أولا كل عام وانتم بخير وعيدكم مبارك ..
ثانيا أنا معي F150 FX4 2013 فل اوبشن وبنسخ رد لي في منتدى ثاني (فورد العربية)
الحين معاي ولا واجهت أي عيوب مصنعيه أو خرابات واستخدمها يوميا. ولا مره شفت احد اشتكى والله اعلم. والان بما اصبح الشراء من خلال البنوك سهل الناس صارت تستعجل في اختيارها, اسأل شاور استخير وتوكل على الله, مو شرط انه السيارة حلوة اشتريها لأنه انت تحتاج شي يلبي طلباتك, انا ما استخدم السيارة في المطامر واكسرها بالبر وامسك فيها خطوط كثير ليه اخذ رابتر ! كثير ياخذونه فقط لاسمه انه عندي رابتر وصحيح انه شي جميل امتلاكه وسيارة جباره, لكن ارضي نفسك اكثر مما ترضي الناس هذا لا يعني انك ما تشتري رابتر ابدا عادي تقدر تشتري 10 رابترات بعد لكن اهم شي انك ما تتبع هوى الناس وكلامهم.
بالنسبة للصيانة جيده يعني اذا صيانة فقط وجيت الصباح يخلصونها العصر وقلما يخلصون اليوم اللي بعده الصباح اذا كان عندك مشاكل + صيانه تاخذ يومين - 5 أيام على حسب المشكلة لكن ما يطولون, التعامل ممتاز مو متميز ولا سيء انت رايح لشركة فورد مو BMW لكن يعطونك حقك. بالنسبة للأسعار ما عندي خلفية عن شركة هوندا لكن F150 FX4 - Limited - Raptor هذول الفئات العليا والأفضل والأكبر مكينة فلا تتوقع صيانتها كالكامري, في جدول صيانة كامل يعطونك أياه بالأسعار وتقدر تشتري عقد صيانة 64 ألف كيلو ب 4500 ريال تقريبا ويعطونك معها تبديل قماشات ومساحات مجاني اذا ما خاب ظني, الصيانة كل 8000 كيلو. يعني 8,16,24,32,40,48,54,60,64
انا ما اشتريت العقد وصراحه تحسفت واعتقد انه في عقد بعد الـ 64 ألف. غالبا الصيانة ما راح تقل عن 600 ريال طبعا الصيانات العادية (تبديل زيت + تشييكات) تقدر تسويها في أي ورشة أو محطة بنزين وتكون الفواتير معك لأن النظام الجديد من الوزارة أنه اذا معاك فواتبر الصيانة وكل شي مظبوط الوكالة ما تقدر تلغي الضمان, لكن الصيانات المهمه بالوكالة أفضل. صح الورش بتوفر علي فلوس لكن انا اسوي كل صياناتي فالوكالة لراحة البال. بالنسبة لتوفر القطع ما واجهت مشاكل مرة كان عندي الباب يطلع صوت هزة كلمتهم قعدت السيارة عندهم 3 أيام عشان بدلوا ماطور الشباك كامل بدون ما اطلب واللي خلا السيارة تقعد هو طلب القطعة من جده يعني اشوف انه شي عادي مب مشكلة الواحد ما يزعل على كل شي لازم الصبر, غير كذا كل شي سلس وممتاز. والسيارة من أروع ما يكون لكن الحر والله الكراسي سوادء والسيارة سوداء كسبت الشكل والأناقه لكن تمتص الحرارة مص, تضليل شركة ممتازة + شماسه امامية يقلل الحرارة بنسبة كبيرة, باللإضافة إنه اذا انت منت راعي بر أو نقل أو ما تحب السيارات الكبيرة ما راح اقولك لا تشتريها بقولك خل يكون عندك سيارة سيدان فقط لأن السيارة تستحق الاقتناء بمعنى الكلمة بكل فئاتها.
في عرض على موديل 2013 FX4 غمارة ونص الفئة الأولى (بدون نافيشجشن وزينون) بـ 129,000 صراحة ما يتفوت والمكينة 6.2! (صفقة رابحة) اذا في ميزانية تقدر تاخذ الفئة الثانية (فل اوبشن) 2014 لأن 2013 خلص ولا يوجد عروض على الفل اوبشن بـ 173 تقريبا غمارتين.
كانت من خياراتي الدودج رام والجمس سييرا, الرام داخليته حلوة الصراحة لكن الشكل الخارجي شوي ما عجبني وتخاف عليه بالبر احسه مصمم اكثر كا ونيت عائلي ونقل اغراض شخصية (اتكلم عن الفل اوبشن ب 170 الف) والمكينة قوية 5.7 هيمي لكن مو مثل الـ 6.2, بالنسبة للسييرا الجديد صراحة ابدعوا لكن السعر مبالغ فيه جدا وركبت الاثنين وهي مسألة رأي وذوق. انا ما ارتحت فالجمس مثل الفورد صح انه المواد ممتازة فالجمس وشكل جديد, الخ. لكن الفورد يأسرك وشكله مرعب وانيق في نفس الوقت + المساحة الخلفية لا تقارن (للغمارتين)
الله يوفقك ويكتب لك اللي فيه الخير.
الرام ونيت جميل وفخم وأنا ترددت كثير قبل لا اشتري الفورد واكثر شي اعجبني المواد الداخلية واهتمامهم بالتفاصيل عكس فورد اللي من بدايته الى نهايته بلاستك والغريب انه الكراسي حقته جلدها حلو ومريحه. أكثر شي اعجبني بفورد هو شكله الخارجي ومكينته 6.2 لتر وماشاء الله المكينه قمة المتعه والسيارة تفصل على 170 عالقير الـ3 وهي 6 نمر ولا ابي افك الفصله لأنه يطير. وأكثر شي عجبني بداخلية الفورد أنه تصميمه جدا انسيابي وتحس القزاز مايل كنك راكب سيارة سبورت بعكس باقي الونيتات بدون استثناء القزاز كله كبير والتصميم نوعا ما مربع, تقدر تقول هذي ميزة او عيب شي راجع لك لكن انا اشوفه جدا ممتع.
الخلاصة:
فورد: شكل شبابي وجذاب ونفس الوقت متوحش ومكينة قوية ووواسع جدا.
دودج: رزانه وأناقه وجوده داخليه ومكينته محترمه بعد لكن ارق بشي بسيط من الفورد لكنه يكرف.
السعر بالنسبة للـ FX4 فل اوبشن 174 الف والرام 171 الف تقريبا (هيدروليك)
لا تاخذ راي أحد غير مجرب لأنه حكمه غير مجزي ابدا وانا ما امدح الفورد لأني شريته لكن والله السيارة ممتعه ولما تشوفها تنبسط وقوي وكشخه وينقل اغراض ويطلعك بر وحق سفر واكثر شي ريحني الوسع اللي ورى نركب 5 أشخاص بالغين براحة تامه + في اغراض بالحوض وأغراض ورى وعزل وكل شي.
اركب السيارتين وشوفهم زين وتاكد انك راضي وتوكل على الله ولا يهمك اللي ينقد لو تطلع بورش ولا كيا النااس بتنقد.
صور لسيارتي (ماشاء الله تبارك الله) اذكروا الله العين حق:
بعد شهر السيارة بتكمل سنة معي والحمدالله ما ندمت ولا شعره ما تخاف لا من حفر ولا رصيف ولا بر ولا سفر ماشاء الله وسويت تعديلات كثيرة عليها وهذا احلى شي بالونيتات. الشي الوحيد اللي بعض الأحيان يزعجني ضيق المواقف والأماكن واللي معي يضحكون وناخذها ضحك عادي السيارة روعة ولازم تتحمل العيوب. وأفضل حل لهذي المشكلة وجود سيارة سيدان.
الله يكتب لك اللي فيه الخير.
