LEXUS LS430 أنظمة أمان -مميزات-عيوب >>>>

اخوي الوليد
تشنج هنج هو << اهلا وسهلا (ياباني )

تسمح تقول لي العطل اللي في لكزس اول دفعة؟؟ مع اني اعتقد سيارتي اول سيارة خشت السعودية ههههههههههههه.

بالنسبة للمكيف الخلفي انا اشوف مكانه حلوو جدا في التكاية . اما مسالة الاضطرار وركبو معاك 3 ركاب تخيل انها زي مكان المرسيدس خلف التكاية الامامية ؟؟

تخيل احد رفسها برجله وهو طالع ؟؟ وبعدين على فكرة شكل السيارة بايخ وهم راكبين معاك 3 ركاب ورا.

على فكرة بالنسبة لهدووووء السيارة لدرجة انك ماتسمع صوتها عندك الطبلون ينور من ثاني دقة واذا ماشتغلت السيارة في عندك لمبة زي شكل البطارية تكون منورة

واذا اشتغلت السيارة تطفى اللمبة هذي .

اهلين وسهلين ...... (( قلبت سوري )) |518|
يعطيك العافية ....
بداية باذكر نقاط الاتفاق :
>> نظام مراقبة ضغط الهواء وهذي متفقين انا وياك على انه نظام يحتاج تطوير.
>> السماعة اليدوية .

>>> بخصوص السويتش ياخي انا اذا جيت اشغل السيارة وحركت السويتش الى ON , الى هنا السيارة ما تشتغل بس تولع لمبات العدادات والطبلون وعشان تشتغل السيارة احرك السويتش زيادة (( بعد ال ON )) الين اسمع السيارة اشتغلت ثمن اترك السويتش (( طبعا تصير العملية هذي في اجزاء من الثانية )) الى هنا الكلام حلو لكن اذا صرت في مكان فيه ازعاج ((مثلا طريق سريع , مكان فيه اعمال حفر , منطقة بناء ... الخ )) هنا تصير المشكلة وهذا الكلام اللي اقصده , يعني لو انت في مكان مافيه صجة ولجة عادي (( no problem )) لكن لو العكس صدقني ممكن تحرق السويتش وانت ما تدري .....

>>> اما الدفع الرباعي انا سمعت انه مانزل بالسعودية (( للمرسيدس طبعا )) الا قبل فترة قصيرة (( يمكن في آخر 2004 )) وما ادري اذا كان نزل على 350 و 500 ومانزل على 600 بس اللي اعرفه انه مرسيدس تنزل المواصفات على جميع الأحجام ولاتميز حجم عن حجم وانت قلته 600 هو افخم شي ولاهوب معقول يكون فيه نظام ينزل في اللي اقل منه ولا ينزل عليه , اما البي ام اذا كان مافيه دفع رباعي ففيه شي غيره يميزه عن السيارات المنافسة (( مثل نظام المطبات )) ونفس الكلام للكزس يعني اذاما صار فيه دفع رباعي ففيه شي ثاني ماهوب موجود في غيره مثل كاميرا الرؤية الخلفية .... وانا قلتلك الدفع الرباعي نازل على ال GS 2005 وهذا دليل انه مهم على الأقل بيصير اختياري....

>>> وبالنسبة للخرابات طالما كل السيارات فيها خرابات اذا هذي ما تعتبر مجال للمقارنة بين سيارة واخرى بغض النظر عن نوعية الخرابات هل هي في سيارة اخف وفي سيارة ثانية اكثر لأنه فيه ناس حتى لو الخراب خفيف جدا ولا يؤثر على السيارة تلقاه زعلان وموب راضي وفيه ناس بالعكس حتى لو الخراب له تاثير قوي على السيارة ما يهتم كثير وهذي يدخل فيها تعاون الصانع والوكيل ومقدار استجابتهم وما اعتقد في هذي سواءا الجفالي اوعبد الطيف جميل مقصرين ابدا , يعني الجفالي (( مثل ما قلت يوم خرب الهيدروليك وزينه لكم بدون وجع راس )) وعبد اللطيف جميل (( يوم اعلن عن الخراب في ال 430 ))..... وهذي وجهة نظر تقدر تاخذها او ترفضها..

>>> وبعدين حلوة هذي مايركب ورا اكثر من اثنين الا اذا صاروا مستأجرين السيارة (( اسمحلي كلامك موب معقول )) افرض واحد اضطر مرة يركب معه ثلاثة ورا يعني تصير المشكلة اللي قلتها في الرد السابق , وايضا ميزة التحكم بدرجة الحرارة لأربعة نطاقات ..... يعني ليش هنا ماتعترف انه البي ام ـــ او((هم )) معليش بس والله معجبتني بي هم |529| |268| ـــ والفياقرا في هالنقطتين متميزين .... ولاتاخذ المسالة من ناحية شخصية , بس والله لو تفكر فيها تلقى كلامي صحيح او على الأقل فيه شي من الصحة ...

>>> العزل اتفق معاك نسبيا في تميز اللكزس به لكن مثل ماقلت لك الفرق بيصير بسيط لو قارنا مع المرسيدس ال 7 غيارات ...

>>> الشكل صحيح اللكزس افضل في الواجهة والخلفية اللي كانها لوحة فنية ماشاء الله تبارك الله (( حتى انا كنت اذا شفت الفياقرا مع قدام احس كانه مصدومة )) لكن الجوانب انا اشوف الفياقرا افضل يعني شف زوايا الأبواب والشنطة والرفرف الخلفي وسحبة طرف الصدام اللي ورا, على العموم هذي مسألة اذواق وما حنا بمختلفين عليه ....

>>> والسماعة اليدوية وال TV هذي لو تضيفه اللكزس ياسلام....

>>> واشكرك على التوضيح بالنسبة للهيدروليك اللي خلان اوثق بسيارتي اكثر ...

>>> وسعر السيارة اشوف انه غالي على هالمواصفات لكن لو يضيفون { التهوية (( تبريد وتدفئة يعني )) للمقاعد اللي ورا ونظام التحكم بالسرعة بالليزر ونظام التحكم بالمساعدات } يعني تصير السيارة فل اوبشن وبنفس السعر الحالي هنا ساقف احتراما للكزس وسعرها , اما انك تقول انه لايوجد سيارة بنفس المواصفات و بنفس القيمة هذا ما له دخل بارتفاع السعر لأنه الوكيل حاط السعر هذا عشان ينافس الشركات الثانية موب عشان المواصفات وصدقني بعد فترة خلال اربع الى خمس سنوات بيصير سعر اللكزس متقارب مع السيارات المنافسة اللي لها نفس المواصفات (( لأن هذي سياسة تسويقية ولاهيب على حسب المواصفات )) .... اتمنى تكون فهمتني ...

>>> أخيرا اشكرك على طولت بالك وسعة صدرك ..... وكل عام وانت وجميع الأعضاء بألف خير وصحة وسلامة ..

>>> ومهما تكلمنا او قلنا او اختلفنا نبقى اخوان وتبقى المودة والاحترام ..وفي الختام سلااااام.... |546|

بس على فكره فيه شي انت قلته هو اللي مخليني ارد وبقوه بعد

انت تقول ان ال 430 ما تستاهل سعرها طيب انا سألتك فيه سياره بقيمتها بمواصفاتها؟

والى الحين اتحداك تحصل

هلا اخويا <-- على قولت ناصر القصبي لوول

شف جوال الدمعه انا بنفسي مجربه هو والباندا وكم جوال وكلهم ما اشتغلوا يمكن المشكله في السيارات اللي انا مجرب فيهم لكن كلامهم ان حتى الوكاله قايلين لهم
عموما اتأكد منها بعدين لاني الحين الفجر ومافيه وكاله فاتحه هالوقت

اما المكيف وضيفته التبريد وخل شغل البربسه من فيهم اللي يبرد زين؟ هذا اهم شي
وبالنسبه لمكان الازرار اصلا قد شفت مرسدس ولا بي ام ولا لكزس راكبين ورا 3؟
الا اذا كانوا مستأجرينها لووووول
نجي للسويتش اخوي حق اللكزس على طول من نقره وحده يشتغل وبعدين عزيز تشتغل عندك الانوار والطبلون اذا اشتغلت السياره بسسسس يعني اتوقع ما يبي لها تسمع :)

وبالنسبه للخرابات بذمتك اخوي تقارن خرابات اللكزس بالمرسدس ؟ مابي اقول البي ام لان مافيه وجه للمقارنه في هالنقطه

اخوي ناااااادرااا ما تطلع سياره جديده بدون خلل لكن خلل عن خلل يفرق
هل خلل اللكزس اللي طلع في سيارتين بسسس في كل انحاء العالم وجابوا باقي السيارات عشان يشيكون علها فقططط ولا فيه ولا لكزس سعودي طلع فيه هالخلل تقارنه بخلل غيره؟
وخلل اللكزس هاللي صار طالع من المصنع لكن المرسدس مع الاستعمال وهنا يطلع ردا الشي :)

نجي للدفع الرباعي اخوي المرسدس 600 مافيها دفع رباعي حتى 2005 مافيها بس ال 350 وال 500 تقدر تقول لي ال 500 احسن من ال 600؟
لا طبعا والبي ام بعد مافيها دفع رباعي يعني خلنا من هالشي

الهيدروليك اللي اتكلم عنه هو اللي ينزل ويرتفع مثل اللي في جيب اللكزس والفياقرا
وجيب اللكزس من 98 بعد ال 120 ينزل تبي ال 430 ما تنزل؟
رح للوكاله واسألهم قل ال 430 بعد ال 120 تنزل ولا لا وشف وش بيقولون لك

والعزل في النهايه من اهداء؟ وبفرق بعد اللكزسسس صح ولا لا؟
اما الشكل هذي حريه شخصيه ما اقدر افرضها او تفرضها على احد لكن اللكزس شكله رياضي اكثر خصوصا وجهيته حاده وشكامينه بارزه
التلفون انت قلت انك تحتاج لسماعه ودام انك تحتاج وفيه بعد غيرك يحتاج فياليت يحطونها

بالنسبه لكلامي اللي توجه لك كان عن ردك الأول

تحياتي لك حبيبي وعزيز وغالي والله

السلام عليكم

موضوع رائع عن سياره رائعه حقيقه

مشكور ويعطيك العافيه

هلا والله اخوي

اولاً ما ادري ليش مانك مصدق انه ممكن واحد ينتقد السيارة حتى ولو كان يمتلكها
ثانياً ابيك ترجع وترد على اول شي قلته في اخر رد لي عن امتلاك السيارة...
وانا اشوف انك انت ماتبي تقتنع يعني لو واحد غيرك كان قال موب مهم امتلاك السيارة بقدر اهمية انتقادها او توضيح الرأي (( وهذا موب معناته اني ما امتلك االسيارة لكن وش اسوي عجزت اقنعك اني امتلكها )) .....
على العموم ماراح ادقق كثير في هالنقطة بالذات ...

نجي للمهم >>>>> انت تقول الجوال الدمعة مايشتغل اوكي وانا كذاب اوكي , بعطيك رقم تلفون مندوب مبيعات لكزس العليا واسمه : عصام يونس رستم دق عليه و اسأله بنفسك (( هل نظام البلوتوث في ال 430 ينفع معاه بلوتوث جوال الدمعة )) وشف وش يقول , سجل عندك ( 4566600 أو 2648030 ) تحويلة 202أو على الجوال : 057262123 واذا ماودك تدق عليه خذ جوال الدمعة 7610 وجرب بنفسك , والمشكلة لاتزال تكذبني وانا لاازال اقولك الله يسامحك ولاازيد عليها ....

>>>> بخصوص نظام مراقبة الاطارات انت اعترفت الفياقرا افضل .. يعني لو فيه شاشة لكل كفر تبين الضغط واللي يطرا عليه افضل ((الحمد لله على السلامة اتفقنا خيرا )) |243| ..

>>>>> بعدين اذا مافهمت وش اقصد بشي معين لا تقولي كلامك متنااااااااااقض (( كح كحكحكح كححح سوري اوجعن حلقي يوم جربت اقوله )) |243| ..

>>>> تقولي الشاشة الخلفية ميب ميزة في البي ام وحتى المرسيدس ياخي اولا كلمة ميزة معناته شي يميز شي عن شي آخر ((عشان اوضحلك اكثر)) يعني تخلي شي مختلف عن شي آخر سواءاً ايجابياً او سلبياً , وما ودي ندخل في الفلسفة اكثر من كذا عشان ماتضيع السالفة ..

>>>> وبعدين تحكم المكيف (( والمسجل والراديو والمقاعد والهزاز والتدفئة للمقاعد)) في اللكزس في التكاية ولو صار معك احد ورا ((اكثر من اثنين )) ما تقدر تتحكم بالمكيف صحيح انت تقدر تتحكم به من قدام (( بس ولو)) , يعني لو بالمرسيدس مافي مشكلة لأن التحكم بالمكيف الخلفي في آخر التكاية الأمامية ... وبعد تحكم المقاعد اللي على البيبان والتهوية للمقعدفي الطرف.. والبي ام نفس الكلام (( يعني التحكم بالمكيف اللي بالسقف )) بعدين المكيف الخلفي للكزس مافيه تحكم بدرجة الحرارة لكل مقعد لكن الفياقرا والبي ام (( الحوت )) حتى ال E بعد تقدر تتحكم لكل راكب (( يسمونه اربعة نطاقات ))..
لكن اللكزس تميزت في التبريد وهذي تحسب للكزس ...

>> والتشغيل انا معاك انه افضل لكن اخطر لأن المرسيدس والبي ام بعد ما تحط الكرت تضغط الزر وهي تشغل لكن اللكزس انت بنفسك تدور المفتاح (( طبعا و السمارت كي في مخباتك )) ويمكن تحرق السويتش وعشان اوضح اكثر تخيل نفسك في مكان فيه ازعاج ولاتقدر تسمع صوت المكينة وهي تشتغل في هالحالة ممكن تحرق السويتش
وانت ماتدري لأنك ما تسمع صوت المكينة ((لكن لو انت في مكان هادي علطول تشغل وانت مرتاح )) وهذي اكثر من مرة صارت لي وربك ستر... طبعاً هنا لو المكينة لها صوت قوي كان ممكن تسمع حتى لو انت في مكان فيه صجة ((ومب معناته ان المكينة هدوئها مسبب مشكلة لا بالعكس ))...
وترى اللكزس راح تتلافى هالمشكلة في الموديلات الجاية والدليل شف صورة ال GS 2005 يعني موب معقول تصير الGS افضل من الLS وان متأكد من هالنقطة. ((لاحظ الزر اللي عليه كروم في طرف الصورة الأيسر ))



>>> وبالنسبة للدفع الرباعي للمرسيدس انا ماقلت لازم يصير في اللكزس كل شي لكن المرسيدس فيها هالنظام وهو يميزها واذا كلامي زعلك رح تهاوش مع المرسيدس ليش ينزلون هالنظام وتصير المرسيدس افضل عشان وجود الدفع الرباعي.. وبعدين ترى هالنظام (( الدفع الرباعي )) نازل على الGS 2005 يعني الللكزس حاسه انه شي مهم موب شي ثانوي

>>> ونظام المطبات لل760 ماادري بالظبط وش فكرته لكن اللي فهمته ان السيارة فيها نظام زي الليزر (( مثلا )) يتحسس الطريق ثانية بثانية وينقل الاحداثيات لكمبيوتر خاص واعتقد هذا يدخل فيه نظام I-Drive اللي نازل على البي ام ولاتاخذ كلامي بالحرف وتقلب علي ياغشيييم ياغشييييم..... |243|

>>> واذا على الجنط ((في S600 )) قلت يبكي ((في القاموس الشبابي ,الله يعينك رح دور عليه )) اقصد مافي امل للمقارنة لأن شكل الجنط يغني عن المقارنة بحجم الكفر واظنك توافقني ان البي ام اعرض يعني علشان مانختلف في العرض اول شي البي ام ثمن الفياقرا ثمن اللكزس او اللكزس والفياقرا متساويين ... والنسبة لأحلى جنط انا معاك ان اللكزس احلى من S500 ومن 745لكن الS600 شي ثاني((يعني افخم من 430))

>>> اما الأمراء اللي يركبون اللكزس فهذي انت ابخص ولا لي خبرة فيها ..

>>> وبالنسبة للهيدروليك ماادري اذا كنت تقصد النظام اللي يرفع السيارة وينزله على حسب السرعة (( بعد 120 تنزل السيارة )) فهذي اول مرة اسمع عنه في اللكزس اما اذا قصدك النظام اللي ما يخلي اللسيارة تنزل مع الوزن الزايد فهذا نظام ثاني لأني عندي بالسيارة ماعمري حسيت ان هالنظام موجود (( اللي بعد 120 تنزل السيارة )) وماادري هل انت تقصد المساعدات الهوائية او شي ثاني..
وانا معاك المرسيدس يخرب الهيدروليك فيه وكم مرة شفت مرسيدس ياطايح مرة واصل لللأرض يا مرتفع مرة تقل
هايلكس بس موب معناته انه اذا صار يخرب يعني خلاص ماله فايدة !!!!!!!!!!!
واعرف واحد عنده فياقرا جلست عنده من 2001 الى اليوم بس مادري عن الخرابات
واذا عن خرابات المرسيدس حتى اللكزس فيه خرابات عندك الدفعة الأولى من LS430 2001 فيها خرابات ولا تروح بعيد ايضا الدفعة الأولى من LS430 2004 بعد فيها خرابات (( قبل لاتسألني, سيارتي الدفعة اللي بعدها يعني الحمد لله سليمة )) صحيح الخراب بسيط (( اللي في القير))بس اسمه خراب ((عيب تصنيعي))...

>>> والعزل بعد سرعة 150 يصير الفرق بسيط في صوت الهواء بينهم كلهم بس المكينة انا معاك صوت المكينة مزعج في المرسيدس حتى وهو واقف ... وترى المشكلة اخف في الفياقرا 2004 لأنه نزل القير 7 تغييرات واكيد صار الإزعاج اخف (( وبصراحة ماجربت ال 2004 لكن اكيد دام القير صار 7تغييرات ))

>>> اما الشكل انا اشوف المرسيدس شكلها رياضي اكثر وتراه وجهة نظر .

>> اما التلفزيون هذي ما اسمحلك بالعكس هذي ميزة مهمة وياليت تنزل على اللكزس ...

>>> التلفون والله انا اشوف انه مهم او اقل شي يركبون سماعة يدوية يعني لو معك احد راح تظطر تطلع الجوال وتحوله للهاتف ثمن ترد ((وهذا مشكلة وانت تسوق يعني تلهيك عن القيادة )) لكن لو فيه سماعة يدوية كان علطول ارفع السماعة ورد ولاتاخذ منك ثواني ..

وفي الختام لاازال أؤكد باني انتقد السيارة موب اني حاقد أو كذاب ....الخ
وترى يقال بأن الناقد (( بصيــــــــــر))
يعني السيارة في الراحة والفخامة والعزل والتقنيات (( في مجملها )) ماعليها كلام واذا كان على ردي الأول انا مافصلت كثير لأن اخوي كاتب الموضوع ماقصر فصل وزيادة ولا كان ودي اكرر ...

<<<<<<<< ولاتخاف اخوي خالد حنا اكبر من اننا نزعل عشان سيارات >>>>>>>>>>
وتحياتي انا لك ..... والسلام عليكم ورحمة الله وبركاته

اشكر المشرفين على التثبيت

واشكر nick و الوليد القادم على اثراء الموضوع

الى الأمـــــــام

تحياتي للجميع.... |3|

|548|

الوليد .. NiCK

نقاشكم حلو وفيه كثير من المعلومات والفوائد .. وكلامك صحيح الانتقاد مع النقاش يجعل الموضوع مفيد والكل يستفيد منه وانا من رأيي انه يستفيد منه القارئ اكثر من مواضيع المدح وعرض الصور وكلام المجلات لأنه يكون عن طريق تجربة وواقع .. ولكن اهم شي انه ما يولد اي نوع من الزعل او الكره

بالتوفيق للجميع

هلا حبيبي الوليد او عيال عمي :P

عموما برد عليك في كل جزئيه

بالنسبه لمراقبة الايطارات انا ما رديت قبل لاني ما كنت متأكد 100% عشان كذا ما رديت بس تأكدت الحين اخوي النظام ينبهك اذا نقص هوا اي كفر بشكل خطير يعني لو وصل ضغطه تحت شي معين قال لي واحد انه 30 ينبهك مو اذا نزل الكفر على قولتك
وانا معك ان نظام الفياقرا حق المراقبه احسن بس في النهايه كلهم يسوون نفس الشي

اما سيارات عيال عمي وغيرهم فهي انواع فيه 2004 وفيه قبل بس فيه اكثر من 2004

نجي للبلوتوث اخوي انا مجربه مليون مره وبعدين فيه شي انت قلته يخليني اقول مره ثانيه انك ما تدري عن السياره

اخوي بلوتوث جوال الدمعه ما يشتغل في اللكزس؟ كيف اشتغل معك صراحه سيارتك غريبه
ما يشتغل من جوالات نوكيا الا العجيب المطور بسسسس وجوال ثاني بدون الوان ناسي وش اسمه وجوالات اريكسون مدري كلها ولا لا بس جربت اكثر من واحد وشغال
يعني ما ادري وش اقول صراحه عقب كلمتك هذي لا تلومني حبيبي اذا كذبتك

اما كلامك
=====
وعن قفل الدرايش يا انك مافهمت اللي قلت او انك ما جربت لكن باحسن الظن واقول انك مافهمت وباشرح لك اكثر :

رح لسيارة عيال عمك (( معليش كل شوي رايح بس اتحملني شوي )) واضغط زر قفل الدرايش وجرب تفتح الدرايش الثانية

(( غير السواق )) والزر مقفول وشف وش يصير واذا انفتحت لك افلقني .......
=====
حبيبي في ردك اللي في البدايه تقول انك اذا قفلته ما تقدر تفتح اي دريشه حتى حقت السائق راجع كلامك عزيزي :)
وشف ردي انا اللي قبل وبتعرف ان كلامك متنااااااااااقض
بس حلوه كل شوي رايح لووووووووووووووووووووووووووووووووووول الله يرجك
لا تخاف جدارنا في جدارهم يعني مافيه كلافه اي شي تبيه قله بس ولو تبي جبت لك السياره عشان تقتنع انك غلطان

اما بالنسبه للمواصفات العاديه اخووووووووي انت ليه كلامك متناقض؟
انت كاااتب بيدينك مواصفااات الامان والمميزات
الحين الشاشه الخلفيه صارت مميزات؟
وشاشة البي ام وش فيها اخوي؟التحكم الموجود فيها مثل التحكم او الكنترول الموجود في التكاية الخلفيه في اللكزس يعني اللكزس اسهل واريح مااااا ادررررري صراحه وش اقول بس كلامك مو منطقي ابدا

اما عن السويتش اخويييييي هالنقطه بالذات اللكزس افضل من المرسدس والبي ام

المرسدس عندي وانت تدري انه لااااازم تحط المفتاح عشان تشغلها يعني بصمه + مفتاح
والبي ام لازم تدخل الكرت في مكانه بعدين تضغط الزر

اما اللكزس لا خل البصمه في مخباتك وكل شي جاهز صح ولا لا؟ وما يبي له شي تشغيلها

اما نظام الدفع الرباعي اخوي لازم اللكزس يصير فيها مواصفات كل سيارات العالم؟ البي ام مافيه والمرسدس 600 مافيه ليييه العتب بس على اللكزس؟

ونظام المطبات ما فهمت وش فكرته يا ليت توضح


واما الجنوط انت ياخي غريب؟ الحين في ردك اللي قبل تقول انه اصغر من المرسدس والحين تقول المرسدس يبكي لكن البي ام اكبر يعني ليه ما تقول المرسدس فاشل لانه اصغر من البي ام؟
واحلى جنط صراحه عندي جنط اللكزس اللي ولا سياره من سيارات مرسدس تجي جنوطها شي عنده
بس على قولتي انا وعيال عمي الناس اذواق :P

اما المكيف انا قلته لك عشان تعرف ان فيه اشياء فاشله في السيارات اللي انت تمدحها وتقول ان اللكزس ما تصف جنبها
بسألك تبي سياره فيها شاشاات في كل مكان وبدون مكيف ولا سياره فيها مكيف؟
وتقنية التكييف احسن من تقنية الألماني بمراحل وعندنا هذا اهم شي

والسعر خلاص انت قلتها زياااااده على الفااااضي يعني مافيه شي يستاهل هالسعر وهذا اللي نبي نوصل له خل عنك ****** اللي يبون شي غالي وبس حتى لو انه ما يستاهل

وانا ابيك تجيب لي سياره في السعوديه بسعر اللكزس وبمواصفاتها اتحدااااااك
انت عارف انك غلطان في هالنقطه ولا تدري وش تقول وعن الامراء اللي يركبون لكزس ياااا كثرهم تعال لجامعة الملك سعود وشف كم امير معه لكزس وحينا فيه كم من امير وكثير اللي معهم لكزس ما ادري عن اللي تشوفه انت

اما الهيدروليك ابشرك اخوي موجود حتى على ايام اللكزس 400 وارد المانيا موجود فيه <-- طبعا لاني اعرف واحد عنده هالسياره وفيها الهيدروليك ما تكلمت من فراغ
لكن حبيت اسألك انت تعرف احد عنده فياقرا؟ وجلست عنده اكثر من 3 سنوات
لانه عندنا تعطل الهيدروليك كم من مره للأسف لكن تصلحت على الضمان وما قصر الجفالي لانه من جد وكيل صح واتوقع انه احسن من ابو جميل لكن للذمه ما ادري عن جميل بس الجفالي معاملتهم جداا راقيه وصلحوه لنا بدون اي وجع راس

نجي للعزل اخوي لا يهمك شي اسمه ارقام وبعدين باللله عليك تقارن لي صوت مكينة اللكزس بصوت المرسدس اللي من جددددددد ازعاج بالنسبه لسياااره فخمه؟ لا هي ولا البي ام ما يتقارنون ابد بالنسبه للصوت

والازعاج ترى 70% اذا ما كان اكثر مصدره المكينه والباقي للهواء

فهمت عزيزي؟

اما الشكل مع ان اللون اللي اخترته ما احبه والجنوط مو حقت اللكزس اللي عندنا ولا المرسدس بعد

بس في وجهة نظري ان اللكزس احلى بمرااااحل وبدون مقارنه (لاحظ قصة الباب الخلفي وشف الفرق) غير كذا شف المقدمه الشبه منحرفه للمرسدس
اما اللكزس تتفوق في المقدمه اللي انسيابيه اكثر من اي سياره
عموما عشان ترتاح وانت طالع تلفت حولك وشف مرسدس وجنبه 430 بس 2004 مع اي جهه واذا ما شفت ان اللكزس احلى شي غريب صراحه
نجي للتلفزيون اخوي قلت لك مو صعبه ويقدرون يحطونها لكن تقنيه مستهلكه وغير مرغوبه وشف اي راعي بي ام ولا مرسدس عنده واسأله لو يشوف ولا لا |300|
والسماعه قلت لك تقنيتهم احسن من تقنية حط شريحتك يمكن انت من النوعيه اللي يفضلون السماعات عشان كذا اقدر اقول انهم غلطانين انهم ما خيروا الزبون بين السماعه او الاسلكي او حطوهم مع بعض مثل الفياقرا
اما عن التلفون نفسه تقنيته احسن من تقنية اي سياره غيره

اما كلامك اخووووي بالله عليك اول رد لك رد واحد ينتقد ؟ اقراه انت زين وبتشوف

اما عن انتقاد السياره بالعكسسس اخوي احسن ناس اللي ينتقدون ويعلمون غيرهم والله هم اللي يستاهلون المدح مو اللي يملكون سياره ويخلونها احسن شي في العالم :) لكن قلت لك رااجع اول رد لك وبتعرف قصدي

ومافيه بيننا اي زعل انشالله وتحياتي لك وانشالله تمتلك في القريب العاجل لكزس عشان تقتنع ان كلامك غلط

تحياتي لك

شباب طالما الموضوع يخص الكزس ومميزتها حبيت استغل هل الفرصة وعرض لكم سيارتي :)

>>>>>>>>>>>>>>>>>>>>>>>>>>><<<<<<<<<<<<<<<<<<<<<<<<<<<<<<<<<<<<

== والسعر انا اشوفه غالي بالمواصفات الحالية ((مواصفات الوكيل يعني السعودية )) لكن لو ينزل المواصفات الفل

وبنفس السعر اللي الحين ما اختلف معاك .... وسعر المرسيدس S600 لوكان اقل من اللي هو به الحين (( اتوقع حول

نص مليون )) كان محد شراه تدري ليش لأنه يستهدف شريحة معينة من الناس اللي كل ماغلا الشي شروه واظنك فهمت

وش اقصد ونفس الكلام ينقال للبورش بكل فئاته وازيدك بعد شف اللمبورجيني المورسيلاجو وغيره وعموما الألماني

غالي...اما اللكزس تختلف شريحة المستهلكين المستهدفين يعني عمرك شفت امير راكب 430 واذا كان فهذا نادراًً...

== وبالنسبة للهيدروليك لا يوجد في المواصفات السعودية ولا حتى في غيرها الموجود هو المساعدات الهوائية ويسمى

(( نظام تعليق هوائي )) وهو الموجود في السعودية اما الي تقول غير موجود في السعودية فهو نظام التحكم في

المساعدات يعني مرة تصير المساعدات قاسية (( SPORT )) ومرة لينة ((COMFORT )) على حسب اختيارك ....

وشف عشان ما نختلف في هالنقطة انا هذا اللي اعرفه عن الهيدروليك وبعد سالت الوكالة وقالوا ماندري عنه يعني لو

هو موجود بيقولون موجود واذا طلع كلامك هو الصح اشكرك لأن زودت معلوماتي...

== العزل وما العزل شف اركب ال430 وامش فوق 150 وبنفس الشي في الفياقرا والبي ام وقارن ولعلمك العزل الصوتي

في 430 >>>> 25 ديسيبل والفياقرا >>> 26 ديسيبل والبي ام مااذكر بالضبط بس حولهم يعني الفرق بسيط ولا يلاحظ..

== الشكل ابيك توقف اللكزس 2004 والفياقرا اي موديل قدام بعض وتناظرهم بالعرض وعطني رايك..



وتراك قلتها الناس اذوااااااااااااااق...

== تقنية التلفزيون ما اظن ما له داعي لأنك لو انت قاعد بالسيارة تنتظر واحد والا عند الاشارة والا واقف عند مطعم

طلبات سيارة اكيد راح تستفيد منه , وبعدين الحين اللكزس ما حطو سماعة يبحطون تلفزيون وانا اخوك !!!!!!

طيب لو قلنا انها مالها داعي وش رايك في نظام مراقبة ضغط الكفرات بعد ماله داعي !!!!!!!!!!!

في الختام حبيب قلبي تراي يوم انتقد اللكزس ما اتنقدت كل شي فيها بالعكس مدحتها كاملة وتقدر تراجع ردودي كلها

وتتأكد, بس في ((جزيئيات بسيطة )) على قول اخوي لكززاوي ما اعجبتني ووضحتها وان كنت متأكد انه لكزس راح

تتلافى هالعيوب وانا اشوف ان المستقبل لـكــــــــــــــــزس...

ولاتستغرب من كلامي هذا واتقول اني متناقض, هذا كلامي من اول (( وراجع اول رد لي )) بس انا انشغلت بذكر العيوب

اللي لاحظتها واللي حبيت اذكر وجهة نظري فيها ... وترى موب عيب الواحد يذم سيارته وموب كل من قال عيب في

سيارة او انتقد سيارة معناته انه حاقد ....

اتمنى لو ترد على كل نقطة وبالتفصيل لو تحب ... وراح اكون شاكر ومقدر...

وعلى العموم سامحنا اذا اخطينا او شدينا معك في الكلام وترانا نبقى اخوان.....

والسلام عليكم ورحمة الله وبركاته

حياك اخوي :) NiCK

= بأرد عليك اولاً باخر شي قلته عن امتلاك السيارة (( ولعلمك موب يعني اني معي لكزس لا والله بس عشان اثبتلك ))

ولو اني متأكد والله لو اركبك معي في السيارة منت مصدق اني امتلكها لكن انا ابقولك شي في السيارة مايعرفه

الا واحد يمتلكها لا وبعد لازم تكون قاعدة معاه فترة :

شف , رح لعيال عمك وقلهم في زر يفصل البصمة وتشغيل السيارة بدون مفتاح واسألهم وينه وعشان اثبتلك بعد

احدد لك مكانه بالضبط بتلقاه تحت الدركسون وفوق دعاسة البنزين يعني في النص بينهم واذا مالقيته اقرأ دليل

المالك وابتلقاه واذا مالقيته بعد رح للوكالة واسألهم.

== بعدين ماتكلمت في نظام مراقبة ضغط الكفرات ليش والا ماودك تعيب السيارة.....

== بالنسبة لسيارة عيال عمك هل هي 2004 ؟؟؟

== والبلوتوث اللي تتكلم عنه انت اولاً ماجربته عشان تقولي كلامي صح او خطأ يعني قاعد تنقل كلام من الأمريكان

والمجربين الي غيرهم ... وانا بقولك وش اللي يصير معي بالضبط وانت احكم انا معي جوال (( الدمعة )) كل مااجي اكلم

واحد او واحد يدق علي, ارد عادي لكن في اثناء المكالمة يفصل الجوال من السماعة اللي مشبوك عليها

التلفون ويتحول الى الجوال نفسه يعني المكالمة نفسها ماتنقطع لكن البلوتوث نفسه يفصل ويعطيني كلام

بالإنجليزي معناه ان المكالمة انفصلت من الشبكة لكن الغريب ان المكالمة ما انفصلت من الجوال بس من

السماعة الخارجية فانا ماادري وين المشكلة هل هي من الجوال (( وهذي ماتوقعها لان المكالمة ماانقطعت من الجوال

والجوال معي طبيعي ولا فيه اي مشكلة )) او من البلوتوث نفسه (( وهذي اتوقعها لأن ابراج الجوال في الشاشة عندي

صفر ولا شي )) فانا اتمنى تفسر لي هذي المشكلة وتقول رايك دامك خابر السيارة ...

= بالنسبة للسماعة انا اولا ماحب اضيف شي على السيارة ومع ذلك كلمت الوكالة وقلت ابي سماعة قالو مافيه الاتلفون

كامل واظن اسمه (( كار كت )) يعني بيلغي علي فايدة البلوتوث وياخذ مكان في السيارة موب زي الفياقرا (( واظنك

تعرف مكانه زين دامك تقول السيارة عندك )) اللي هو تحت المسند (( التكاية )) والبي ام تحت ازرار المكيف ..

= اما سبب شرائي للسيارة وعدم شرائي لغيرها مثل البي ام والفياقرا تراي ذكرته في الردود اللي قبل لكن ماادري

ليش سالتني مرة ثانية وبرد عليك نفس الرد وباضيف عليه :

لأن اللكزس تو شكلها متغير والصيانة وتعامل الوكيل وبالنسبة للفياقرا قلتلك بتتغير في وسط 2005 على ابعد تقدير

يعني حرام اشري سيارة بتتغير بعد بكرة والبي ام نصها خرابات حتى الناس يسمونها بي هم دبليو

واذا بتقولي اشري مستعمل اقولك ماحب المستعمل ولا ودي اقربه....

== وعن قفل الدرايش يا انك مافهمت اللي قلت او انك ما جربت لكن باحسن الظن واقول انك مافهمت وباشرح لك اكثر :

رح لسيارة عيال عمك (( معليش كل شوي رايح بس اتحملني شوي )) واضغط زر قفل الدرايش وجرب تفتح الدرايش الثانية

(( غير السواق )) والزر مقفول وشف وش يصير واذا انفتحت لك افلقني .......


وانا اعتقد ان الLS430 مع جميع ماذكرت من مواصفات امان ومميزات تقارن بالفياقرا والحوت الي مواصفاتها عادية
===
هذا دليل انك غشيم في هالسيارات حبيبي المرسدس والبي ام مواصفات السلامة واحده مثل الاير باق وانظمة التوقف يعني مدري وش اقول لك صراحه

ياالحبيب انا ماتكلمت عن السلامة وانظمتها فقط انا قلت ان اللكزس بجميع مافيها تقارن بالمرسيدس والبي ام

بمواصفاتها العادية مع بعض المواصفات الإختيارية الأساسية , انا اقصد ان اللكزس فيها الشاشة والبلوتوث والكاميرا

(( وهذي اهم مافي اللكزس من ناحية التقنية )) والذاكرة للمقاعد وغيره من المواصفات هي نفسها موجودة في

المرسيدس والبي ام اللي مواصفاتها عادية يعني تضيف كم الف ريال على سعر الستاندارد وتلقاها والأمان نفس الكلام

يعني مثل ماقلت انت هي وحدة في كل الموديلات لكن في اكثر من كذا للي يدفع اكثر طبعاًً عندك مثلاًً

الشاشة الخلفية (( وهذي موجودة في اللكزس بس DVD يعني للترفيه فقط موب للتحكم في بعض الوظائف ))وايضا

تشغيل السيارة في المرسيدس بضغطة زر (( الزر االلي على القير )) لكن اللكزس مثل المفتاح (( لكن بدون المفتاح

مدري وشلون تجي ذي بس لاتدقق )) ويمكن وانت ماتنتبه تحرق السويتش عاد لا تقولي كذاب جرب بنفسك (( في

سيارة عيال عمك لا تنسى )) |243| وبعد نظام فور ماتيك في المرسيدس للدفع الرباعي وبعدين في البي ام نظام

جديد نازل على 760 (( ما ادري نزل على 745 )) يخلي السيارة تخفف اوتوماتيك عند المطبات وهذي عشان اكون

معك صادق ما جربته بس سمعت عنه من واحد يقرب لي عنده ال760 ..

وجاي تقول لي غشيم اخاف انت الغشيم وماتدري ... معليش الله يسامحك...

وبخصوص الكفر وعرضه لا تقارن لي جنط S600 وعرض كفرها مع جنط اللكزس وعرض الكفر لأن جنط ال S600 بلحاله

يبكي اترك عنك الكفر هذا شي ثاني لكن تعال ليش ما تشوف جنط ال 745 وعرض الكفر وانا لاازال مصر ان جنط

اللكزس وان كان 18 فهو صغير في العرض حتى بالمقارنة مع جنط S500 18 inch وياليت توقفهم جنب بعض وتقارن

بينهم ...

وبعدين حبيب قلبي انا ماقلت شي في مكيف اللكزس عشان تطريه..

نيك

يعطيك العافية
ولكزز سيارة تشد ظهرك تتكلم وانت واثق
ولا عليك صدقني ما يعيب اللكزز الا كل واحد مغبون

للامام يا غالي

قريت كلامك وحبيت ارد عليك معليش

اول شي ردك الأول رد واحد حاقد على السياره مو راد واحد يملكها وينتقد
شف كلامك
=====
والله عادية مافيها شي يميزها لا مواصفات مميزة ولا تلفون ولا تلفزيون..........

ولا شي من مواصفات البي ام والمرسيدس.......

وصدق اللي قال ان اللكزس تقليد للمرسيدس والدليل الشكل وبعض المواصفات الداخلية مثل بصمة الدخول وعندي دليل
=====
دامها عاديه وتقليد ليش شاريها طيب؟ وهي سعرها 250 الف شي غريب

ايضا
===

حتى التلفون اللي لاجينا عليه تراه بلوتوث يعني مافيه سماعة يدوية واذا صار معك احد في السيارة يسمع اللي يكلمك لأن التلفون

على السماعات واذا تبي تحوله على السماعة اليدوية لازم تفصل البلوتوث ويمكن ترووح عليك المكالمة وانت تفصل ...
====
لا حبيبي غلطان وهذا اول دليل انك ما تدري عن السياره لان كل اللي استعملوه ميزوه حتى الامريكان مدحوه عن اللي موجود في المرسدس والبي ام ولا قد فصل مع احد وتجي تقول لي فاشل؟
وبعدين اطلب من الوكاله ويركبون لك سماعه

وايضا
====
بانسبة للراحة ماشاء الله ما اختلف معاك وبيني وبينك السيارة ما تستاهل سعرها لا تقنيات ولاغيره ... وبعدين يوم جيت
===
ارجع اقول لك من طاقك على يدك وقايل لك اشترها؟ والله باين اسلوب واحد ما وصلها ويسب :) مع احترامي لك

وايضا
===
بالنسبة للعزل الصوتي ممتاز جداًً بس مايختلف عن الفياقرا والحوت.
==
لا حبيبي غلطان وخاصه الفياقرا صوتها مزعج نوعا ما واللكزس افضل بكثيرر

وايضا
====
وبعدين في شي فضيحة في ال LS430 وما توقعت اليابانيين ينسونه اللي هو قفل الدرايش يعني اذا قفلت الزر تقفل

على الجميع حتى السواق مايقدر يتحكم يعني الجمس اللي عندنا احسن في هالميزة خل الفياقرا والحوت
====
ياخي وش هالكلام؟ مجرب قفل 430 من بعد كلامك وكلهم شغالين والسائق يفتح
بس الظاهر جمسك اللي خربان مع ان الجمس اللي عندي شغال :P

وايضا
====
وانا اعتقد ان الLS430 مع جميع ماذكرت من مواصفات امان ومميزات تقارن بالفياقرا والحوت الي مواصفاتها عادية
===
هذا دليل انك غشيم في هالسيارات حبيبي المرسدس والبي ام مواصفات السلامة واحده مثل الاير باق وانظمة التوقف يعني مدري وش اقول لك صراحه

وايضا
===
الشكل الخارجي وهنا قارنتها مع الفياقرا 99 في الشكل فقط ماقلت الفياقرا 99 افضل في كل شيء
===
الحين بذمتك الفياقرا 99 احلى من ال 430 2004؟
يعني حتى الاعمى يقول اللكزس احلى حتى من الفياقرا الجديده لكن في هالنقطه الناس اذواق

وايضا
===
حجم الكفرات تعرف معنى كلامي لو قارنت بينه وبين الحوت والفياقرا .
===
انت تدري كم عرض كفر الفياقرا s600 ?
عرضه 245 يعني مثله مثل اللكزس وايضا طوله 18 يعني شفت انك غشيم وما تدري؟

ايضا
===
التقنيات المتوفرة قليلة لاتلفون ولا TV واقصد بالتلفون يعني سماعة يدوية وهذي حتى الوكالة معترفين بها ..
===
التلفون رديت اما التلفزيون اخوي الالماني بعد 20 يطفى وبعدين لو انها تقنيه تستاهل حطوها اخوي لانها مجرررد شي ينعرض على الشاشه :)

ايضا
===
مفتاح والقير عادي واوتوماتيك ـــ وان كان هنا يحسب للكزس الشاشة اللمس وتقنية البلوتوث والقير 6سرعات والراحة

اللي تفوقت على غيرها .
====
وايضا ايرباق الركب اللي قلدوه وايضا الزجاج االلي ما يبقى عليه اثار ماء وايضا المكيف اللي يعتبر افشل شي في سيارات مرسدس
ويكون بمعلومك ترى عندنا فياقرا 2002 لكن ما جلست امدح فيها مثل اللي عندهم شبح

وايضا
====
بعدين وش دخل الأودي في السالفة؟؟؟؟؟؟

== وتقول انا ما عندي لكزس بالله عليك الحين واحد يقولك بلوتوث وضغط كفرات وراحة وفخامة وووو......
====
الاودي لانك طريت السيارات اللي ما تستاهل سعرها
والمواصفات اللي تقولها حبيبي ما يحتاج تقدر تقراها هنا

اما سؤالك لو اني املك لكزس اخوي انا اغلب عيال عمي واصدقائي عندهم هالسياره يعني عارف عنها كل شي
وانا مو من النوع اللي يحكي عن شي من فراغ مثل ...

وعن الهيدروليك قلنا لك مواصفات السعودي مو موجود لكن دليل انك غشيم ما تدري ان المساعدات هيدروليكيه عشان الثبات :)
هذا بالنسبه للسعودي وغير السعودي

اما السعر انا اقول لك انها تجيب لي مواصفات اللي اكبر منها بسعر اقل وبجوده اكثر

انت قل لي ليش الاودي يستاهل سعره وايضا المرسدس فياقرا خصوصا ال 600 واي سياره فخمه المانيه مثل الكاين بورش تيربو اللي من جد مافيه اي نوع من انواع الفخامه وشف كم سعره :)
ممكن؟

انا لو اني مو متأكد انك ما تملك السياره ما كتبت كلامي

وشكرا

معليش حبيبي لي فتره ما دخلت

وش تبي ارد عليك فيه؟

انت اول مره تقول اللكزس اللي عندنا هي الفل ابشن والرد الاخير تقول انها مو الفل ابشن :|
واسلوبك مو اسلوب انتقاد بل اسلوب تهجم

بعدين يكون في علمك الهيدروليك موجود برا لكن عندنا لا اما بالنسبه للبلوتوث انا اول مره اسمع واحد يشتكي منه صراحه

عموما انا مابي ادقق في كلامك كثير لانه متناقض من جد بس حبيت اقول لك لا تقول كلام وانت مو متأكد منه

تحياتي لك واسف اذا زعلت من كلامي

يعطيك العافية أخوي .. و مشكور على الموضوع ..

المووضوع متكااامل مررررة .. و السيارة روعة .. و زي ماقالو إسطورة جيلها ..

تحياتي

موضوعك روعه والاروع منه السياره


يعطيك الف عافيه على الموضوع المتميز


شكرا لك وننتظر المزيد والافضل

اهلين اخوي خالد

معليش بس والله انشغلت بالرد على اخوي NiCK

بالنسبة للسيارات الثانية مرسيدس S500 2002 و BMW 745iL 2003

طبعاً شاشة اللكزس افضل بكثير من حيث الاختصار و السرعة في الوصول للمعلومات عندك البي ام تضيع علشان بس

تشغل المكيف وان كان انه بعد التعود خلاص تصير شي عادي بس اللكزس افضل بكثير يعني ماتحتاج احد يعلمك ...

وبالمقارنة مع شاشة المرسيدس مافي اختلاف كثير بس المرسيدس اكثر معلومات وانكان اللكزس تتميز باللمس وهذي

حركة ما تعرف متعتها الا اذا جربتها .... وفيه حركة حلوة في اللكزس يعني بس علشان تضبط الساعة تحدد كم الفرق

بين توقيتك وتوقيت غرينيتش وهو مباشرة يعطيك الوقت على طول بالثانية ...

بخصوص نظام مراقبة ضغط الكفرات والله انصدمت يوم عرفت انه كذا .... يعني الانفنيتي فيها هالنظام واللكزس مافيها

والله عيب....

يعني اللكزس بس لو تزيد التقنيات المتوفرة مثل التلفون وال TV و تهتم شوي بالشكل والمواصفات الداخلية والمقعد

الخلفي مثل الشاشة الخلفية وينزل الوكيل المواصفات الفل اوبشن عندنا كان تطلع اللكزس قمة...

اسف على الاطالة بس تراي احب افصل..

ولاازال احتري رد اخوي NiCK على كلامي اللي قلته في الرد اللي قبل...

نشوفكم على خير ان شا الله .. سلاماااات ..