أنا يمكن من شيبان المنتدى اللي قليل أكتب فيه، كنت نشيط في بداية الانضمام لكن مع انشغالات الحياة والعمر :) قلت الكتابة، لكن اليوم جايب لكم موضوع للأسف المحتوى العربي فيه فقير جداً وحبيت أطرح تجربتي فيه وأتمنى أنها تنال أعجابكم وتفيدكم
المساعدات الرياضية وما أدراك مالمساعدات الرياضية واللي تسمى بال Coilovers، الكثير يعتقدون أنها قطع متوفرة للجيوب بشكل عام وال Offroad بشكل خاص، والحقيقة أنها لكل السيارات وهي من القطع اللي تغير سيارتك 180 درجة إذا عرفت تختار وتوفقت بماركات ممتازة ومشهورة فقد لا تحتاج لتغيير سيارتك لتحصل على مثلا رساوة أعلى أو إحساس رياضي أكثر. والفرق بينها وبين اليايات الرياضية أن أغلب اليايات تجي أنزل من البلد وعيبها أنها تأثر على عمر مساعد الوكالة (مايعيش كثير وينفقع خاصة مع اليايات اللي نازلة جدا) ويعيبها أيضا أنها غير قابلة للتعديل على الارتفاع، أما المساعدات الرياضية فميزتها أنك تتحكم بارتفاعها ( تحكم كامل أو نصف تحكم يختلف من شركة لأخرى، ويعتمد على مواصفات المساعد نفسه) وتتحكم أيضا بالقساوة والليونة (بالغالب فرارات بأعلى المساعد الأمامي وفرارات بالمساعد الخلفي تحت) وهذا يخليك تتحكم بظروف القيادة وعند التحميل والسفر وغيره، بالإضافة إلى أنك تتحكم بضغط الياي وهذا يعطي بعد آخر للقساوة والأرتفاع (مايسمى بال Preload)
قبل سنة تقريباً أشتريت هوندا أكورد 2018 سبورت 2.0 والسيارة بالنسبة لي أكثر من رائعة، وكان لدي أكثر من خيار لزيادة ثبات السيارة وزيادة الإحساس الرياضي واللي هو إما جنوط مقاس أكبر مقاس 19 (طبعا ماركات عليها الكلام مثل BBS و Vossen وغيرها) أو مساعدات رياضية والخيارات المتوفرة للهوندا شركات كثيرة مثل BC Racing و D2 و Tien وطبعا الخيار الأغلى هو RS*R. طبعا خيار المساعدات كان أفضل بسبب أنه يعطيك خيارات أكثر (تعديل الارتفاع، التحكم بالقساوة والليونة من خلال فرارات على 36 درجة واخيرا تغير نظام التعليق بشكل كامل ومرونة بالتعديل) بالإضافة إلى أنها أقل عرضة للخراب من الجنوط (الحفر والمطبات تأثيرها على الجنط أكثر من المساعد والجنط خط الدفاع الأول في المطبات)
طبعاً شركة RS*R شركة تعديل يابانية تصنع قطع تعديل لسيارات لكزس، هوندا، انفنيتي، ومازدا وتتميز بالجودة العالية ومساعداتهم غاز بعكس الشركات اللي فوق (مساعداتهم صناعة يدوية) ولكن يعاب عليها أن أسعارها غالية مقارنة بالشركات اللي فوق:
وبعد القراءة عن هالشركة لفترة طويلة قررت أركبها على سيارتي والهدف مثل ماقلت زيادة مركز الجاذبية واللي ينعكس على ثبات السيارة وتحسين أداء السيارة في المنعطفات (تقليل انحناء السيارة أو ما يسمى Body Roll)
الأسبوع الماضي وصلت الشحنة من أمريكا واشتريت المساعدات من موقع الشركة الأمريكي (يشحنون المساعدات من اليابان) طبعا قمت بتركيبها بنفسي، المساعدات يجي معهم كتب التركيب مافيه تفاصيل كثير بس يحتوي على المعلومات الضرورية مثل القياسات والعزم اللازم لشد بعض الصواميل
وهنا مقارنة المساعد بمساعد البلد ويلاحظ أنه أقصر من البلد بس ضغط الياي أعلى مما يعني أن تأثيره على ارتفاع السيارة مقارب لشد البلد في هذي الوضعية بدون تغيير (الفرق بس نص إنش فقط في الارتفاع)
عملية التركيب استغرقت يوم كامل مع وزن الارتفاع لأكثر من مرة لين توصل للارتفاع المطلوب (تفضيلك الشخصي) طبعا ملاحظة مهمة هنا أن التنزيل الزايد ما يؤثر على حك السيارة بالمطبات فقط ولكن يؤثر على الكامبر ويسبب مايسمى بسحلية الكفرات وهذا يتطلب أنك تركب كامبر رياضي قابل للتعديل وهذا ماحاولت أتحاشاه في وزن السيارة لأن الكامبر الرياضي للأكورد صعب فكه ويحتاج جهد كبير وممكن تضطر لفك تانكي البنزين.
وطبعا هذي النتيجة النهائية بعد الانتهاء من التركيب ووزن الارتفاع وبعدها تحتاج أنك تسوي للسيارة ميزان وللأسف أغلب اصحاب الميزان الالكتروني ماعندهم موديل 2018 فنزلت القياسات من موقع أمريكي باشتراك وعطيتها راعي الميزان يوزن السيارة عليها
طبعا الجميل في هالمساعدات أنك تغير في قساوة المساعدات لين توصل للمستوى المطلوب (أقسى شي يعيبه أن السيارة تهتز كثير، وألين شي السيارة تلعب كأن المساعد منفقع لكن الوسط ممتاز، أنا حاطها على قريب من القاسي والأداء الصراحة جبار في الخطوط ثبات عالي تحس أنك تسوق سيارة مختلفة تماما، وبعد تجربتها ومسكة خط أقول أنها تستاهل المبلغ اللي يندفع عليها.
ما يعيب المساعدات: الصراحة سعرها غالي لكن اللي يبي يستمتع بسواقة السيارة ماراح يندم، وطبعا العيب الثاني هو أن ضجيجها وأصواتها نسبيا أعلى مساعدات البلد (فاللي حساس من الأصوات مايصلحن له أبد :)
هذا مالدي من معلومات حبيت أشاركها مع المهتمين وشكرا :47:
