[SIZE="5"]السلام عليكم ورحمة الله وبركاته ,,,
أسعد الله اوقاتكم بكل خير ...
حبيت اسجل بهذا المنتدى الطيب لكي اروي لكم قصتي مع ثلاث مشاكل كانت بسيارتي الايدج لكي تعم الفائدة لزوار المنتدى ... وبأسردها باختصار
بسم الله,,
المشاكل هي
1-كان عندي نتعة بالموتر
2-كان عندي لمبة ال (ABS) تطلع وتختفي
3-كان مكيف السيارة يشتغل احيانا مع تشغيل السيارة
اولا ....
مشكلة نتعة القير كانت تحصل معي دائما حتى والسيارة واقفة , لدرجة ان مره من قوة النتعة طفت السيارة , بعدها الله لايوريكم قمت اوسوس وماخليت ورشة بالرياض ماوديتها وكل واحد يفتيك من عنده
ثانيا ....
مشكلة لمبة ال (ABS) وهي لمبة مانع الانزلاق وكانت تطلع عندي بصورة دائمة لدرجة انها كررهتني بالساعة اللي اشتريت فيها الموتر وأنا رجال ما احب يطلع عندي أي لمبة مولعة والمشكلة انها كانت تولع وتطلع صوت
رحت لكذا ورشة وبعد الفحص يقول لك غير حساس الدركسون وحساس الدركسون بمبلغ وقدرة
ثالثا...مشكلة مكيف السيارة وهي اني كل ماشغلت الموتر يشتغل المكيف مع التشغيل , طبعا مو دايم ولكن في كثير من الاحيان مع اني اطفي المكيف قبل اطفي السيارة ,وكانت مزعجة كثير وصار كل ماشغلت الموتر على طول عيني تجي على لمبة المكيف هل تشتغل والا لا , واذا اشتغلت على طول اروح اطفي لين تحمى السيارة شوي وبعدين اشغلة
مالكم بالطويلة...
قلت مامعي الا استعين بالله اولا ثم ابحث في قوقل
وبالصدفة لقيت كثير يثنون على ورشة ابو جوانا اللي بالروضة , والحقيقة من كلام الناس تحمست كثير له, حصلت رقم جوالة بالمنتدى وكلمته وكان الحقيقة قمة في الرقي والاحترام , قلت له بجميع المشاكل وقال تعال وأشوف بنفسي , جيته الساعة 10 الصباح وشاف السيارة وفحصها بالكمبيوتر وقال بالحرف الواحد تجي بعد المغرب وتستلم موترك وتلقاه جاهز , وأخذ جوالي وقال بأكلمك اذا خلصت ,الحقيقة اني ماصدقت لأني جيته وأنا محبط وقلت السيارة بتاكل قطع وبيصير فيها شغل كثير ومستحيل تخلص بالسرعة هذي , قلت على بركة الله
رحت البيت وماجات الساعة 5 ونص الا وأبو جوانا يتصل علي ويقول تعال موترك جاهز
الحقيقة اني ماصدقت , جيته الله يبيض وجهه ولقيت الموتر في احسن حال ولله الحمد
وبالنسبة للنتعة قال نظفت الثروتل لك وراحت النتعة وبالعكس صار احسن من أول لأن الموتر كان يشرب بنزين شررررب وكان عزمة شوي ضعيف وبعد شغل ابو جوانا صار الموتر اقتصادي في النزين وتغير العزم ماشاء الله
وبالنسبة للمبه ال (ABS) سوى تحديث للشاشة وبفضل الله ثم بفضل ابو جوانا راحت وراح معها القلق
وبالنسبة للمكيف رجع طبيعي لمدة اسبوع وبعدين مع الأسف رجعت المشكلة
في النهايه من لايشكر الناس لايشكر الله
الهدف من كل ماذكرته هو لأعطي هذا الرجل حقة , صحيح ان مافيه شي بلاش وانه اخذ حقه مع ان سعره جدا معقول مقارنه بما سواه في النهايه الا انني اعتبره صاحب فضل علي , ووالله يوم حاسبت الرجل اني حسيت انه سواها لي بالمجان من فرحتي بما سواه .. ويشهد الله على كلامي كله مع ان الكلام عندي كثير لكن انا من الناس اللي ما احب اكتب في الكمبيوتر . بس كتبت لأجل ما سواه معي وهو قليل في حقه
ختاما بالنسبة لمشكلة المكيف يا اخوان اللي عنده خلفيه عن مشكلتي او يعرف احد فما استغني عن فزعتكم
تقبلو تحيات اخوكم ابو تركي
والسلام عليكم ورحمة الله وبركاته[/SIZE]
