السلام عليكم ورحمة الله،
عرض جميل اخوي MRV ، انا اوؤيدك وبشدة بصراحة الهوندا قوية وتتحمل خاصة اذا كانت 6 سلندر، سيارتي هوندا جيب سي ار في 98 اربع سلندر2000 سي سي اوتوماتيك لكنها ما شاء الله عليها قوية وتبيض الوجه، وهي تعتبر سيدان وجيب في وقت واحد تسارعها من صفر الى 100 في تسع ثوان فقط، قمت فيها على فورد فوكس 2003 وابيكا 2003 حتى سرعة 130 وبعديها هديت السرعة الشارع ما يتحمل"بصراحة كنت لحالي، يعني السيارة خفيفة، بس يوم ركبوا معي اربعة قام علي باثفايندر 2003 بعد المية :) هذا عيب الاربع سلندر ما تتحمل وزن ثقيل" طبلونها 220، اتوقع تجيب الطبلون، بصراحة ما تعديت 180 اخاف من السرعة، ووصلت هذي السرعة مرة وحدة بس كنت اطرد ورا جمس صحن موديل 97.في طريق الثمامة وهو دليلنا.
بس بصراحة عيبها انها سيارة هواة يعني الدبل يفصل ويشتغل لحاله حسب حالة الطريق ما تحس انك انجزت شي. بس بصراحة قيادتها حلوة وومتعة في الرمل وما تغرز بسهولة. وما يحتاج انك ترص عليها.
يجي منها قير عادي ارضي، بس الدبل اوتمايك.
وصراحة احسن ما في الهوندا وكيلها عبد الله هاشم، تعاملهم ممتاز واسعار الصيانة عندهم معقولة رحت اغير سير التايم وطرمبة الموية مع الشداد في ورشة عادية طلبوا 400 ريال غيرتها في الوكالة مقابل 480 ريال.
والهوندا معرفة حبيبي ما تروح شارع المعارض الى ينكبوا عليك الشريطية كب.
وبعدين اخوي Dead تعرف انه الجيب اللكزس RX300 وكمان RX330 دفع امامي، سارقين الفكرة من هوندا، هوندا مطبيقينها من سنة 1997تاريخ ظهور اول سي لر في، اصبر شوي كان تشوف كل الجيوب دفع امامي.
http://www.geocities.com/kkhiedr/3.rm
http://www.geocities.com/kkhiedr/2.rm
http://www.geocities.com/kkhiedr/1.rm
http://www.geocities.com/kkhiedr/5.rm
http://www.geocities.com/kkhiedr/6.rm
http://www.geocities.com/kkhiedr/4.rm
