المكينه تنقص زيت

CAPRICE2008LTZ @user_144353 · 01-10-2022

السلام عليكم ورحمه الله وبركاته
كيفكم يا اخوان أن شاء الله اموركم تمام
عندي شيفروليه كولورادو 13 V6 تنقص زيت المكينة وماحصلت اي حاجه تدل على وجود تسريب اوشي ومافي دخان من الشكمان والزيت ماشي عليه تقريبا 2700 ونفس الزيت الموصى به من الوكاله اللي عنده خبره في هالمشكله يفيدني جزاكم الله خيرا وشكرا

بشير حسن @user_264966 · 02-10-2022

هلا فيك أخوي دام أنه السيارة شغلها مضبوط وصافي ومعدل النقص هذا مو الشئ الكثير وأنت حاول بين كل فتره تشيك على مستوى الزيت ونصيحتي لك لاتفكر تسوي شئ في المكينه لأنه بكلامك بحكم أنت صاحب السيارة وشغل وعزم السيارة كل شي اوك حاول فقط تغير نوعية الزيت ولزوجت من 5W-30 الى 10w-30 و حاول تستخدم زيت من شركة بترومين ويكون تخليقي بالكامل او نصف تخليقي على أقل تقدير مع انه زيوت شركة فوكس ممتازة بس مايضر لو جربت تغير هالمره وتشوف معدل النقص يقل والا باقي على نفس الوضع

CAPRICE2008LTZ @user_144353 صاحب الموضوع · 02-10-2022

.بعد عرض السياره على اكثر من مختص تقريبا أجمعوا أن الخلل الرينقات أو القاسكيت حق البساتم لأن فيه واحد فتح غطاء الماكينه وشغل السياره صار يطلع دخان أو بخار من المكينه فما ادري يا اخوان هل كلامهم صحيح لأن الماكينه لازم تنفك بالكامل والشغله مبدئيا راح تكلف فوق ال 3000 فما استغني عن مشورتكم ونصائحكم فضلا لا أمرا

CAPRICE2008LTZ @user_144353 صاحب الموضوع · 01-10-2022

معدل النقص اول ماكتشفت أن الماكينه تنقص كنت ماشي عالزيت 6300 كيلو وبعدين غيرته كامل واشيك عليه باستمرار بدأ ينقص بعد مامشيت 2700 كيلو تقريبا

CAPRICE2008LTZ @user_144353 صاحب الموضوع · 01-10-2022

فيه زيت لما رفعت السياره فوق كارتير القير تقريبا قريب منه ومكانه فوق ماهو واضح والزيت ماهو كثير يادوب نلاحظه احاول اصور مكان الزيت اللي لاحظته وبنزل الصور أن شاء الله

CAPRICE2008LTZ @user_144353 صاحب الموضوع · 01-10-2022

صحيح الماكينه نفس البليزر ونفس الترافيرس السياره ماشيه 379000 تقريبا والزيت اللي اغيره 5w30 نوع الزيت فوكس السياره مافيها اي تقطيع أو تفتفه وانا ماشي والعزم ماشاء الله قوي ومالاحظت اي شي مشيت عالسياره بعد مازدت الزيت نص علبه تقريبا 500, كيلو وشيكت عالزيت اليوم مافي اي نقص

محمد القحطاني @user_269829 MOHMAD · 01-10-2022

كلام اخوي بشير صحيح المحركات الجديدة زيتها يختلف في اللزوجة فيا يكون 5W30 او10W30 السيارات القديمة اللي من التسعينات كانت تستخدم 5W20 وماقلت لنا كم ممشى السيارة لأنه يحدد لان المحرك اللي عندك نفس محرك التريل بليزر

بشير حسن @user_264966 · 01-10-2022

عليكم السلام

حياك الله أخوي وهلا وسهلا فيك

كم ممشى السيارة ؟

كم معدل نقص الزيت كل 1000 كم ؟ وش نوع الزيت أو اسم الزيت اللي تستخدمه

عموما اذا عزم المكينة ممتاز وشغلها صافي بدون أي مشكلة من تفتفه ونفضه وتقطيع ومثل ماقلت لنا مافي أي تهريب واضح من المكينة أو دخان خارج من الشكمان فأنا نصيحتي لك تحاول تغير نوع الزيت كابداية للحلول واكرر في كلامي نوع الزيت أو ماركة الزيت وليست لزوجة الزيت لأنه معروفه أكثر السيارات اصبحت مكاينها تحتاج فقط الى استعمال الزيت الخفيف 5W-30 أو 10w-30