بسم الله والصلاة والسلام على رسول الله
يسعدني ان اطرح تجربتي لكابرس LTZ 2011 فل الفل حتى 200 الف كيلو
طبعا انا من محبين الكابرس ولازلت ايضا
امتلكت اكثر من كابرس بس القديم لكن سأطرح لكم الايجابيات والسلبيات بكل صراحه
ليستفيد غيري من المقبلين على الكابرس
في البداية انا واجهت عاصفة من الانتقادات قبل الشراء لكن كنت مصر الا كابرس والحمدلله اشتريتها وكالة بـ124 الف ريال بتاريخ 22 فبراير
2011 و حاولت انتظم في صيانة الوكالة لكن للأسف سرقة عيني عينك لدرجة عند صيانة 40 الف الجميح ذكر لي انها تكلف 4 الاف ريال قلت له الشرهه مو عليكم الشرهه ع اللي يجيكم
المهم صرت اسوي صيانة في Acdelco في اغلب الاحيان بس كل تغييرة زيت او صيانة تكون بفواتيير واحطها في الدرج
ويوم 24 فبراير 2015 صار علي حادث والله سلمني ولله الحمد وراحت السيارة تشليح الله يبعد عنا وعنكم الحوادث
طبعا الكثير بيسأل وش غيرت في السيارة ووش واجهت من مشاكل ::::
القطع اللي تم تغيرها :
1- اقمشة غيرتها مره واحده على 100 الف.
2- بكرة كرنك وهذي عيب مصنعي في الكابرس.
3 - بكرة شداد غيرتها بعد الـ100 الف وهذا شيء استهلاكي.
4- لي فريون بسبب كفر صدمته.
5- بواجي على 120 الف
6 - كراسي مكينة على 160 الف كيلو.
7- زيت القير كل 40 الف كيلو
طبعا البطارية لم اغيرها ابدا 4 سنوات على حقت الوكالة ولله الحمد
الايجابيات ::
1- المحرك وهذا مايختلف عليه اثنين وهذا افتقدته كثيير لكن قدر الله وماشاء فعل.
2- العزل الارضي ممتاز مقارنة بفئتها .
3- عزل الهواء في البداية كان جيد جدا لكن في الفترة الاخيرة تغير 180 درجة ولا اعلم وش السبب لدرجة انه اذا عديت ال200 تصفر وتحس الباب بيطير .
4- الراحة جدا جدا مريحة ووسيعة،
3- المساعدات فيها من افضل السيارات في فئتها على حسب تجربتي طبعا كلامي ع الـLTZ لكن الـSS اقسى شوي.
العيوب :::
1- المساعدات طبعا ذكرتها في الايجابيات والسلبيات لانها بصراحة في اللفات السيارة تمييل بشكل كبير بسبب الوزن الثقيل وليونة المساعدات وانصح انه لا احد يجرب ياخذ منحنى بسرعة عالية لانه ممكن تحصل امور لاتحمد عقباها.
2- السيارة تحتاج اهتمام وعناية بعكس السيارات اليابانية وهذا في كل السيارات الامريكية ماتتحمل الكرف لكن اذا انتظمت على صيانتها ماتواجه مشاكل بإذن الله.( رأي شخصي من تجربة)
3- الديكورات جودتها لك عليها لكن ولله الحمد لم اواجه مشاكل بس ذكرتها من باب الإفادة.
4- الاندر ستييرينق فيها ضعيف واعتقد هذا بسبب الوزن .
5- طرمبة زيت المكينة فيها عيب مصنعي وواجهوها كثير لكن ولله الحمد لم تحصل معي لكن ذكرتها من باب الإفادة
وهذي خلاصة تجربتي للسيارة لمدة 4 سنوات و 199700 كيلو
وبعد هذا كله سألت عن سعر الجديد في الوكالة ب146 الف ريال بس للأسف سعرها جدا غالي ومافيها موصفات وشكل قديم والمستعمل صعب تحصل نظيف.
اتمنى ان اكون توفقت في طرح تجربتي لكم
واسأل الله ان يبعدنا وإياكم شر الحوادث
