لي انها سيارات بتجملك باذن الله

والله الموفق

لازم تفكر في صرفية السيارة

الباجيرو الظاهر انه انسب من ناحية قوة التحمل

الباثفندر يصرف وما اتوقع يتحمل كثير

الباقية يمكن راحة ولكن مافيها حيل 400 كم يومي

ابو فيروز الاخوان قدموا لك مشورات وانا بما اني املك سنتافي الفئة الاعلى ارشح لك هذه السيارة مريحة وعزمها طيب اما من ناحية السيارات الاخرى ارشح الاكسبلور

ناتي للنقطة الثانية الحسبة المالية لديك وهذا شئ راجع لك
النقطة الثالثة جمال الشكل مع المواصفات الرائعة الداخلية والخارجية ارى انها بين الفورد والهيونداي
النقطة الرابعة الراحة ابعد عن الفورتشنر بالتحديد واعتقد ان النيسان كذلك
النقطة الهامة من وجهة نظري عليك صب تركيزك على سيارتين فقط لكي تختار براحة اكبر وتركيز افضل واسال مجربينها

والله ياأخوي عبدالله انا اللي ذابحتن الحيرة ( الله يريد بنا خير )
بالنسبة للبر خفايف يعني مهب ضرب ردم وصحاري ، كله سهلة وممشى نفود

يابو فيروز تراك حيرتنا :)

أنت تبي فئة اوف رود للطرق الوعرة أو فئة الكروس أوفر للمدينة والسفر ؟؟؟!!!

الدورانجو والاكسبلورر والمازدا ماخصصت للبر وأنت تقول أنك تبي تكشت كل أسبوع ؟؟!!!


بالنسبة للباثفيندر ، الداخلي الموجود في المعارض جملي فقط

اذكر معرض عنده موديل 2012 مخزن خليجي ستاندر ابيض داخلي بيج اوتوماتيك دبل وسعره نفس سعر الـ 2014

صحيح اخوي ابو عبدالله الدرانقو مايختلف عليه اثنين من ناحية الشكل والراحة ،، لكن من ناحية الكدة والخط هنا أتوقف !!

يقول لكم عزل وراحه تقولوا باثفندر لا والشكل القديم بعد هههههههه


وثاني يقول جيوب تويوتا اللي مافيها راحه ولا تكنلوجيا ابد


اخوي على طلباتك ارشح لك الدرانجو او الاكسبلولر

الدرانجو ووحش ومكينته معروفه وحق كرف وبنفس الوقت مريح وعزله تمام

بس وكيله زباله

بالنسبة للعيسى ماعنده شي ، لكن المعارض اللي فيه كله داخلية جملي ، هل كله جملي ؟ أو يجي بيج

الشكل القديم تلاقيه في المعارض وموجود لدى العيسى إن ما خاب ظني وزييرررو

شاهد هذا الرابط

http://www.saudisale.com/SS_a_car.aspx?carid=13101

موجود باثفندر الشكل القديم جديد أصفار موديل 2014 بكثرة في المعارض وعند العيسى

ستاندر بمعارض النسيم ( معرض العمر ومعرض أوتو سيتي ) بسعر 99 ألف خليجي وبالإمكان إدخاله في ضمان الوكيل
ولم أجد في المعارض سوى فئة ستاندر

عند العيسى الوكيل الجديد لنيسان ستاندر بسعر 110 ألف
نص فل 122 ألف
فل كامل 134 ألف

وعندهم عرض رمضان صيانة مجانية لمدة 3 سنوات أو 60 ألف كلم أيهما أولا

راجع موضوعي هذا ففيه معلومات تفيدك

http://www.assayyarat.com/forums/t277347.html

بالتوفيق ،

الله يعطيك العافيه
وفعلاً الباثفندر له عندي اختيار ، لكن للأسف مالقيت الشكل القديم أصفار ، اللي خابر لي لايبخل علينا